II Vakorinto 2

₁Hikokwalaho ndzi tibohile leswaku a ndzi nga ti eka n'wina ndzi tisa timhaka leti ti mi vavisaka timbilu, ₂hikuva loko ndzi mi tlhava timbilu, i vamani lava nga ta ndzi susa gome loko va nga ri volavo ndzi va tlhaveke timbilu xana? ₃Leyi hi yona mhaka leyi endleke leswaku ndzi mi tsalela: Hileswaku loko ndzi fikile, ndzi nga tlhaviwi mbilu hi vanhu lava a va ta fanela ku ndzi tsakisa; hikuva ndza mi tshemba hinkwenu; ndzi tiva leswaku loko ndzi tsakile, na n'wina hinkwenu mi tsakile. ₄Ndzi mi tsalerile, ndzi ri karhi ndzi twa ku vava ngopfu, hi mbilu leyi karhatekaka swinene, ni mihloti leyo tala; a ku nga ri ku mi tlhava timbilu, kambe a ku ri ku endlela leswaku mi tiva rirhandzu lerikulu ngopfu leri ndzi mi rhandzaka ha rona.

₅Loko ku ri na loyi a vangeke leswi tlhavaka timbilu, a nga tlhavanga mina, kambe hi tlhelo rin'wana, ndzi nga ku (hambiloko ndzi nga lavi ku swi kurisa ngopfu): Ú tlhavile n'wina hinkwenu. ₆Leswi munhu wo tano a nga layiwa hi lavo tala va n'wina hi ndlela leyi, swi ringene; ₇sweswi a mi ta fanela ku n'wi rivalela, mi n'wi chavelela, leswaku a nga hluriwi hi gome ku tlula mpimo. ₈Hikokwalaho, ndza mi khongotela leswaku mi tlhela mi n'wi komba rirhandzu. ₉Hikuva loko ndzi mi tsalerile papila, a ku ri ku mi ringa, ni ku vona loko mi ndzi yingisa eka swilo hinkwaswo. ₁₀Munhu un'wana ni un'wana loyi mi n'wi rivalelaka, ndza n'wi rivalela na mina; hikuva lexi ndzi nga xi rivalela, loko kunene ndzi rivalele xidyoho xin'wana, ndzi swi endlele n'wina, emahlweni ka Kriste, ₁₁leswaku Sathana a nga tshuki a hi hlula hi mano, hikuva hi tiva makungu ya yena.

₁₂Loko ndzi fikile eTrowasi ku twarisa kona Mahungu Lamanene ya Kriste, yena ú ndzi pfulerile nyangwa yo tirha ntirho wa yena. ₁₃Kambe a ndzi nga ntshunxekanga emoyeni, hikuva Tito makwerhu a ndzi n'wi kumanga; hikokwalaho, ndzi va lerile, kutani ndzi hundzela eMakedoniya.

₁₄Kambe a ku nkhensiwe Xikwembu lexi eka Kriste xi hi yisaka eku khaneni, minkarhi hinkwayo; kutani hi ku tirhisa hina, xi hangalasa hinkwako ku nun'hwela loku nandzihaka ka ku tiva Kriste. ₁₅Hikuva hi hina hi nga ku nun'hwela loku nandzihaka ka Kriste hi byakwe, loku hangalakaka hi vito ra Xikwembu exikarhi ka lava ponisiwaka ni ka lava lovaka; ₁₆eka lava lovaka i risema ra rifu; kambe eka lava ponisiwaka, i ku nun'hwela ka vutomi. Xana i mani loyi a faneriwaka hi ntirho hinkwawo lowu ke? ₁₇Hikuva a hi fani ni lavo tala, lava endlaka bindzu lero biha hi Rito ra Xikwembu; kambe hi vulavula kukotisa vanhu va timbilu leto tenga, kukota lava rhumiweke hi Xikwembu; hi vulavula emahlweni ka Xikwembu hi ri va ka Kriste.