II Petro 2

₁Khale, vaprofeta va mavunwa na vona va humelele exikarhi ka vanhu, tanihi leswi ku nga ta va ni vadyondzisi va mavunwa exikarhi ka n'wina, lava nga ta nghenisa hi le xihundleni tidyondzo to hambuka leti onhaka; va ta landzula hambi a ri N'wini loyi a va kutsuleke, va tivangela ku lova loku nga ta hatla ku va wela. ₂Vanhu lavo tala va ta landza swa manyala leswi va swi endlaka, naswona ndlela ya ntiyiso yi ta sandziwa hi mhaka ya vona. ₃Kutani, hikwalaho ka makwanga ya vona, va ta mi dyelela hi marito ya vona ya vuxisi. Ku sukela khale, ku avanyisiwa ka vona a ku yimanga, ni ku lova ka vona a ku etlelanga.

₄Xikwembu a xi tsetselelanga tintsumi loko ti dyohile, kambe xi ti cukumetile eTiheleni, ni ku ti nghenisa emakorhweni ya xivandla xa vafi, laha ti pfaleriwaka kona ku fikela siku ra ku avanyisa; ₅a xi tsetselelanga misava ya khale, kambe xi hlayisile Nowa mutwarisi wa leswo lulama, swin'we ni vanhu van'wana va 7, enkarhini lowu xi nga nisa ndhambi emisaveni ya vanhu lava a va nga ri na mhaka na xona; ₆xi endlile leswaku miti ya va Sodoma na Gomora, yi hundzuka nkuma yi avanyiseriwa ku lova, xi yi endla xitsundzuxo eka lava va nga ta ka va nga ri na mhaka na xona. ₇Naswona xi ponisile Lota munhu wo lulama, loko yena a twile ku vava hi mhaka ya swilo swa manyala leswi a swi endliwa hi vanhu lavo biha; ₈hikuva swilo leswi munhu loyi wo lulama a swi voneke ni ku swi twa loko a ri karhi a hanya exikarhi ka vona, swi n'wi karhatile ngopfu emoyeni wa yena lowo lulama masiku hinkwawo, a karhateka hi mhaka ya mahanyelo ya vona layo homboloka. ₉Leswi swi vula leswaku Hosi ya swi tiva ku ponisa vanhu va vukhongeri eku karhatekeni ka vona, ni ku tshika vanhu lavo homboloka va ri eku biweni ku fikela siku ra ku avanyisa, ₁₀ngopfu-ngopfu lava landzaka swa ntumbuluko wa vona wa laha misaveni, va navela ku titsakisa hi swilo swa thyaka, va sandza ni vuhosi bya Xikwembu.

Vanhu lava va titshemba ngopfu, naswona va titiva; a va chavi ku sandza swa le henhla leswi kwetsimeke. ₁₁Kasi tintsumi, hambileswi ti va tlulaka hi vukulu ni matimba, a ti humesi marito ya ku va avanyisa hi ku va sandza emahlweni ka Hosi. ₁₂Kambe vanhu lava va fana ni swivumbiwa swo pfumala miehleketo, swiharhi swa nhova swo tswaleriwa ku khomiwa ni ku dlawa ntsena; va sandza etimhakeni leti va nga tiviki nchumu eka tona, kutani va ta herisiwa hi ku herisiwa loku fanaka ni ka swiharhi. ₁₃Va ta endliwa hi ku biha, hilaha va nga endla swo biha hakona. Va kuma swi va tsakisa vona ku cina mintlangu, va nwa nhlekanhi hinkwawo. I swivati ni swisandzu evanhwini. Naloko va ri na n'wina eminkhubyeni, vona va tsakela ku cina ni ku nwa ngopfu, hi mhaka ya vusopfa bya vona. ₁₄Va ni mahlo lama taleke hi vuoswi, lama nga ni torha ra swidyoho. Va rhiya mimoya leyi nga tiyangiki. Va ni timbilu leti toloveleke makolo. I vanhu lava rhukaniweke hi Xikwembu. ₁₅Va tshikile ndlela leyinene, va landza ntila wa Balaama n'wana Beyori, loyi a rhandzeke bindzu hi ku endla leswo homboloka. ₁₆Kambe ú holoveriwile hikwalaho ka xidyoho xa yena n'wini; mbhongolo leyi nga kotiki ku vulavula yi vulavurile hi rito ro fana ni ra munhu, yi sivela muprofeta eku hlanyeni ka yena.

₁₇Vanhu lava i swihlovo swo pfumala mati; i hunguva leyi fambisiwaka hi bubutsa; munyama lowukulu ngopfu wu va languterile. ₁₈Va tlakusa rito ni ku tidzunisa ngopfu hi swilo swa hava; hi ku navela loko biha ka swa manyala swa laha misaveni, va phasa vanhu lava va ha ku ponaka emavokweni ya valahleki. ₁₉Va va tshembisa ku ntshunxeka, kambe vona hi voxe i mahlonga ya leswi bolaka; hikuva munhu i hlonga ra xilo xihi na xihi lexi xi n'wi hlulaka. ₂₀Hikuva, loko vanhu va pona thyaka ra misava hi ku tiva Hosi ya hina ni Muponisi Yesu Kriste, kutani va tlhela va phasiwa ni ku hluriwa hi swona, xiyimo xa vona xo hetelela xi bihile ku tlula lexo sungula. ₂₁A swi ta va swi antswile eka vona loko va nga tivanga ndlela ya ku lulama, ku ri na loko va yi tivile kutani va tlhelela ndzhaku va tshika nawu lowo hlawuleka lowu va nyikiweke wona. ₂₂Swi va humelele hilaha xivuriso xa ntiyiso xi vuleke hakona, loko xi te: “Mbyana yi vuyela emahlanteni ya yona.” Naswona: “Nguluve, loko yi hlantswiwile, yi tlhela yi puluvundza endzhopeni!”