II Vamakabiya 14

₁Endzhaku ka malembe manharhu, Yudasi ni masocha ya yena va twa leswaku Demetriyo n'wana Seluko ú fikile hi tingalava ni mavuthu yo tala ehlalukweni ra Tripoli, ₂ni leswaku ú dlayile Antiyoko Yupatoro na Lisiya muhlayisi wa yena, a teka tiko ra kona a ri fuma.

₃A ku ri ni wanuna un'wana loyi a va ku i Alkimo, loyi khale a a vile Muprista lonkulu, a ri karhi a tinyamisa hi ku hanya Xigriki loko Vayuda va pfukerile Antiyoko Epifani. Sweswi hi ku vona leswaku a ku nga ha ri na ndlela yo tiponisa kumbe yo vekiwa nakambe a va Muprista lonkulu, ₄a ya eka hosi Demetriyo hi lembe ra 151. Kutani a fika eka yena, a n'wi nyika harhi ya nsuku ni ncindzu, naswona a n'wi nyika marhavi ya mitlhwari lama humesiweke hi vagandzeri va le Tempeleni hilaha swi lerisiweke hakona. Alkimo a nga boxanga makungu ya yena siku rolero, ₅kutani a kuma nkarhi wa ku yisa emahlweni makungu ya yena ya rihuhe loko Demetriyo a n'wi rhamba eka nhlengeletano ya vatsundzuxi va yena, kutani a n'wi vutisa leswi Vayuda va lavaka ku endla swona.

Alkimo a hlamula a ku: ₆“Vayuda lava vuriwaka Vahasadiya, lava va rhangeriwaka hi Yudasi Makabiya, va rhandza nyimpi ni ku vanga madzolonga, kutani va nga ka va nga pfumeli leswaku tiko ri va ni ku rhula. ₇Hikwalaho ka vona ndzi susiwile eka xiyimo xa ku va Muprista lonkulu, yi nga ndzhaka leyi vatata wa mina a va ndzi averile yona. Kutani ndzi ta eka wena hosi, ₈xo sungula hikuva ndzi lava ku seketela leswi swi ku tsakisaka, tlhandlakambirhi hikuva ndzi lava ku endlela varikwerhu leswinene. Hikwalaho ka maendlele ya vuphukuphuku ya Yudasi ni Vahasadiya, varikwerhu hikwavo va le khombyeni. ₉We hosi, loko u kambisisile vuxokoxoko bya timhaka leti, endla leswaku tiko ra ka hina ni varikwerhu lava nga eku xanisekeni, va ponisiwa hi musa ni ku hanana ka wena, swi nga leswi u swi kombisaka vanhu hikwavo. ₁₀Loko Yudasi a ha hanya, mfumo wa wena wu nga ka wu nga kumi ku rhula ni siku ni rin'we.”

₁₁Loko Alkimo a heta ku vulavula, vanghana van'wana va hosi va hatlisa va hlohlotela Demetriyo leswaku a hlundzukela Yudasi, loyi na vona a va n'wi venga. ₁₂Xikan'we Demetriyo a veka Nikanoro murhangeri wa mavuthu ya yena ya tindlopfu ku va murhangeri wa Yudiya, kutani a n'wi rhumela ₁₃ku ya dlaya Yudasi, ni ku hangalasa vanghana va yena, ni ku veka Alkimo ku va Muprista lonkulu wa Tempele leyi tlulaka titempele tin'wana hinkwato emisaveni. ₁₄Kavaloko vamatiko hinkwavo lava tshamaka eYudiya, lava a va balekile Yudasi, va ya hlengeletana na Nikanoro, hikuva a va ehleketa leswaku mahlomulo ni makhombo lama welaka Vayuda ma ta hundzuka minkateko eka vona.

