II Samiele 6

₁Davhida a tlhela a hlengeleta tinhenha hinkwato ta Israele, leti a ti ringana 30 000. ₂Kutani a suka a famba ni vavanuna lava hinkwavo ku ya teka Areka ya Xikwembu emutini wa Baale-Yuda, va vuya na yona. Hi yona Areka leyi thyiweke vito ra HOSI ya matimba hinkwawo, Xikwembu lexi tshamaka xiluvelweni ehenhla ka tikerubu. ₃Va tlakula Areka va huma na yona endlwini ya Abinadaba leyi akiweke exitsungeni, va yi veka ehenhla ka golonyi leyintshwa. Vana va Abinadaba Uza na Ahiyo va fambisa golonyi ya kona ₄leyi rhwalaka Areka ya Xikwembu, kutani Ahiyo a rhanga emahlweni ka Areka. ₅Davhida ni Vaisraele hinkwavo va cina hi ku tsaka emahlweni ka HOSI Xikwembu, va ri karhi va chaya swichaya-chayani swa tinxaka-xaka leswi vatliweke hi murhi wa kipresi, va chaya ni switende, ni tiharipa, ni swingomana, va bohile ni marhonge, va bananisa ni swiphambatana swa nsimbhi.

₆Loko va fika exivuyeni xa Nakono, tihavi ti khuguka ti lava ku wisa Areka ya Xikwembu, kutani Uza a hatla a yi khoma. ₇Kan'we-kan'we HOSI Xikwembu xi hlundzukela Uza, xi n'wi ba hikwalaho ka mitlotlotlo ya yena, a fela kwalaho, etlhelo ka Areka. ₈Davhida a khunguvanyeka ngopfu loko a vona hilaha HOSI Xikwembu xi hlundzukeleke Uza hakona, xi n'wi ba. Ndhawu ya kona ni namuntlha ya ha vuriwa Perese-Uza (hileswaku: “Ku-hlundzukeriwa-ka-Uza”).

₉Kutani, hi siku rero, Davhida a khomiwa hi ku chava, a chava HOSI Xikwembu, a ku: “Xana swa fanela leswaku Areka ya Hosi Xikwembu yi amukeriwa laha ka mina xana?” ₁₀Leswi Davhida a a nga ha swi tsakeli ku vuyisa Areka ya HOSI Xikwembu emutini wa yena, a yi hambukisa a ya yi veka emutini wa Obede-Edomu wa Mugiti. ₁₁Areka ya HOSI yi tshama eka Obede-Edomu wa Mugiti tin'hweti tinharhu. Kutani HOSI Xikwembu xi katekisa Obede-Edomu ni va ndyangu wa yena hinkwavo.

₁₂Loko Davhida a twa leswaku HOSI Xikwembu xi katekisile ndyangu wa Obede-Edomu ni swilo swa yena hinkwaswo, hikwalaho ka Areka ya xona, a ya yi teka emutini wa Obede-Edomu, a vuya na yona ekaya ka yena hi ku tsaka lokukulu. ₁₃Loko varhwali va Areka va fambile magoza ya 6, Davhida a tlhava nkuzi ni rhole leri nonisiweke a endla gandzelo ha swona, ₁₄kutani a dzunisa HOSI Xikwembu hi ku cina hi matimba ya yena hinkwawo, a ambele nceka wa ntsembyani lowu vuriwaka “efodi”. ₁₅Davhida ni Vaisraele hinkwavo a va ba minkulungwana, va chaya ni tinanga, loko va ri karhi va ta ni Areka ya HOSI.

₁₆Loko Areka ya HOSI yi nghena emutini wa Davhida, Mikala N'wa-Sawulo a hlometela hi le fasitereni, a vona hosi Davhida ehansi a ri karhi a dzunisa HOSI Xikwembu, hi ku tlula-tlula ni ku cina, kutani a n'wi sola hi mbilu. ₁₇Va fika ni Areka ya HOSI, va yi tikirheta endhawini ya yona, entsongeni lowu Davhida a a wu dzimele ku yi veka kona, kutani Davhida a humesela HOSI Xikwembu magandzelo lama hisiwaka ni ya xinakulobye. ₁₈Loko a hetile ku humesa magandzelo lawa, a kombelela tiko hinkwaro eminkateko ya HOSI ya matimba hinkwawo. ₁₉Kutani a phamela ntshungu hinkwawo wa Vaisraele, va ri vavanuna ni vavasati, un'wana ni un'wana a kuma xinkwa, a tsemeriwa nyama, a kuma ni ximbhundzwa xa mihandzu ya vhinya leyi omisiweke. Kutani va hangalaka hinkwavo va ya emakaya.

₂₀Davhida na yena a muka a ya pfuxelana ni va ndyangu wa yena. Kutani Mikala N'wa-Sawulo a n'wi gega a ku: “Hayi, wena hosi ya Israele, namuntlha u kurisile ngopfu vito ra wena hi ku hluvula u ku tháá, emahlweni ka vanhwanyana lava tirhelaka mahlonga ya wena, wonge hi loko u pfumala dzanu!” ₂₁Kambe Davhida a hlamula Mikala a ku: “Ndzi endlile sweswo ku dzunisa HOSI Xikwembu, hikuva xi ndzi hlawurile ni ku ndzi veka ku va mufambisi wa Israele tiko ra xona; kambe xi tshikile tata wa wena ni ndyangu wa ka n'wina hinkwawo! Ndzi nga ka ndzi nga tshiki ku cina hi ku tsaka, ndzi dzunisa HOSI Xikwembu. ₂₂Ndza ha ta titsongahata ku tlula sweswo, ndzi tivona ndzi nga ri nchumu, kambe eka vanhwana lava u va vulaka, ndzi ta va la xiximekaka swinene!” ₂₃Kutani Mikala N'wa-Sawulo a nga vanga na n'wana, ku kondza a fa.