I Samiele 17

₁Vafilista va tilulamisela ku lwa, kutani va hlengeleta mavuthu ya vona emutini wa Soko etikweni ra Yuda, va ya dzima mixaxa ya vona exikarhi ka Soko na Azeka, endhawini leyi vuriwaka Efese-Damimi. ₂Sawulo ni vavanuna va Israele na vona va hlengeletana, va ya dzima mixaxa eka Nkova-wa-Nkuhlu, va tilulamisela ku lwa ni Vafilista. ₃Vafilista a va jamelanile ni Vaisraele, va hambanyisiwa hi nkova.

₄Kutani wanuna wa xihontlovila la vuriwaka Goliyadi, wa le Gati, a huma emixaxeni ya Vafilista. Wanuna loyi a a lehile ku lava ku ringana timitara tinharhu. ₅A a ambele xihuku xa koporo enhlokweni, a tisirhelele xifuva hi mahakatimba ya nsimbhi; ku tika ka xisirhelelo xexo a ku lava ku ringana 60 kg. ₆A a bohile swisirhelelo swa koporo emilengeni, a hakarile tlhari leritsongo emakatleni. ₇Mphiselo wa tlhari ra yena lerikulu a wu ringana ni musi wo kandza hi ku kula ka wona; nhloko ya tlhari ra kona a yi ri ya nsimbhi yo tika ku tlula 7 kg. A a rhangeriwa hi munhu loyi a n'wi rhwalelaka xitlhangu. ₈Goliyadi a yima a huwelela a byela mavuthu ya Vaisraele a ku: “He n'wina! Hikwalaho ka yini mi huma nyimpi mi tilulamisele ku lwa na mina xana? Xana mina a ndzi Mufilista xana, n'wina mahlonga ndzin'wina ya Sawulo? Tihlawuleleni wanuna, a rhelela a ta enkoveni haleno ka mina. ₉Loko o kota ku lwa na mina a ndzi dlaya, hi ta hundzuka mahlonga ya n'wina. Kambe loko mina ndzi n'wi hlula ndzi n'wi dlaya, n'wina mi ta hundzuka mahlonga ya hina, mi hi tirhela.” ₁₀Mufilista a engeta a ku: “Namuntlha ndzi pfuka mavuthu ya Israele. Humesani wanuna la nga lwaka na mina!” ₁₁Loko Sawulo ni Vaisraele hinkwavo va twa marito lawa ya Mufilista, va khomiwa hi ku chava lokukulu va rhurhumela.

₁₂Davhida a a ri n'wana Yese, munhu wa yindlu ya Efrata loyi a a tshama eBetlehema, etikweni ra Yuda. Yese a a ri ni vana va majaha va 8. Enkarhini wa ku fuma ka Sawulo, a a ri nkulukumba, naswona a a tiveka swinene evanhwini. ₁₃Majaha manharhu ya Yese lamakulu a ma fambile na Sawulo enyimpini. Eka majaha lawa, a ku ri na Eliyabu lowa mativula, na Abinadaba la n'wi tlhandlamaka, na Xama lowa vunharhu. ₁₄Davhida a a ri lontsongo eka vona. Loko lavanharhu va yile enyimpini na Sawulo, ₁₅Davhida a a pfa a suka eka Sawulo, a ya eBetlehema ku ya risa tinyimpfu ta tata wa yena. ₁₆Hi masiku ya 40, mpundzu ni madyambu, Goliyadi a a humelerisa sweswo, a yima emahlweni ka Vaisraele.

₁₇Siku rin'wana Yese a lerisa Davhida n'wana wa yena, a ku: “Hatlisa u teka xinkwamana lexi xa tindzhoho leti oxiweke, ni swinkwa leswi swa khume, u yisela vamakwenu emixaxeni. ₁₈U ta teka ni khume ra magadi ya masi, u ya nyika ndhunankulu ya mavuthu ya vona. U ta rungurisana ni vamakwenu, kutani u vuya u tamele xanchumu lexi nga ta hi khorwisa leswaku u yile u ya fika le va nga kona. ₁₉U ta kuma Sawulo, ni vamakwenu, ni Vaisraele hinkwavo, endhawini leyi vuriwaka Nkova-wa-Nkuhlu, laha va nga eku lweni ni Vafilista.”

₂₀Davhida a pfuka nimpundzu swinene, a siya tinyimpfu na murisi un'wana, kutani a teka timbuva to ya nyika vamakwavo, a khoma ndlela, hilaha Yese a n'wi leriseke hakona. Loko a fika emixaxeni, a hlangana ni mavuthu ma hlomile ma ya erivaleni laha ku lweriwaka kona, ma ri karhi ma yimbelela tinsimu ta nyimpi. ₂₁Mavuthu ya Vaisraele ni ya Vafilista ma yimeka, ma jamelanile. ₂₂Davhida a rhula ndzhwalo wa yena, a wu siya emavokweni ya muhlayisi wa tinhundzu, kutani a tsutsumela erivaleni ra nyimpi, a fika a pfuxela vamakwavo. ₂₃Loko a ha vulavula na vona, xihontlovila lexa Mufilista lexi vuriwaka Goliyadi wa le Gati, xi huma eka mavuthu ya Vafilista xi hlomile matlhari, xi rhuketela tanihi masiku, Davhida a ri karhi a swi twa.

