Mudyondzisi 10

₁Tinhongana to fela emafurheni layo nun'hwela ti nga ma onha, ma vila;

vuphuntanyana bya munhu wa ndzhuti byi hatla byi tiveka ku tlula vutlhari bya yena.

₂Miehleketo ya lowo tlhariha yi n'wi tisela nkateko,

kasi ya xiphunta yi xi vangela makhombo.

₃Phuphula hambi ri nga famba endleleni a ri tivi mafambele,

ri tikomba eka hinkwavo leswaku a ri tlharihanga.

₄Loko hosi ya tiko yi ku hlundzukela u nga hatli u lan'wa;

la tikhomaka, ú humesiwa emilandzwini yo tala.

₅Laha misaveni, ndzi vonile mhaka yo biha,

swi nga swihoxo leswi endliwaka hi tihosi:

₆Maphuphula ma tlakusiwa,

kasi lavakulu ni swifumi, va tsongahatiwa.

₇Ndzi vonile mahlonga ma gadile tihanci,

tinganakana ti ri karhi ti famba hi milenge kukota mahlonga.

₈La celaka khele, ú ta hojomela eka rona,

nyoka yi ta luma la boxaka khumbi.

₉Maribye ma vuya hi mufayi wa wona,

mupandzeri wa tihunyi a nga tivangela khombo.

₁₀Loko xihloka xa wena xi bvinyekile

hileswi u rivaleke ku xi lota,

xi ta ku tikisela ntirho!

Vutlhari byi pfuna ku lota miehleketo.

₁₁Loko nyoka yi ku luma hi ku ka yi nga si tirhiwa hi mungoma,

ku vitana mungoma wa kona swa ha pfuna yini ke?

₁₂Vanhu va tsakela marito ya ntlhari,

kasi nomo wa phuphula wa ri dlayisa;

₁₃loko ri sungula ku vulavula, ku huma swa vuphunta ntsena;

ni loko ri heta, u ta va u twile ta rihuhe ro chavisa.

₁₄Xiphunta xi vulavula ngopfu,

hambileswi munhu a nga tiviki leswi nga ta humelela mundzuku,

hambileswi a nga twisisiki leswi nga ta va kona loko a hundzile.

₁₅Xiphunta xi tihlakata hi ku phyaphyarha,

xi ko xi rivala ni ndlela yo muka.

₁₆Tiko ro fumiwa hi mufana,

leri tindhuna ta rona ti nwaka ka ha ri mpundzu, ri le khombyeni!

₁₇Kambe ku katekile leri fumiwaka hi munhu wa ndzhuti,

leri tindhuna ta rona ti dyaka ti pima,

ti ri tinghwazi, ku nga ri swidakwa.

₁₈Munhu wo loloha ú boleriwa hi lwangu,

ra n'wi pfutela a ha khondle mavoko.

₁₉Swakudya swa nandziha,

ni vhinyo yi tsakisa mbilu,

kambe hinkwaswo swi kumiwa hi mali!

₂₀U nga soli hosi hambi emiehleketweni ya wena,

ni loko u etlele u ri wexe, u nga soli xifumi,

hikuva tinyanyana ti nga rhwala mahungu ya kona,

ti haha ti ma hangalasa.