Duteronoma 5

₁Kutani Muxe a hlengeleta Vaisraele hinkwavo, a vulavula na vona a ku: “N'wina Vaisraele, yingisani swinene milawu ni swiletelo leswi ndzi mi byelaka swona namuntlha; swi dyondzeni mi swi hlayisa, mi hanya ha swona. ₂HOSI Xikwembu xa hina xi endlile ntwanano na hina entshaveni ya Horebe; ₃ntwanano wa kona, a xi wu endlanga ni vatata wa hina, kambe xi wu endlile na hina hinkwerhu hi nga kona namuntlha. ₄HOSI Xikwembu xi vulavurile na n'wina entshaveni xi ri endzilweni, xi langutane na n'wina. ₅Enkarhini wa kona, mina a ndzi yimile exikarhi ka n'wina na HOSI Xikwembu leswaku ndzi mi tivisa marito ya xona, hikuva n'wina a mi chava ndzilo, kutani a mi nga khandziyi ntshava.

“Kutani HOSI Xikwembu xi te: ₆‘Hi mina HOSI Xikwembu xa wena, lexi xi ku humeseke etikweni ra Egipta ni le vuhlongeni bya kona.

₇“ ‘U nga tshuki u gandzela swikwembu swin'wana, kambe gandzela mina ntsena.

₈“ ‘U nga tshuki u tivatlela xifaniso xa xikwembu, kumbe xifaniso xa swilo swihi na swihi leswi nga henhla etilweni, kumbe leswi nga hansi emisaveni, kumbe leswi nga matini ehansi ka misava. ₉U nga tshuki u swi nkhinsamela kumbe ku swi tirhela, hikuva mina HOSI Xikwembu xa wena, ndzi Xikwembu xa rilaveta: Ndzi ba lava va ndzi vengaka kun'we ni vana va vona, ku fika eka rixaka ra vona ra vunharhu ni ra vumune; ₁₀kambe ndzi komba rirhandzu ra mina leri tshembekaka ku fika eka rixaka ra madzana-dzana ra lava va ndzi rhandzaka, lava hlayisaka milawu ya mina.

₁₁“ ‘U nga tshuki u tlanga hi vito ra mina, hikuva mina HOSI Xikwembu xa wena, ndzi nga ka ndzi nga tshiki ku ba loyi a tlangaka hi vito ra mina.

₁₂“ ‘Hlayisa siku ra Savata, ri tshama ri hlawulekile, hilaha mina HOSI Xikwembu xa wena ndzi ku leriseke hakona. ₁₃U na masiku ya 6 lawa u faneleke ku tirha mintirho ya wena hinkwayo. ₁₄Kambe siku ra vu-7 i siku ra ku wisa leri hlawuleriweke mina HOSI Xikwembu xa wena; hi siku leri, u nga tshuki u tirha ntirho ni wun'we, wena kumbe n'wana wa wena wa xinuna ni wa xisati, kumbe nandza wa wena wa xinuna ni wa xisati, hambi yi ri homu ya wena, kumbe mbhongolo ya wena, kumbe xifuwo xihi na xihi xa wena, kumbe munhu loyi a luveleke eka wena; hi ndlela leyi, na wona malandza ya wena ya xinuna ni ya xisati ma ta kuma ku wisa ku fana na wena. ₁₅Tsundzuka leswaku a wu ri hlonga etikweni ra Egipta, ni leswaku mina HOSI Xikwembu xa wena ndzi ku humesile evuhlongeni byebyo, hi ntamu lowukulu ni mintirho ya matimba. Hikokwalaho, mina HOSI Xikwembu xa wena ndzi ku lerisa ku hlayisa siku ra Savata.

₁₆“ ‘Xixima tata wa wena ni mana wa wena, hilaha mina HOSI Xikwembu xa wena ndzi ku leriseke hakona, leswaku u ta hanya masiku layo tala, u kateka etikweni leri mina HOSI Xikwembu xa wena ndzi ku nyikaka rona.