₂₄Loko vavanuna va Israele va vona Goliyadi, hinkwavo va n'wi tsutsuma hi ku chava. ₂₅Kutani va byelana va ku: “Xana ma n'wi vona munhu loyi a taka a hlomile, a ta pfuka Israele, xana? Loyi a nga ta n'wi dlaya, hosi Sawulo ú ta n'wi nyika rifuwo lerikulu, a tlhela a n'wi nyika n'wana wa yena a va nsati wa yena, tlhandlakambirhi va ka vona va ta tshama va ntshunxekile etikweni ra Israele.” ₂₆Davhida a vutisa lava a va yimile kwalaho, a ku: “Va ri, ú ta nyikiwa yini munhu la nga ta dlaya Mufilista loyi, a kutsula Israele endzhukanweni lowu, xana? Swona o va mani Mufilista loyi wo ka a nga yimbanga, leswi a pfukaka mavuthu ya Xikwembu lexi hanyaka, xana?” ₂₇Vanhu va hlamusela Davhida mhaka ya kona, ni hinkwaswo leswi nga ta nyikiwa munhu loyi a nga ta dlaya Goliyadi.

₂₈Loko Eliyabu a twa ndzisana ya yena Davhida a ri karhi a vutisa vanhu lava, a n'wi karihela swinene, a ku: “U tele yini haleno xana? Ntlhambinyana lowa tinyimpfu wu sele na mani le nhoveni xana? Ndza ku tiva, u na xikulela wena, ni makungu ya wena layo biha ndza ma tiva: Wena u lo tela ku ta vona nyimpi haleno ntsena!” ₂₉Davhida a hlamula a ku: “Ndzi hoxile yini ke? Xana a ndzi fanelanga ku vutisa na nchumu xana?” ₃₀Hikokwalaho Davhida a suka a siya Eliyabu, a ya vutisa van'wana vanhu, kambe hinkwavo va n'wi byela swo fana.

₃₁Loko van'wana va twa marito ya Davhida, va ya vikela Sawulo, kutani Sawulo a lerisa leswaku Davhida a tisiwa ka yena. ₃₂Kutani Davhida a ku ka Sawulo: “Ku nga vi na loyi a chavaka hikwalaho ka Mufilista loyi; mina nandza wa wena, ndzi ta ya lwa na yena.” ₃₃Sawulo a hlamula Davhida a ku: “Wena wa ha ri mufana! U nga lwisa ku yini ni wanuna loyi wa Mufilista, la lweke tinyimpi ku sukela evutsongwaneni bya yena, xana?” ₃₄Kambe Davhida a ku ka Sawulo: “Mina nandza wa wena, ndzi murisi wa tinyimpfu ta tatana. Loko nghala kumbe xinkankanka xo tshuka xi tile xi ta khoma xinyimpfana entlhambini, ₃₅ndzo xi hlongorisa ndzi ba, ndzi vutla xinyimpfana enon'weni wa xona. Kambe loko xiharhi xa kona xo ndzi mpfhumpfhela, ndzi xi khoma hi malebvu, ndzi xi ba xi fa. ₃₆Mina ndzi nandza wa wena; ndzi dlayile tinghala ni swinkankanka. Kutani ndzi ta endla swo tano eka Mufilista loyi wo ka a nga yimbanga, hikuva ú pfuka mavuthu ya Xikwembu lexi hanyaka.” ₃₇Davhida a engeta a ku: “HOSI Xikwembu lexi ndzi poniseke emin'waleni ya tinghala ni ya swinkankanka, xi ta ndzi ponisa emavokweni ya Mufilista loyi!” Hiloko Sawulo a ku ka Davhida: “Hiswona, famba, HOSI Xikwembu a xi ve na wena!” ₃₈Kutani Sawulo a ambexa Davhida tinguvu ta yena ta nyimpi, a n'wi tlhandleka xihuku xa koporo enhlokweni, a tlhela a n'wi ambexa xisirhelelo xa nsimbhi xa le xifuveni. ₃₉Sawulo a heta hi ku n'wi khweketa banga ra yena etingubyeni leti ta nyimpi, kutani Davhida a ringeta ku tlakusa milenge, kambe swi n'wi tsandza, hikuva a a nga tolovelanga ku ambarisa sweswo. Kutani Davhida a ku ka Sawulo: “Ndza tsandzeka ku famba hi swiambalo leswi, hikuva a ndzi swi tolovelanga.” Kutani a hluvula hinkwaswo, ₄₀a teka nhonga ya yena, a hlawula ntlhanu wa maribye layo tshwulungeka exinkobyaneni, a ma hoxa exinkwamaneni xa yena xa vurisi, kutani a ya a kongomile Goliyadi a ri ni xipelupelu.

