II Tihosi 4

₁Siku rin'wana, wansati loyi a a tekiwile hi un'wana wa vadyondzisiwa va vaprofeta, a ta ni xirilo eka Elixa, a ku: “Nuna wa mina loyi a a ri nandza wa wena, ú file. Wa n'wi tiva leswaku a a ri munhu loyi a a chava HOSI Xikwembu; hina a hi lombiwile mali, kambe n'wini wa yona ú tile a ta teka majaha ya mina mambirhi, a ma endla mahlonga ya yena.” ₂Elixa a n'wi vutisa a ku: “Xana ndzi nga ku pfuna ha yini xana? Ndzi byele: Xana u sele na yini le kaya xana?” Wansati a hlamula a ku: “Mina nandza wa wena, a ndza ha ri na nchumu ekaya, ehandle ka xikhudzanyana xa mafurha.” ₃Elixa a ku ka wansati: “Rhendzeleka hi vaakelani va wena hinkwavo, u famba u lomba swibya leswi nga riki na nchumu, u vuya na swo swi tele. ₄Kutani u nghena endlwini, u tipfalela kona ni vana va wena, u chululela mafurha eswibyeni sweswo hinkwaswo. Loko xibya xi tele, xi veke tlhelo.” ₅Wansati a suka, a ya tipfalela endlwini na vana va yena. A chulula mafurha, vana va ri karhi va kangatela swibya. ₆Loko swibya swi tele, wansati a ku ka un'wana wa vana: “Tisa xin'wana!” N'wana a ku: “A ka ha ri na xin'wana”, kutani mafurha ma nga ha pfeleli. ₇Wansati a ya tivisa munhu wa Xikwembu leswi humeleleke, kutani Elixa a ku: “Famba u ya xavisa mafurha lawa, kutani u riha milandzu ya wena. Mali leyi nga ta sala, yi ta hlayisa wena ni vana va wena.”

₈Siku rin'wana, Elixa a hundza hi le mutini wa Xuneme, laha a ku tshama wansati wa mufumi. Wansati loyi a rhamba Elixa ku ya dya swakudya eka vona. Ku sukela siku rero, minkarhi hinkwayo loko Elixa a tshuka a hundzile hi le Xuneme, a a nghena eka vanhu lava, a dya swakudya kona. ₉Siku rin'wana, wansati loyi a ku ka nuna wa yena: “Vona, ndza swi tiva leswaku wanuna loyi a toloveleke ku hundza hi haleno ka hina, i munhu wo hlawuleka wa Xikwembu. ₁₀A hi n'wi lulamiseleni xikamarana xa xithezi, hi nghenisa sangu ni tafula ni xitshamu ni rivoni, leswaku a ta hamba a wisa kona, masiku hinkwawo loko a hi endzela.”

₁₁Siku rin'wana, Elixa a ta fika, kutani, a khandziya a ya ekamarini ra kona, a ya wisa. ₁₂Kutani a lerisa nandza wa yena Gehazi a ku: “Wa nga vitana wansati loyi wa Muxuneme.” Gehazi a ya n'wi vitana, kutani wansati a fika a yima emahlweni ka nandza. ₁₃Elixa a ku ka Gehazi: “N'wi vutise leswaku hi nga n'wi pfuna ha yini, leswi a tikarhateke ngopfu hi ku hi tirhela. Xana hi nga n'wi vulavulela entsindza, kumbe emahlweni ka mufambisi wa mavuthu, xana?” Kambe wansati a ala, a ku: “E-e, ndzi le maxakeni, ndzi tshamisekile.” ₁₄Elixa a ku: “Loko swi ri tano, hi nga n'wi pfuna ha yini ke?” Gehazi a hlamula a ku: “Vusiwana bya yena hileswaku a nga na n'wana, naswona nuna wa yena ú dyuharile.” ₁₅Elixa a lerisa a ku: “N'wi byele a nghena.” Gehazi a engeta a ya vitana wansati, kutani yena a fika a yima enyangweni. ₁₆Elixa a ku ka yena: “Haxawu, hi nkarhi lowu, loko u ntshunxekile, u ta va u xingile n'wana wa mufana.” Kutani wansati a kaneta a ku: “A hi swona, wena munhu wa Xikwembu n'wini wanga; ndzi nandza wa wena, u nga ndzi byeli vunwa.” ₁₇Hambiswiritano wansati a tika, kutani hi nkarhi wa ku ntshunxeka ka yena loku vuriweke, a kuma n'wana wa mufana, hilaha Elixa a n'wi tshembiseke hakona.

