II Samiele 10

₁Endzhaku ka nkarhinyana, Nahaxi hosi ya Vaamoni a fa, kutani n'wana wa yena Hanunu a sala a fuma. ₂Kutani Davhida a ku: “Ndzi ta va nakulobye wo tshembeka eka Hanunu n'wana Nahaxi, hilaha tata wa yena a nga va munhu wo tshembeka eka mina.” Kavaloko Davhida a rhuma malandza ya yena eka Hanunu ku ya n'wi chavelela eku feni ka tata wa yena. Loko varhumiwa va Davhida va fika etikweni ra Vaamoni, ₃vakulukumba va tiko va byela Hanunu n'wini wa vona va ku: “U nga tshuki u anakanya leswaku Davhida ú xixima tata wa wena, hi ku rhumela vachaveleri lava! Vanhu lava i tinhlori leti Davhida a ti rhumeke ku ta xiyaxiya muti wa wena, va ta kota ku ta, va ta wu herisa.” ₄Kavaloko Hanunu a khoma varhumiwa va Davhida, a va byewula malebvu ya tlhelo rin'we ntsena, a tsema ni swiambalo swa vona hi le xisutini, va sala va nga ambalanga nchumu ku ya ehansi, kutani a va hlongola. ₅Loko Davhida a byeriwa timhaka leti, a rhuma vanhu va ya hlanganisa vavanuna lava, hikuva a va ri ni tingana letikulu. Kutani hosi yi va lerisa yi ku: “Tshamani eYeriko ku kondza malebvu ya n'wina ma hluka; hi kona mi nga ta vuya haleno kaya.”

₆Vaamoni va swi vona leswaku va vangile rivengo lerikulu exikarhi ka vona na Davhida; kutani va rhuma vanhu va ya rhamba masocha ya Vasiriya va le Beta-Rehobo ni ya va le Soba, ku huma masocha ya 20 000 lama fambaka hi milenge; va rhamba ni vavanuna va hosi ya le Maaka va 1 000, ni vavanuna va 12 000 va le Tobo. ₇Loko Davhida a twa sweswo, a rhuma Yowabu ni mavuthu hinkwawo ya tinhenha ku ya eku lweni. ₈Vaamoni va huma emutini wa vona, va ya xaxamela emahlweni ka nyangwa va hlomile matlhari. Loko va ri Vasiriya va le Soba na va le Rehobo, swin'we ni vavanuna va Tobo na Maaka, a va yimile hi tlhelo ra vona, erivaleni.

₉Loko Yowabu a vona leswaku nyimpi yi ta hi le mahlweni ni le ndzhaku, a hlawula majaha lama tiyeke exikarhi ka Vaisraele hinkwavo, a ma xaxameta leswaku ma ta lwa ni Vasiriya. ₁₀Kutani masocha laman'wana, a ma veka ehansi ka makwavo Abixayi, a ma xaxameta leswaku ma ta lwa ni Vaamoni. ₁₁Kutani Yowabu a ku ka Abixayi: “Loko Vasiriya va ndzi tsandza, u ta u ta ndzi pfuna; na mina loko Vaamoni va ku tsandza, ndzi ta ta ndzi ta ku pfuna. ₁₂Hikokwalaho, tiya swinene! A hi tikombeni leswaku hi vavanuna, hi lwela tiko ra hina ni miti ya Xikwembu xa hina. HOSI Xikwembu a xi endle ku rhandza ka xona!” ₁₃Kutani Yowabu ni masocha ya yena va tshinela kusuhi ni Vasiriya ku lwa na vona, kambe vona va n'wi tsutsuma. ₁₄Loko Vaamoni va vona leswaku Vasiriya va tsutsumile, na vona va tsutsuma Abixayi, va ya nghena emutini wa vona. Hiloko Yowabu a tshika ku lwa ni Vaamoni, a tlhelela eYerusalema.

₁₅Loko Vasiriya va vona leswaku va hluriwile hi Vaisraele, va hlengeletana endhawini yin'we hinkwavo. ₁₆Kutani Hadadi-Ezere a rhuma vanhu va ya rhamba Vasiriya lava akeke entsungeni wa nambu wa Yufrata, leswaku va huma va ta pfuna. Vasiriya lava va fika emutini wa Helama, va rhangeriwile hi Xobaki, ndhunankulu ya mavuthu ya Hadadi-Ezere. ₁₇Loko Davhida a tivisiwile timhaka leti, a hlengeleta Vaisraele hinkwavo; va pela nambu wa Yordani, va ya fika eHelama. Vasiriya va yimeka, kutani va sungula ku lwa na Davhida. ₁₈Kambe va hatla va tsutsuma va chava Vaisraele. Hiloko Davhida a dlaya vakhandziyi va makalichi ya Vasiriya ya 700, ni vagadi va tihanci va 40 000, a tlhava na Xobaki, ndhunankulu ya mavuthu ya Vasiriya, kutani Xobaki a fela kwalaho. ₁₉Loko tihosi hinkwato leti a ti seketela Hadadi-Ezere ti vona leswaku ti hluriwile hi Vaisraele, ti kombela ku va ni xinakulobye na vona, kutani ti va ehansi ka mfumo wa vona. Ku sukela siku rero, Vasiriya a va ha pfunanga Vaamoni, ni siku ni rin'we.