₄₁Mufilista na yena a ya a kongomile Davhida; emahlweni ka yena a ku rhangile munhu loyi a n'wi rhwalelaka xitlhangu. ₄₂Mufilista a tlakusa mahlo, a langutisisa Davhida, kutani a n'wi sola, hikuva Davhida a a ha ri jaha, mbhuri ya xiyimo xo saseka. ₄₃Kutani Mufilista a ku ka Davhida: “Xana ndzo va mbyana, leswi u ndzi telaka hi minkhavi xana?” Kutani a n'wi hlambanyela hi swikwembu swa ka vona. ₄₄Goliyadi a engeta a ku: “Tshinela kwala ndzi nga kona. Ndzi ta cukumeta ntsumbu wa wena kule, wu dyiwa hi makoti ni swivandzana!” ₄₅Davhida a hlamula Mufilista a ku: “U ndzi tela u khomile banga, ni tlhari lerikulu, ni leritsongo, kambe mina ndzi ta eka wena hi vito ra HOSI ya matimba hinkwawo, Xikwembu xa mavuthu ya Israele lawa u ma pfukeke. ₄₆Namuntlha HOSI Xikwembu xi ta ku nyiketa emavokweni ya mina. Ndzi ta ku ba, u wela hansi, kutani ndzi ta tsema nhloko ya wena. Namuntlha ndzi ta nyiketa mintsumbu ya mavuthu ya Vafilista eka makoti ni swivandzana. Hikona misava hinkwayo yi nga ta tiva leswaku, etikweni ra Israele, Xikwembu xi kona! ₄₇Naswona vanhu lava hlengeletaneke laha, va ta swi tiva leswaku HOSI Xikwembu a xi kali xi lava banga kumbe tlhari ku lamulela tiko ra xona. HOSI Xikwembu xi ta mi nyiketa emavokweni ya hina, hikuva enyimpini leyi, xi yima na hina.”

₄₈Kavaloko Mufilista a ta, a tshinela kusuhi na Davhida ku ta lwa na yena. Kutani Davhida a hatlisa a tsutsumela erivaleni ra nyimpi ku ya lwa na Goliyadi. ₄₉A nghenisa voko exinkwamaneni, a teka ribye, a ri hoxa hi xipelupelu, a ba Mufilista emombyeni, ribye ri nghena, kutani Mufilista a wela hansi hi mombo.

₅₀Hi ndlela leyi, Davhida a hlula Mufilista: Ú lo n'wi ba hi ribye ra xipelupelu, a n'wi dlaya a nga tamelanga fumu. ₅₁Kutani Davhida a tsutsumela laha Mufilista a nga wela kona, a fika a hlomula banga ra Mufilista enkotlotweni wa rona, a n'wi hetisa ha rona, a n'wi tsema ni nhloko. Loko Vafilista va vona leswaku nhenha ya vona yi dlayiwile, va suka va tsutsuma. ₅₂Vavanuna va Israele ni va Yuda va suka va ri karhi va huwelela, va hlongorisa Vafilista, va ya va tlhelela kusuhi na le Gayi, ni le nyangweni ya le Ekroni. Mintsumbu ya Vafilista a yi lo n'wálálálá, ku sukela eXarayimi, ku fikela eGati na le Ekroni. ₅₃Loko Vaisraele va vuya hi le ku hlongoriseni, va nghenela mixaxa ya Vafilista, va phangha. ₅₄Kutani Davhida a rhwala nhloko ya Mufilista, a yi yisa eYerusalema, kambe loko ma ri matlhari ya xihontlovila lexi, a ya ma veka ekaya ka yena.

₅₅Loko Sawulo a vona Davhida a huma a ya lwa ni Mufilista, a vutisa Abinere ndhunankulu ya mavuthu, a ku: “Ndzi byele Abinere, xana jaha leri i n'wana mani xana?” Abinere a hlamula a ku: “Ndzi vula ndzi tiyisile, we hosi, a ndzi n'wi tivi.” ₅₆Kutani hosi Sawulo a lerisa Abinere a ku: “Ringeta ku vutisisa leswaku i jaha ra ka mani, leri ra mbhuri.” ₅₇Kutani loko Davhida a vuya eku dlayeni ka Mufilista, Abinere a n'wi teka a ya na yena eka Sawulo, Davhida a famba a rhwarile nhloko ya Goliyadi. ₅₈Sawulo a n'wi vutisa a ku: “He jaha, xana u n'wana mani xana?” Davhida a hlamula a ku: “Ndzi n'wana wa nandza wa wena Yese, wa le Betlehema.”