₁₈Loko n'wana a kurile, a huma kaya siku rin'wana a ya vona tata wa yena eku tshoveleni. ₁₉Kambe o tshuka a keta, a ku ka tata wa yena: “Yo! Nhloko ya minoo! Nhloko ya minoo!” Kavaloko tata wa yena a lerisa nandza a ku: “Tlakula n'wana, u n'wi yisa eka mana wa yena.” ₂₀Nandza a endlisa sweswo. N'wana a tshama a xingiwile hi mana wa yena ku fikela ninhlekanhi, kutani a fa. ₂₁Hiloko wansati a khandziya a ya ekamarini, a ya lata n'wana emasangwini ya munhu wa Xikwembu, kutani a huma, a pfala rivanti. ₂₂Kutani a rhumela rito eka nuna wa yena, leri nge: “Wa nga rhuma un'wana wa malandza, a ta ni mbhongolo yin'we ya ntswele; ndzi lava ku ya eka munhu wa Xikwembu hi ku hatlisa; ndza vuya sweswi.” ₂₃Nuna a hlamula a ku: “U boha ha yini ku ya eka yena namuntlha xana? A hi siku ra ku tshama ka n'weti namuntlha, naswona a hi ra Savata.” Wansati a hlamula a ku: “A ku na xo karhata!” ₂₄Kutani a bohelela xitshamu embhongolweni a gada, a lerisa nandza wa yena a ku: “Hatlisisa mbhongolo, na wena u kahlula. U nga yimi endleleni, ndzi nga si ku byela.” ₂₅Hiloko va suka, va ya fika eka Elixa, munhu wa Xikwembu, entshaveni ya Karmele.

Loko Elixa a n'wi vona a ha ri kulenyana, a ku ka Gehazi nandza wa yena: “Wansati wa Muxuneme hi luyaa! ₂₆Hatlisa, u ya n'wi hlanganisa, u n'wi vutisa loko va ha pfukile, yena, ni nuna wa yena, ni n'wana wa yena.” Wansati a xewetana na Gehazi, kutani a ku: “Hi pfukile.” ₂₇Kambe loko a fikile entshaveni, eka munhu wa Xikwembu, a nkhinsama a khoma milenge ya Elixa. Gehazi a a tela ku ta n'wi kokela tlhelo, kambe munhu wa Xikwembu a ku ka Gehazi: “N'wi tshike, hikuva ú le ku karhatekeni lokukulu loku ndzi nga ku tiviki, hikuva HOSI Xikwembu xi ndzi fihlele mhaka leyi.” ₂₈Wansati a ku ka Elixa: “Wena n'wini wanga, xana n'wana loyi a ndzi lo n'wi kombela ke? A ndzi vulanga xana, ndzi ku u nga ndzi byeli vunwa ke?” ₂₉Kavaloko Elixa a lerisa Gehazi, a ku: “Tikhame, u teka nhonga ya mina ya vuprofeta, u kahlula. Loko u tshuka u hlangana ni munhu endleleni, u nga n'wi xeweti; niloko munhu a ku xeweta, u nga hlamuli. Kutani u ya tlhandleka nhonga ya mina exikandzeni xa n'wana.” ₃₀Kambe mana wa n'wana a ku: “Ndza tiyisa emahlweni ka HOSI Xikwembu lexi hanyaka ni le mahlweni ka wena, ndzi ri: Ndzi nga ka ndzi nga sali.” Hiloko Elixa na yena a suka, a landza loyi wansati.