₁₅Loko Vayuda va twa leswaku Nikanoro a ta ku ta va hlasela ni leswaku vamatiko va hlengeletanile na yena, va ticheletela ritshuri etinhlokweni, va khongela Xikwembu lexi a xi va hlawurile ku va vanhu va xona hilaha ku nga heriki, lexi a xi humelela minkarhi hinkwayo ku va pfuna eku pfumaleni ka vona. ₁₆Hi ku landza xileriso xa Yudasi, Vayuda va hatlisa va ya hlasela valala va vona kusuhi ni ximutana xa Desawu. ₁₇Simoni makwavo wa Yudasi a ya lwa na Nikanoro, kambe a sungula ku hluriwa, hikuva valala a va n'wi hlaserile hi xitshuketa. ₁₈Kambe loko Nikanoro a twa ta xivindzi xa Yudasi ni masocha ya yena ni ta vunhenha lebyi va lwelaka tiko ra ka vona ha byona, a kungela ku herisa nyimpi leyi handle ko lwa. ₁₉Kutani a rhumela Posidoniya na Teyodoto na Matatiya ku ya endla xinakulobye na Vayuda.

₂₀Loko timhaka hinkwato ta ntwanano ti amukeriwile, Nikanoro a ya ti tivisa masocha ya yena, kutani ma nkhensa hinkwawo. ₂₁Kavaloko Yudasi na Nikanoro va tivekela siku ro hlangana va ri voxe. Switshamu leswi humaka emixaxeni ya Vayuda ni ya Nikanoro swi tisiwa ni ku lunghisiwa endhawini ya nhlengeletano. ₂₂Yudasi a veka masocha yo hloma matlhari etindhawini to hambana hambana, leswaku ma tshama ma tilunghisile ku sivela valala loko va ta hlasela Vayuda xikan'we hi vuxisi. Kambe Yudasi na Nikanoro va endla nhlengeletano hi ku rhula ni xinakulobye, va twanana. ₂₃Endzhaku ka swona, Nikanoro a ya tshama eYerusalema nkarhinyana. A nga xanisi Vayuda nikutsongo, kambe a hlongola vanhu lava va n'wi seketeleke. ₂₄Kavaloko Yudasi na Nikanoro va hundzuka vanghana lavakulu, kutani Yudasi a ya tshama na Nikanoro minkarhi hinkwayo. ₂₅Nikanoro a khongotela Yudasi ku teka nsati ni ku sungula ndyangu. Hikokwalaho Yudasi a endla tano, kutani a ya tshama ekaya hi ku rhula.

₂₆Loko Alkimo a vona xinakulobye lexi a xi ri kona exikarhi ka Nikanoro na Yudasi, a kuma tsalwa ra ntwanano lowu va wu endleke, kutani a ya na rona eka Demetriyo. Alkimo a byela Demetriyo leswaku Nikanoro a nga ha tshembeki, hikuva ú hlawurile muxengi Yudasi ku va murhangeri ematshan'wini ya yena. ₂₇Demetriyo a kariha swinene loko a twa ku lumbeta loku ka mavunwa, kutani a tivisa Nikanoro hi papila leswaku ntwanano lowu a wu endleke ni Vayuda a nga wu tsakeli, kutani a n'wi lerisa ku khoma Yudasi ni ku n'wi rhumela hi ku hatlisa emutini wa Antiyoka a ri mubohiwa.

₂₈Loko Nikanoro a hlaya xileriso lexi a khunguvanyeka ngopfu, hikuva a a fanele ku tshova ntwanano na Yudasi, hambiloko Yudasi a nga hoxanga nchumu. ₂₉Hileswi a a nga swi koti ku kaneta xileriso xa hosi, a langutela nkarhi wa ku khoma Yudasi hi mano. ₃₀Kambe Yudasi a vona leswaku Nikanoro ú sungurile ku hundzuka munhu wo nonon'hwa ni ku tshika ku n'wi komba xichavo loko a hlangana na yena, kutani a ehleketa leswaku a a ri ni mano ya ku n'wi endlela leswo biha. Hikokwalaho, Yudasi a hlengeleta vanghana va yena lavo tala, a ya tumbela.

