Ta Davhida loko a baleka Sawulo
1Davhida a ya fika eka muprista Ahimeleke, emutini wa Nobo. Ahimeleke a hlanganisa Davhida a ri karhi a rhurhumela, kutani a n'wi vutisa a ku: “Swi lo yini u ngo ta u ri wexe, u nga ri na munhu ke?” 2Davhida a hlamula muprista Ahimeleke, a ku: “Hosi Sawulo ú ndzi rhwexile ntirho wun'wana, a ku ka mina: ‘Ku nga tshuki ku va na munhu ni un'we la tivaka ntirho lowu ndzi ku rhwexaka wona ku ya wu endla!’ Loko ma ri masocha ya mina, ndzi twananile na wona leswaku ndzi ta ma kuma endhawini yo karhi. 3Xana u ni swakudya muni sweswi, leswi nga kusuhi xana? Ndzi nyike ntlhanu wa swinkwa, kumbe swakudya swihi ni swihi leswi u nga na swona kwala.” 4Muprista a hlamula Davhida a ku: “Lexi ndzi nga na xona kusuhi i xinkwa lexo hlawuleka xa magandzelo; xo dyiwa hi mani na mani ndzi hava. Ndzi nga ku nyika xa magandzelo loko ku ri leswaku masocha ya wena a ma hlangananga ni vavasati.” 5Davhida a hlamula muprista a ku: “Ndza tiyisa leswaku a hi hlangananga ni vavasati; hi wona nawu loko ndzi huma nyimpi ni masocha ya mina; hambiloko hi teka riendzo leritsongo, masocha ya mina ni swilo swa wona swi tshama swi hlawulekile; xana leswi namuntlha ri nga riendzo lerikulu, swi nga va swi nga hlawulekanga ha yini xana?” 6Leswi a ku ri hava xin'wana xinkwa, muprista a nyika Davhida xinkwa xa mhamba lexo hlawuleka, lexi a xi susiwile etafuleni ra le mahlweni ka HOSI Xikwembu, ku vekeriwa lexa ha ku swekiwaka.
7Hi siku leri, un'wana wa malandza ya Sawulo a a ri kona, a khomeletiwile hi ku humesela HOSI Xikwembu emagandzelo. Vito ra yena a a ri Duwege wa le Edomu, mulanguteri wa varisi va Sawulo.
8Davhida a vutisa Ahimeleke a ku: “Xana a wu na tlhari kumbe banga kwala mutini xana? Ndzi siyile banga ni switlhavana swa mina loko hi suka, hikuva ntirho wa hosi a wu fanele ku endliwa hi xihatla.” 9Kutani muprista a hlamula a ku: “Laha ku ni banga ra Goliyadi, Mufilista loyi u nga n'wi dlaya eka Nkova-wa-Nkuhlu, ri le ndzhaku ka swiambalo swa vaprista, ri phutseriwile hi nceka; loko u ri lava ri teke, hikuva a ku na rin'wana kwala, hi rona ntsena.” Kwalaho Davhida a ku: “Ndzi nyikete rona, hikuva ku hava leri fanaka na rona.”
10Hi siku rero, Davhida a ya emahlweni ni ku baleka Sawulo, a ya fika eka Akixi hosi ya le Gati. 11Malandza ya Akixi ma ku ka yena: “Xana loyi a hi Davhida hosi ya tiko ra Israele, yena loyi a va n'wi khanela, va ri karhi va yimbelela swin'we, va ku:
“ ‘Sawulo ú dlele magidi ya vanhu,
Davhida ú dlele va magidi-gidi!’ xana?”
12Marito lawa ma tshukisa Davhida swinene, kutani a sungula ku chava ngopfu Akixi hosi ya le Gati. 13Hikokwalaho Davhida a tihundzula mahanyelo loko a ri emahlweni ka vona; na loko va n'wi khomile, a tiendla wonge ú ni rihuhe. A halahala timbanti ta le nyangweni, a tshika ni marha ma xiririka hi le malebvini. 14Akixi a ku ka malandza ya yena: “Mi n'wi tisela yini eka mina munhu loyi; xana a mi swi voni leswaku ú ni rihuhe xana? 15Xana mi lo twa leswaku ndzi pfumala tinhlanyi, leswi mi ndzi tiselaka munhu loyi, a ta hlanyela laha mahlweni ka mina xana? Swona mi ri munhu wo tani a nga nghena endlwini ya mina xana?”
