Mintirho 22

₁“N'wina varikwerhu na vatatana, yingisani sweswi ku tihlamulela ka mina emahlweni ka n'wina.” ₂Loko va twa leswaku ú vulavula na vona hi ririmi ra Xiheveru, va miyela ku tlula eku sunguleni, kutani Pawulo a ku:

₃“Mina ndzi Muyuda; ndzi velekiwile eTarso wa Kilikiya, kambe ndzi kulele emutini lowu, ndzi ri mudyondzisiwa wa Gamaliele. Ndzi dyondzisiwile Nawu wa vatatana hi mukhuva lowunene, ndzi ri munhu la hisekelaka Xikwembu, kukotisa n'wina hinkwenu namuntlha; ₄ndzi xanisile lava landzaka Ndlela leyi ya Hosi ku kondza va dlawa. A ndzi khoma vavanuna ni vavasati, ndzi va cukumeta ekhotsweni. ₅Timbhoni ta mina hi yena Muprista lonkulu, ni nhlengeletano hinkwayo ya vakulukumba. Ndzi amukerile ka vona mapapila lama tsaleriweke Vayuda va ka hina le Damaska; ndzi yile kona ku ya khoma lava akeke kona, ndzi va tisa eYerusalema leswaku va ta biwa swinene.

₆“Kutani loko ndzi ri karhi ndzi famba, ndzi ri kusuhi ni le Damaska, hi nkarhi wa nhlekanhi, kan'we-kan'we ndzi rhendzeriwa hi ku vonakala lokukulu loku humaka etilweni. ₇Ndzi wela hansi, kutani ndzi twa rito leri nge ka mina: ‘Sawulo, Sawulo, u ndzi xanisela yini?’ ₈Mina ndzi hlamula ndzi ku: ‘U mani, Hosi?’ A ku ka mina: ‘Hi mina Yesu wa Nazareta, loyi u n'wi xanisaka.’ ₉Lava a va ri na mina a va vona ku vonakala, kambe a va nga twi rito ra loyi a vulavulaka na mina. ₁₀Kutani ndzi ku: ‘Hosi, ndzi ta endla yini xana?’ Hosi yi ku ka mina: ‘Suka u yima, u ya eDamaska; hi kona laha u nga ta byeriwa hinkwaswo leswi u fanelaka ku swi endla.’ ₁₁Leswi a ndzi hluleka ku vona hikwalaho ka ku vangama ka ku vonakala koloko, lava a va ri na mina va ndzi khoma hi voko, va ndzi yisa eDamaska.

₁₂“Kona kwalaho, a ku ri ni munhu loyi a va ku i Ananiya; a a ri munhu wa vukhongeri, a famba hi Nawu, a nkhensiwa swinene hi Vayuda hinkwavo lava akeke eDamaska. ₁₃A ta ka mina, a vulavula a yimile kusuhi na mina, a ku: ‘Sawulo makwerhu, tlhela u vona!’ Hi nkarhi wolowo ndzi tlhela ndzi vona, ndzi n'wi languta. ₁₄Kutani a ku: ‘Xikwembu xa vatata wa hina xi ku hlawurile leswaku u tiva ku rhandza ka xona, u vona Loyi a lulameke, u twa rito leri humaka enon'wini wa yena; ₁₅hikuva emahlweni ka vanhu hinkwavo u ta va mbhoni ya yena ku tiyisa leswi u nga swi vona ni leswi u nga swi twa. ₁₆Sweswi ke, u hlwelela yini? Suka u yima, u khuvuriwa leswaku u basisiwa eswidyohweni swa wena, hi ku khongela vito ra Hosi.’

₁₇“Kuteloko ndzi tlhelele eYerusalema, ndzi ya khongela eTempeleni, kutani ndzi ngheniwa hi Moya; ₁₈ndzi vona Hosi yi ri karhi yi ndzi byela, yi ku: ‘Hatlisa u suka eYerusalema, u nga hlweri, hikuva vanhu va kona a va nga amukeri vumbhoni lebyi u byi vulaka ehenhla ka mina.’ ₁₉Kutani ndzi ku: ‘Hosi, va swi tiva swinene leswaku vanhu lava pfumeleke ka wena, va nghenisiwile hi mina ekhotsweni, ndzi va ba hi minkhavi emasinagogeni; ₂₀ni siku ku dlayiweke Stefano mbhoni ya wena, na mina a ndzi ri kona, ndzi ri karhi ndzi nkhensa, ndzi hlayisa swiambalo swa lava n'wi dlayaka.’ ₂₁Kavaloko Hosi yi ku ka mina: ‘Famba, hikuva ndzi ta ku rhuma kule, eka vamatiko.’ ”

₂₂Va n'wi yingisela ku ya fika loko a vula sweswo, kutani va tlakusa rito, va ku: “Munhu lowo tano a a susiwe emisaveni, a a dlawe! A nga faneriwanga hi ku hanya!” ₂₃Kutani va huwelela, va dzudza swiambalo swa vona, va tsutsuxela ritshuri ehenhla. ₂₄Kavaloko ndhuna ya nyimpi yi lerisa leswaku Pawulo a yisiwa ekhokholweni, yi ku: “A a vutisiwe, a biwa hi minkhavi leswaku ndzi ta tiva mhaka leyi endlaka leswaku va huwelela hi ndlela leyi, va lwa na yena.” ₂₅Kuteloko va n'wi bohile leswaku va ta n'wi ba, Pawulo a ku ka ndhuna ya dzana ra masocha leyi a yi ri kona: “Xana ma pfumeleriwa ku ba Murhoma hi minkhavi, a nga si avanyisiwa xana?” ₂₆Loko ndhuna ya dzana yi twa sweswo, yi ya byela ndhuna ya nyimpi, yi ku: “Xana a wu lava ku endla yini? Munhu loyi i Murhoma.” ₂₇Hiloko ndhuna ya nyimpi yi ta ka Pawulo, yi ku ka yena: “Wa nga ndzi byela, xana u Murhoma xana?” “Ina ke!” ku hlamula Pawulo. ₂₈Ndhuna ya nyimpi yi ku: “Vurhoma lebyi ndzi byi xavile hi mali yo tala.” Pawulo a ku: “Kasi mina ndzi lo tswariwa ka byona.” ₂₉Kan'we-kan'we lava a va tilunghisela ku vutisa Pawulo hi ku n'wi ba, va n'wi tshika; loko yi ri ndhuna ya nyimpi, yi chava loko yi twa leswaku Pawulo i Murhoma, hikuva a yi n'wi bohile.

₃₀Hi siku leri tlhandlamaka, ndhuna yi lava ku kuma ntiyiso emhakeni ya nandzu lowu Vayuda va mangalelaka Pawulo ha wona; hikokwalaho, yi n'wi ntshunxa, kutani yi lerisa leswaku vaprista lavakulu va hlengeletana ni huvo hinkwayo ya Sanedri; kutani yi tisa Pawulo, yi n'wi yimisa emahlweni ka vona.