₃₁Loko Nikanoro a vona leswaku Yudasi ú n'wi pyisile mano, a ya nghena eTempeleni leyikulu leyo hlawuleka loko vaprista va ri karhi va humesa magandzelo, kutani a va lerisa ku n'wi nyiketa Yudasi. ₃₂Kambe vaprista va hlambanya leswaku a va tivi lomu Yudasi a tumbeleke kona. ₃₃Kutani Nikanoro a tlakusa voko ra yena ra xinene a komba Xivandla lexo hlawuleka, a hlambanya a ku: “Loko mi nga ndzi nyiketi Yudasi a va mubohiwa, ndzi ta mbundzumuxa yindlu leyi ya Xikwembu ni ku hindzimuxa alitari leyi, kutani ndzi ta aka kona tempele yo saseka swinene ya Diyonisiyo.” ₃₄Kutani a suka kwalaho. Xikan'we vaprista va tlakusela mavoko ya vona ehenhla, va khongela Xikwembu lexi a xi sirhelela vanhu va ka vona minkarhi hinkwayo va ku: ₃₅“We N'wini wa hinkwaswo, a wu pfumali nchumu, kambe u tsakile ku aka Tempele ya wena kwala ni ku tshama exikarhi ka hina. ₃₆Hi wena ntsena wo kwetsima, kutani sirhelela Tempele leyi yi nga hlawulekisiwa ku nga ri khale, leswaku yi nga tshuki yi nyamisiwa hilaha ku nga heriki.”

₃₇Un'wana wa vakulukumba va Yerusalema loyi a va ku i Razisi, a hehliwa eka Nikanoro. Razisi a a ri munhu loyi a pfuneke varikwavo hi tindlela to hambana-hambana, kutani va n'wi fundzha ngopfu, hikokwalaho a a tiveka tanihi “Tata wa Vayuda”. ₃₈Loko Vayuda va sungurile ku pfukela Antiyoko Epifani, Razisi a a nyiketile vutomi bya yena ku hanya Xiyuda, kutani a a vekiwile nandzu hikwalaho ka ku tshembeka ka yena. ₃₉Nikanoro a a lava ku komba leswaku ú venga Vayuda ngopfu, kutani a rhumela masocha ya yena lama lavaka ku tlula 500 ku ya khoma Razisi, ₄₀hikuva a a ehleketa leswaku loko a n'wi khoma a famba na yena, ú ta herisa matimba ya Vayuda. ₄₁Kakuloko masocha ya Nikanoro ma ri kusuhi ni ku teka xihondzo lexi Razisi a a tumbela kona, ma ri karhi ma tshova tinyangwa ta xivava xa xona ni xileriso xa ku hisa timbanti ta xihondzo xi nyikiwile, Razisi a vona leswaku ú rhendzeriwile ni leswaku a nge poni, kutani a ringeta ku tidlaya hi banga ra yena, ₄₂a hlawula ku fa hi ndlela yo fundzheka ku ri ni ku tsongahatiwa hi vahomboloki.

₄₃Kambe exikarhi ka mpfilumpfilu lowu a wu ri kona, Razisi a tihupa, kutani a nga tidlayi. Loko masocha ma ri karhi ma nghena lomu a a ri kona, hi vunhenha a tsutsuma a ya ehenhla ka khumbi ra xihondzo, a jitama, a tihoxa hansi exikarhi ka vanhu lava a va ri kona. ₄₄Kambe vanhu va kona va tlhelela endzhaku, kutani Razisi a wela laha a ku ri hava munhu kona. ₄₅Leswi a a ha hanya hi xixinya lexikulu, a suka a yima, ngati yi karhi yi huma swinene etimbangeni leti chavisaka ta yena, a tsutsuma hi le xikarhi ka masocha lawa, a ya yima ehenhla ka ribye lero leha. ₄₆Enkarhini lowu, ngati hinkwayo a yi humile emirini wa yena, hiloko a tikakatlula marhumbu ekhwirini ra yena hi mavoko, a ma hoxa exikarhi ka masocha ya Nikanoro, a ri karhi a khongela N'wini wa vutomi ni moya ku n'wi tlherisela swona. Razisi a fa hi ndlela leyi.