I Vamakabiya 9

₁Loko Demetriyo a twa leswaku Nikanoro ni mavuthu ya yena va dlayiwile enyimpini, a tlhela a rhumela Bakidi na Alkimo etikweni ra Yudiya swin'we ni mavuthu man'wana ya yena lama toloveleke ku lwa etlhelweni ra xinene enyimpini. ₂Va famba hi ndlela leyi yaka eGiligala, kutani va fika va rhendzela muti wa Mesaloto etikweni ra Aribela, va wu teka, va dlaya vaaki lavo tala va wona. ₃Hi n'hweti yo sungula ya lembe ra 152, va dzima mixaxa ya vona ku langutana na Yerusalema; ₄kavaloko va suka kwalaho va ya eBerea va ri na masocha ya 20 000 yo famba hi milenge ni vagadi va 2 000 va tihanci.

₅Yudasi a dzima mixaxa ya yena kusuhi ni muti wa Elasa. Kun'we na yena a ku ri na tinhenha ta 3 000 leti tivaka ku lwa nyimpi. ₆Loko ti vona ku tala ka mavuthu ya valala, ti tsemeka nhlana, kutani leto tala ti nyenga, ku fikela laha leti nga sala a ti nga tluli 800. ₇Loko Yudasi a vona leswaku masocha ya yena ma nyengile ni leswaku nkarhi wa ku lwa wu le kusuhi, a hela mbilu, hikuva a pfumale nkarhi wo va hlengeleta. ₈Hambileswi a a hela matimba, a ku eka lava a va sele na yena: “A hi yimeni, hi tilulamisela ku lwa ni valala va hina, kumbexana hi nga va hlula.”

₉Kambe lava a va ri na yena va ringeta ku n'wi alela va ku: “Hi nge swi koti. A hi tiponiseni sweswi, hi ta vuya nakambe ni vamakwerhu ku ta lwa na vona; a hi talanga ku ringana.”

₁₀Yudasi a va hlamula a ku: “A swi ve kule na hina ku baleka. Loko nkarhi wa hina wu fikile, a hi feleni varikwerhu hi vunhenha, hi nga tshuki hi onha ndhuma ya hina!”

₁₁Kavaloko mavuthu ya Bakidi ma huma emixaxeni ya wona, ma tilulamisela ku lwa. Vagadi va tihanci a va avanyisiwe hi mintlawa mimbirhi. Vahoxi va swipelupelu ni vacopi va miseve a va ri emahlweni ka masocha man'wana, na tona tinhenha leti tivaka ku lwa a ti rhangela emahlweni. ₁₂Bakidi a a ri hi tlhelo ra xinene ra mavuthu. Masocha ya milenge ma ya emahlweni hi ku yimba tinanga, ma ri exikarhi ka mintlawa mimbirhi ya vagadi va tihanci. Vavanuna lava a va ri na Yudasi na vona va yimba tinanga. ₁₃Misava yi tsekatseka hi mpfumawulo wa mavuthu, kutani nyimpi yi lwiwa ku sukela nimpundzu ri kala ri pela.

₁₄Loko Yudasi a vona leswaku Bakidi ni masocha ya yena layo tala a ma ri etlhelweni ra xinene ra nyimpi, a kongomela kona, kutani tinhenha ta yena hinkwato ti n'wi landza. ₁₅Va hlula Vaasiriya lava nga tlhelweni leri, va va hlongorisa ku ya fika entshaveni ya Azoto. ₁₆Loko masocha ya Bakidi lama lwaka etlhelweni ra ximatsi ya mavuthu ya yena ma vona leswaku lama lwaka etlhelweni ra xinene ma hluriwile, ma hundzuluka ma landzelela Yudasi ni masocha ya yena. ₁₇Nyimpi yi ya yi hisa ngopfu, kutani Vayuda na Vaasiriya vo tala va dlayiwa. ₁₈Yudasi na yena a dlayiwa, kutani lavan'wana va yena va baleka. ₁₉Kavaloko Yonatani na Simoni va teka makwavo Yudasi, va ya n'wi lahla esirheni ra vatata wa vona eModeni, ₂₀va n'wi rila kona. Vaisraele hinkwavo va n'wi endlela nkosi, va n'wi rila masiku layo tala, va ku: ₂₁“Swa hlamarisa! Nhenha ni muponisi wa Israele ú dlayiwile!”