₃₁Gehazi a a rhangile emahlweni, a ya tlhandleka nhonga ya muprofeta exikandzeni xa n'wana. Kambe n'wana a nga vulavuli, a nga tshuka-tshuki. Kutani Gehazi a tlhela a ya hlanganisa Elixa endleleni, a n'wi byela a ku: “N'wana a nga sisimuki.” ₃₂Loko Elixa a fika emutini, a kuma leswaku n'wana ú file, ni leswaku va n'wi latile esangwini. ₃₃Kavaloko a nghena endlwini, a tipfalela ekamarini swin'we ni n'wana, a khongela HOSI Xikwembu. ₃₄Kutani a pavalala ehenhla ka n'wana, a n'wi khumba; a hlanganisa nomo wa yena ni wa n'wana, a n'wi langutisa, a khomanisa swandla swa yena ni swa n'wana. Loko a ha pavalarise sweswo, miri wa n'wana wu sungula ku kufumela. ₃₅Kutani Elixa a ololoka, a famba-famba kwala kamarini, a tlhela a ya pavalala kambe ehenhla ka n'wana; hiloko n'wana a entshemula ka 7, kutani a hanyanya. ₃₆Elixa a lerisa Gehazi, a ku: “Wa nga vitana wansati loyi wa Muxuneme.” Gehazi a n'wi vitana. Loko wansati a nghena, Elixa a ku ka yena: “Tlakula n'wana wa wena u famba na yena.” ₃₇Wansati a wela emilengeni ya Elixa, a korhamela ehansi, kutani a tlakula n'wana wa yena, a huma na yena.

₃₈Loko Elixa a tlhelela eGiligala, a ku ri ni dyandza etikweni. Siku rin'wana, vadyondzisiwa va vaprofeta a va tshamile emahlweni ka yena, kutani Elixa a lerisa nandza wa yena, a ku: “Tseleka mbita leyikulu, u swekela vadyondzisiwa va vaprofeta lava exixevo xa matsavu.” ₃₉Un'wana wa vaprofeta a ya enhoveni a ya kha matsavu; a ya kuma ximila xo nava onge i xiyakayani, a kha marhanga ya xona, a tata xiambalo xa yena. Loko a vuyile, a tsemelela marhanga ya kona, a ma chela embiteni ya xixevo, a nga tivi leswaku i swilo muni. ₄₀Vavanuna va phameriwa, kambe loko va ringeta ku dya xixevo lexi, va huwelela va ku: “Ehee! We munhu wa Xikwembu, leswi nga la mbiteni swa dlaya!” Kutani va tshika ku dya. ₄₁Kutani Elixa a ku: “Loko swi ri tano, tisani mapa.” A chela mapa embiteni, kutani a lerisa a ku: “Phamelani vanhu, va dya.” Swa le mbiteni a swi nga ha bavi.

₄₂Wanuna un'wana a ta a huma emutini wa Baala-Xalixa, a tisela munhu wa Xikwembu swinkwa swa 20 swa maxalana, ni minchocho ya koroni ya nguva leyintshwa, a swi rhwele hi nkwama wa yena. Elixa a lerisa, a ku: “Nyikani vanhu va dya.” ₄₃Kambe nandza wa yena a hlamula a ku: “Xana ndzi nga phamerisa ku yini vavanuna va dzana hi swakudyanyana leswi ke?” Hiloko Elixa a engeta a ku: “Phamelani vanhu lava, va dya, hikuva HOSI Xikwembu xi vurisa sweswo xi ri: ‘Va ta dya, swi tlhela swi sala.’ ” ₄₄Kutani a va phamela. Va dya, swi tlhela swi sala, hilaha HOSI Xikwembu xi vuleke hakona.