II Samiele 11

₁Hi nguva ya ximun'wana, wu nga nkarhi lowu tihosi ti toloveleke ku huma nyimpi ha wona, Davhida a rhuma Yowabu ni tindhuna ta yena, ni masocha hinkwawo ya Israele ku ya hlasela Vaamoni, va rhendzela Rhaba ntsindza wa kona. Davhida yena a a sele eYerusalema.

₂Siku rin'wana loko dyambu ri ya eku peleni, Davhida a pfuka eku wiseni, kutani a ya, a ya bela hi moya elwangwini ra yindlu ya le ntsindza. Kuteloko a ri kwale, a vona wansati a ri eku hlambeni. Wansati loyi a a sasekile swinene. ₃Kutani Davhida a rhuma munhu ku ya vutisisa leswaku wansati luya i mani; kutani va n'wi tivisa leswaku i Batixeba N'wa-Eliyama, nkata Uriya wa Muhiti. ₄Hiloko Davhida a rhuma vanhu va ya n'wi vitana; loko a fikile entsindza, Davhida a etlela na yena. Enkarhini wolowo, Batixeba a a ha ku heta ku tibasisa ka yena ka n'hweti. Endzhaku ka sweswo, Batixeba a tlhelela endyangwini wa yena. ₅Batixeba a tika, kutani a rhumela rito eka Davhida, leri nge: “Timhaka ti yime hi ndlela yin'wana!”

₆Kutani Davhida a rhumela rito eka Yowabu, a ku: “Byela Uriya lowa Muhiti leswaku a ta haleno ka mina.” Yowabu a endlisa sweswo. ₇Loko Uriya a fika, Davhida a n'wi vutisa ta ku pfuka ka Yowabu ni masocha, ni ta leswi nyimpi yi fambisaka xiswona. ₈Kutani Davhida a byela Uriya a ku: “Rhelela u ya emutini wa wena, u ya hlamba milenge u wisa.” Uriya a huma endlwini ya hosi; kutani hosi yi sala yi rhumela Uriya enyiko. ₉Kambe Uriya a nga rhelelanga a ya kaya; ú etlele enyangweni ya le ntsindza, a ri ni varindzi hinkwavo va Davhida n'wini wa yena. ₁₀Loko Davhida a twa leswaku Uriya a nga rhelelanga a ya emutini wa yena, a n'wi vitana a ku: “Wa ha ku vuya hi le riendzweni lero leha; hikwalaho ka yini u nga rhelelanga u ya emutini wa wena xana?” ₁₁Kutani Uriya a hlamula Davhida a ku: “Areka ya HOSI Xikwembu, ni vanhu va Israele na Yuda, va tshama emintsongeni; n'wini wa mina Yowabu swin'we ni malandza ya wena n'wini wanga, va govile erivaleni. Xana mina ndzi nga muka, ndzi ya dya ni ku nwa, ni ku etlela ni nsati wa mina, xana? Ndza hlambanya emahlweni ka wena, ndzi ri: Ndzi nge pfuki ndzi endlile mhaka yo fana ni leyi!” ₁₂Kutani Davhida a ku: “Hiswona! U nga ha xwa kwala namuntlha; mundzuku hi kona ndzi nga ta ku tlherisela enyimpini.” Uriya a xwa eYerusalema siku rero, ni leri tlhandlamaka. ₁₃Hi siku ra kona, Davhida a rhamba Uriya ku ya dya ni ku nwa entsindza, a endlela ku n'wi pyopyisa. Kambe hambiswiritano, madyambu ya kona, Uriya a ya andlala sangu ra yena enyangweni, a etlela, a ri ni malandza ya Davhida. A nga rhelelanga a ya emutini wa yena.

₁₄Loko ri xa, Davhida a tsalela Yowabu epapila, a nyika Uriya leswaku a famba na rona. ₁₅Epapileni leri, Davhida a a tsarile marito lawa: “Rhangisani Uriya emahlweni, mi n'wi veka laha nyimpi yi hisaka kona, kutani mi tlhentlhela endzhaku mi n'wi siya a ri yexe, leswaku va ta n'wi tlhava, a fa.” ₁₆Loko Yowabu a ri karhi a rhendzela muti wa Vaamoni, a veka Uriya laha a a tiva leswaku ku ta va ku yimile tinhenha ta Vaamoni. ₁₇Vavanuna va muti va huma, va ya lwa ni masocha ya Yowabu; exikarhi ka Vaisraele, ku dlawa van'wana va malandza ya Davhida; na yena Uriya lowa Muhiti a dlayiwa. ₁₈Kutani Yowabu a rhuma munhu ku ya eka Davhida, a ya n'wi tivisa hinkwaswo leswi humeleleke enyimpini. ₁₉A lerisa murhumiwa loyi, a ku: “Loko u hetile ku vikela hosi marungulo hinkwawo ya nyimpi, ₂₀hosi yi nga tshuka yi hlundzuka, yi ku ka wena: ‘A mi endlela yini ku ya lwa na vona kusuhi ni muti xana? Xana a mi nga swi tivi leswaku va ta mi copa hi miseve, va ri erirhangwini, xana? ₂₁Xana a mi tivi leswaku Abimeleke n'wana Yerubexete ú dlayiwile hi mani, xana? Ú dlayiwile eTebese hi wansati loyi a n'wi hoxeke hi ribye ra ku sila hi le henhla ka rirhangu. A mi endlela yini ku ya fika ekusuhi ni rirhangu xana?’ Loko hosi yi tshuka yi vutisa sweswo, hlamula u ku: ‘Nandza wa wena Uriya lowa Muhiti na yena ú file.’ ”

₂₂Kavaloko murhumiwa a suka a famba, a ya fika entsindza, kutani a vika hinkwaswo leswi Yowabu a n'wi rhumeke ku ya tivisa hosi Davhida swona. ₂₃Murhumiwa a ku ka Davhida: “Vanhu lava va Amoni a va sungula ku hi hlula; a va humile emutini ku ta lwa na hina erivaleni, kambe hi dodombene na vona hi kondza hi ya va fikisa enyangweni ya muti. ₂₄Kutani masocha lama lwaka hi mavurha ni miseve ma hi copa hi le henhla ka rirhangu, hina malandza ya wena, ma dlaya van'wana exikarhi ka malandza ya wena hosi; nandza wa wena Uriya lowa Muhiti na yena va dlele.” ₂₅Hiloko Davhida a ku ka murhumiwa: “Byela Yowabu leswaku mhaka leyi yi nga tshuki yi n'wi karhata. Fumu a ri hlawuli, namuntlha ri tlhava loyi, mundzuku ri tlhava luya ... Byela Yowabu leswaku a tiya, a hlasela muti a wu hirimuxa. U ta n'wi tiyisa hi ndlela yoleyo.”

₂₆Loko Batixeba a twa leswaku nuna wa yena Uriya ú dlayiwile, a rila nkosi. ₂₇Nkosi wa kona wu lo na hela, Davhida a rhuma vanhu ku ya hlomisa Batixeba, a ta va nsati wa yena; kutani Batixeba a velekela Davhida n'wana wa mufana. Mhaka leyi Davhida a yi endleke, a yi bihile emahlweni ka HOSI Xikwembu.