₂₂Mintirho yin'wana ya Yudasi, ni tinyimpi ta yena, ni swiendlo swa yena swa vunhenha, ni ta vukulukumba bya yena, a swi tsariwanga hinkwaswo, hikuva swi tele ngopfu.

₂₃Endzhaku ka ku fa ka Yudasi, vahomboloki ni vanhu va tihanyi va humelela hinkwako-nkwako etikweni ra Yudiya. ₂₄Enkarhini wolowo ku wa ndlala leyikulu, kutani Vayuda hinkwavo va tihlanganisa ni vahomboloki ku yima ni valala. ₂₅Bakidi a veka van'wana va vahomboloki lava ku fuma Yudiya. ₂₆Vona va hlota vanghana va Yudasi, va va khoma, va va tisa eka Bakidi loyi a nga va xanisa ni ku va khomisa tingana. ₂₇Hi ndlela leyi ku humelela nhlomulo lowukulu etikweni ra Israele. Nhlomulo lowo tano a wu nga si vonaka etikweni hi mpfhuka wa loko vaprofeta va nyamalarile exikarhi ka Vaisraele.

₂₈Kavaloko vanghana hinkwavo va Yudasi va hlengeletana, kutani va fika va ku eka Yonatani: ₂₉“Ku sukela siku ra ku fa ka makwenu Yudasi ku fikela namuntlha, hi pfumala un'wana wo fana na yena loyi a nga hi rhangelaka loko hi lwa ni valala va hina, kumbe loko hi lwa na Bakidi ni va ka hina lava va hi vengaka. ₃₀Kutani namuntlha ha ku hlawula leswaku u teka ndhawu ya Yudasi, u sala u hi fuma ni ku hi rhangela enyimpini.” ₃₁Enkarhini lowu, Yonatani a amukela vurhangeri, kutani a sala a fuma ematshan'wini ya makwavo Yudasi.

₃₂Loko Bakidi a twa mhaka leyi, a boha makungu ku ya dlaya Yonatani. ₃₃Kambe Yonatani ni makwavo Simoni kun'we ni hinkwavo lava a va ri na vona va twa ta makungu lawa, kutani va tsutsumela emananga ya Tekowa, va gova hi tlhelo ra xidziva xa Asifara. ₃₄Bakidi a kuma mhaka leyi hi siku ra Savata, kutani a pela nambu wa Yordani swin'we ni mavuthu hinkwavo ya yena. ₃₅Yonatani a rhumela makwavo Yohane loyi a a ri mulanguteri wa mavuthu ya Vayuda, leswaku a ya kombela vanghana va vona Vanabatiya ku va hlayisela tinhundzu, hikuva a ti tele ngopfu. ₃₆Kambe Vayambri lava humaka eMideba va khoma Yohane ni hinkwaswo leswi a a ri na swona, va famba na swona. ₃₇Endzhaku ka sweswo, Yonatani ni makwavo Simoni, va vikeriwa leswi nge: “Vayambri va ni nkhuvo wa vukati, lavo tala va vona va huma eNadabata va heleketa nhlomi, n'wana wa yin'wana ya tinganakana ta Kanana.” ₃₈Yonatani na Simoni va tsundzuka ku dlayiwa ka makwavo Yohane, kutani va ya va tumbelela entshaveni. ₃₉Va rindzela, kutani va vona ntshungu wa vanhu lava a va ba huwa ya ku tsaka, va famba va rhwele leswo tala ngopfu. Muteki ni tinxangwana ta yena ni vamakwavo a va ri karhi va huma ku ya hlanganisa lava heleketaka nhlomi, va ri ni vatlangi va swichayachayana ni swingomana, va hlome ni matlhari layo tala. ₄₀Vayuda va huma laha a va bvutamela Vayambri kona, va sungula ku va dlayetela, va lovisa lavo tala. Lava saleke va tsutsumela etintshaveni. Vayuda va phangha hinkwaswo swa vona va famba na swona. ₄₁Hi ndlela yoleyo, nkhuvo wa vukati wu hundzuka xirilo, ni tinsimu ta ntsako ta Vayambri ti hundzuka tinsimu ta nkosi. ₄₂Kute loko Yonatani na Simoni va rihiserile rifu ra makwavo Yohane hi xitalo, va tlhelela emakorhweni ya nambu wa Yordani.

