II Timotiya 4

₁Emahlweni ka Xikwembu ni ka Kriste Yesu loyi a nga ta avanyisa lava hanyaka ni lava feke, ni hikwalaho ka ku humelela ka Yesu ni Mfumo wa yena, ndza ku khongotela swinene ndzi ri: ₂Twarisa Rito, u hiseka hi nkarhi wa kona hambi ku nga ri hi nkarhi wa kona; khorwisa, u laya ni ku khongotela; u nga tsandzeki hi tlhelo ra ku lehisa mbilu ni le ku dyondziseni. ₃Hikuva nkarhi wa ta, lowu vanhu va nga ta ka va nga amukeli dyondzo leyi nga yona ya xiviri; kambe leswi tindleve ta vona ti hlohlonyaka, va ta tihlengeletela vadyondzisi lava nga ta va dyondzisa leswi va swi tsakelaka. ₄Kutani va ta fularhela ntiyiso, va nga ha wu yingisi, va pepetsekela emintsheketweni ya hava. ₅Kambe loko a ri wena, tiya minkarhi hinkwayo, byarha maxangu, tirha ntirho wa muvuri wa Rito, hetisa tifanelo ta ntirho wa wena.

₆Loko a ri mina, ndzi le kusuhi ni ku nyiketa vutomi bya mina egandzelweni; nkarhi wa ku rhurha ka mina wu fikile. ₇Ndzi lwile nyimpi leyinene, ndzi hetile mpfhuka wa mina wa ku tsutsuma, ndzi hlayisile ku pfumela. ₈Leswi saleke, hileswaku harhi ya vahluri yi ndzi yimerile, ku nga ku lulama loku Hosi, muavanyisi lowo lulama, yi nga ta ndzi nyika hi siku lerikulu; kutani a yi nga nyiki mina ntsena, kambe yi ta nyika ni hinkwavo lava tsakeleke ku humelela ka yona.

₉Endla hi matimba leswaku u ta haleno ka mina ku nga ri khale. ₁₀Hikuva Demasi, hi ku rhandza ngopfu swa misava leyi, ú ndzi balekerile a ya eTesalonika. Kreskene ú yile eGalatiya, na Tito ú yile eDalamatiya. ₁₁I Luka ntsena la saleke na mina. Tana na Marka haleno, hikuva ú swi kota ngopfu ku ndzi tirhela. ₁₂Tixiko ndzi n'wi rhumele le Efesa. ₁₃Loko u ta, tana ni jasi leri ndzi nga ri siya na Karpo le Trowasi, ni tibuku, ngopfu-ngopfu leto songa ta madzovo. ₁₄Aleksandro mufuri wa swa koporo ú ndzi onherile ngopfu; Hosi yi ta n'wi tlherisela hi leswi a ndzi endleke swona. ₁₅Na wena u tivonela eka yena, hikuva ú lwile ngopfu ni dyondzo ya hina.

₁₆Eku sunguleni ka ku tihlamulela ka mina ehubyeni, ku pfumalekile ni un'we wo yima na mina; hinkwavo va ndzi balekerile. Ingi va nga vekiwi nandzu eka swona. ₁₇Kambe Hosi yi yimile na mina yi ndzi tiyisa, leswaku ndzi kota ku vula Rito ndzi heta, ni leswaku vamatiko hinkwavo va ta kota ku ri twa. Naswona ndzi vutliwile enon'weni wa nghala; ₁₈Hosi yi ta ndzi vutla ni le ku biheni hinkwako, yi ndzi ponisa leswaku ndzi ta kuma Mfumo wa yona wa le matilweni. Eka yona a ku ve ku dzuneka hilaha ku nga heriki. Amen.

₁₉Rungula Prisila na Akwila ni va ndyangu wa ka Onesiforo. ₂₀Erasto ú sele eKorinto. Trofimo ndzi n'wi siyile a vabya le Mileta. ₂₁Endla hi matimba leswaku u ta haleno vuxika byi nga si fika. Yubulo wa ku rungula; swi tano na Pude na Lino na Klawudiya, ni vamakwerhu hinkwavo.

₂₂Hosi a yi ve ni moya wa wena. Tintswalo a ti ve na wena.