Ta munhu lowo homboloka
1Loko ti ri ta ku ta ka Hosi ya hina Yesu Kriste, ni ta ku hlengeletana ka hina, hi ya eka yena, ha mi kombela hi matimba vamakwerhu: 2Mi nga hatlisi ku pfilunganyisiwa emiehleketweni ya n'wina, ni ku tshukisiwa, hambi ku ri hi moya wun'wana, kumbe hi ku vulavula kun'wana, kumbe hi papila rin'wana leri ri nga vuriwaka leswaku ri huma eka hina, ku tiyisa leswaku siku ra Hosi sweswi ri fikile. 3Mi nga xisiwi hi munhu niswitsanana, hikuva siku ra kona a ri nga ti, loko ku nga si ta ku lahleka lokukulu, ni loko ku nga si humeseriwa erivaleni munhu lowo homboloka, la nga ta helela eku loveni. 4Munhu loyi ú lwa ni hinkwaswo leswi vuriwaka leswaku swi ni vukwembu, kumbe leswi gandzeriwaka, kutani a tikurisa ehenhla ka swona, a ko a ya tshama eTempeleni ya Xikwembu, a ri karhi a tivula leswaku yena hi yena Xikwembu.
5Xana a mi tsundzuki leswaku, loko ndza ha ri na n'wina, a ndzi tala ku mi byela timhaka teto xana? 6Kutani mi tiva lexi xi sivelaka munhu lowo homboloka ku ta sweswi, ku endlela leswaku a humeseriwa erivaleni, loko nkarhi wa yena wu ta va wu fikile. 7Hakunene, ku homboloka loku tifihlaka ku le ku tirheni nisweswi; kambe loyi a ku sivelaka ku tikomba, ú ta ya emahlweni a ku sivela, ku fikela loko a susiwa. 8Kutani hi kona loko munhu lowo homboloka a nga ta humeseriwa erivaleni, kutani Hosi Yesu ú ta n'wi dlaya hi moya lowu humaka enon'weni wa yena, a n'wi lovisa hi ku kwetsima ka yena, siku a taka. 9Loko munhu lowo homboloka a humelela hi matimba ya Sathana, ú ta vanga mahlori ya tinxaka-xaka, ni swikombiso swa vunwa, ni swihlamariso; 10ú ta tirhisa tindlela hinkwato leto biha ta vuxisi ehenhla ka lava yaka eku loveni, va nga lava nga amukelangiki ntiyiso hikuva a va nga wu rhandzi, va ala ni ku ponisiwa. 11Hikokwalaho, Xikwembu xi va rhumele moya wa ku tixisa lokukulu, leswaku va pfumela leswi swi nga vunwa. 12Ku hela ka swona hileswaku lava nga amukelangiki ntiyiso, va nga lava tsakeleke tindlela leto biha, va ta avanyisiwa.
Mi hlawuleriwe ku ponisiwa
13Swa hi fanela ku nkhensa Xikwembu masiku hinkwawo hikwalaho ka n'wina vamakwerhu, n'wina lava Hosi yi mi rhandzaka, hikuva Xikwembu xi mi hlawurile leswaku mi va lavo rhanga ku ponisiwa, hi Moya lowu wu mi endlaka lava tengeke, ni ku pfumela ka n'wina eka ntiyiso. 14Xikwembu xi mi vitanele swona hi Evhangeli leyi hi mi tiviseke yona, leswaku mi averiwa ku kwetsima ka Hosi ya hina Yesu Kriste. 15Hikokwalaho, vamakwerhu, yimani mi tiya, mi namarhela timhaka leti hi mi dyondziseke tona hi nomo, kumbe hi papila.
16Sweswi ke, ingi Hosi ya hina Yesu Kriste hi xiviri, ni Xikwembu Tata wa hina la hi rhandzeke, la hi nyikeke, hi tintswalo ta yena, ku chavelela loku nga heriki ni ku tshemba lokunene, 17va nga tiyisa timbilu ta n'wina, va mi nyika matimba ya ku endla ni ku vulavula hinkwaswo leswi nga swinene.