₁₇“ ‘U nga tshuki u dlaya.

₁₈“ ‘U nga tshuki u oswa.

₁₉“ ‘U nga tshuki u yiva.

₂₀“ ‘U nga tshuki u lumbeta munhu-kuloni hi vumbhoni byo hemba.

₂₁“ ‘U nga tshuki u navela nsati wa munhu-kuloni; naswona u nga tshuki u navela yindlu ya yena, hambi nsimu ya yena, kumbe nandza wa yena wa xinuna ni wa xisati; ni homu ya yena, kumbe mbhongolo ya yena, kumbe xilo xihi na xihi lexi nga xa yena, u nga tshuki u xi navela.’

₂₂“Marito lawa hinkwawo, HOSI Xikwembu xi mi byerile wona loko mi hlengeletanile hinkwenu entshaveni, laha xi vulavuleke na n'wina hi rito leri tlakukeke, xi ri exikarhi ka ndzilo, epapeni ra ntima lowukulu. Eka leswi xi swi vuleke, a xi engetelanga nchumu, xi lo swi tsala emaribyeni mambirhi ya swiphepherhele, xi ndzi nyika wona.

₂₃“Loko mi twile rito leri humaka exinyamini, ni loko mi vonile ndzilo lowu pfurhaka entshaveni, varhangeri hinkwavo va tinyimba ta ka n'wina ni vakulukumba va n'wina hinkwavo va tile eka mina, ₂₄va fika va ku: ‘HOSI Xikwembu xa hina xi hi kombisile ku kwetsima ka xona ni vukulukumba bya xona, naswona hi twile rito ra xona loko xi vulavula na hina xi ri endzilweni; namuntlha hi vonile Xikwembu xi vulavula na munhu, kambe a nga fi. ₂₅Xana na hina hi nga pona ke? E-e, loko ho tlhela hi twa rito ra HOSI Xikwembu xa hina, hi ta fa; ndzilo lowukulu lowu, wu ta hi herisa. ₂₆Ku hava munhu loyi a tshamaka a twa Xikwembu lexi hanyaka xi vulavula na yena xi ri endzilweni, kutani a ya emahlweni a hanya; sweswo swi humelele eka hina ntsena. ₂₇We Muxe, tshinela kusuhi ni ntshava, u twa hinkwaswo leswi HOSI Xikwembu xa hina xi nga ta swi vula. U ta vuya u hi rungulela hinkwaswo leswi xi nga ta ku byela swona. Hi ta yingisa, kutani hi swi endla.’

₂₈“HOSI Xikwembu xi mi twile loko mi vulavula na mina, kutani xi ku ka mina: ‘Marito ya vanhu lava, ndzi ma twile; hinkwaswo leswi va ku byeleke swona, swi lulamile. ₂₉Loko va nga va ni miehleketo leyi minkarhi hinkwayo, va ndzi chava, va hlayisa ni milawu ya mina hinkwayo, a va ta kateka, vona ni vana va vona. ₃₀Famba u ya va byela leswaku va tlhelela emixaxeni ya vona. ₃₁Kambe wena Muxe, yima laha tlhelo ka mina, hikuva ndzi lava ku ku byela swileriso hinkwaswo ni milawu ni swiletelo leswi u nga ta va dyondzisa swona. Kutani loko va ta va va nghenile etikweni leri ndzi nga ta va nyika rona ri va ra vona, va ta hanya ha swona.’ ₃₂Hikokwalaho, endlani hilaha HOSI Xikwembu xi mi leriseke hakona; vonani leswaku mi nga hambuki endleleni ya xona. ₃₃Mi fanele ku hanya hi ndlela leyi HOSI Xikwembu xi mi lerisaka yona. Loko mi endla sweswo, mi ta kateka, naswona mi ta hanya masiku layo tala etikweni leri mi nga ta ri teka ri va ra n'wina.