₄₃Loko Bakidi a twa leswi Yonatani na Simoni va endleke swona, a fika hi siku ra Savata ni mavuthu layo tala eribuweni ra Yordani. ₄₄Kavaloko Yonatani a ku eka lava a a ri na vona: “Yimani, a hi lweleni vutomi bya hina, hikuva namuntlha matshamele ya hina ma tlula layo sungula hi ku biha. ₄₅Vonani, valala va le mahlweni ka hina, endzhaku ka hina ku ni nambu wa Yordani, kutani hi tlhelo leri ni leriya ku ni makorho ni swihlahla, ku ri hava laha hi nga tsutsumelaka kona. ₄₆A hi khongeleni leswaku Xikwembu xi hi ponisa emavokweni ya valala va hina.”

₄₇Kavaloko nyimpi yi sungula, kutani Yonatani a tshambuluta voko ra yena ku dlaya Bakidi, kambe Bakidi a baleka a ya yima endzhaku ka mavuthu ya yena. ₄₈Kutani Yonatani ni vavanuna lava a a ri na vona, va tlulela enambyeni wa Yordani, va hlambela va khupukela entsungeni wa wona, kambe valala a va pelanga nambu ku va hlasela. ₄₉Kutani hi siku rero Bakidi a lahlekeriwa hi masocha ya kwalomu ka 1 000.

₅₀Endzhaku ka sweswo, Bakidi a tlhelela eYerusalema, a aka makhokholo eYudiya, a tiyisa miti ya Yeriko, na Emawusi, na Beta-Horoni, na Betele, na Timinata, na Faratoni, na Tefoni, a rhendzela miti ya kona hi rirhangu lero leha ni tinyangwa leti gogiwaka. ₅₁Emitini leyi Bakidi a veka masocha ya yena leswaku ma ta xanisa Vayuda. ₅₂A tiyisa ni miti ya Beta-Suru, na Gazara, ni khokholo ra Yerusalema, kutani a veka kona masocha ni swakudya swo tala. ₅₃A pfalela ni vana va xinuna va vakulukumba va Yudiya va va xikhomelelo ekhokholweni ra Yerusalema.

₅₄Hi n'hweti ya vumbirhi ya lembe ra 153, Alkimo a lerisa leswaku khumbi ra xivava xa le ndzeni ka Xivandla lexo hlawuleka ri mbundzuxiwa. Hi ku endla sweswo, a a lava ku onha ntirho wa vaprofeta. ₅₅Loko ntirho lowu a wa ha ku sunguriwa, Alkimo a khomiwa hi vuvabyi, kutani hinkwaswo swi yimisiwa. Alkimo a oma swirho a tsandzeka ni ku pfula nomu, a nga ha koti ku vulavula hambi ku ri ku nyika ndyangu wa yena swileriso. ₅₆Kutani Alkimo a fa nkarhi wolowo hi ku xaniseka lokukulu. ₅₇Loko Bakidi a vona leswaku Alkimo ú file, a tlhelela eka hosi Demetriyo, kutani tiko ra Yudiya ri va ni ku rhula malembe mambirhi.

₅₈Kutani vahomboloki hinkwavo va kungela va ku: “Vonani, Yonatani ni vanhu va yena va tshama hi ku rhula, va nga vileli hi nchumu. A hi vuyiseni Bakidi, ú ta va khometela hinkwavo hi vusiku byin'we.” ₅₉Hiloko va suka va ya vulavurisana na Bakidi. ₆₀Kutani Bakidi a ta ni mavuthu layo tala, a rhumela mapapila exihundleni eka vaseketeri va yena va le Yudiya, a va lerisa ku khoma Yonatani ni masocha ya yena; kambe va tsandzeka ku swi endla, hikuva makungu ya vona a ma vile ma tiveka. ₆₁Masocha ya Yonatani ma khoma vavanuna va Vayuda va 50 lava a va ri varhangeri eka xikungu lexi, va va dlaya. ₆₂Kutani Yonatani ni masocha ya yena kun'we na Simoni va suka va ya emutini wa Beta-Basi emananga, va pfuxa marhumbi ya wona, va wu akelela. ₆₃Loko Bakidi a twa timhaka leti, a hlengeleta mavuthu ya yena hinkwawo, a tivisa ni vaseketeri va yena eYudiya. ₆₄A ya gova eBeta-Basi, a dzima mixaxa ya yena kona, a lwa ni vaaki va muti masiku layo tala, a aka ni swifaya-makhumbi. ₆₅Kambe Yonatani a siya makwavo Simoni eBeta-Basi, yena a huma a ya etikweni a ri ni masocha ma nga ri mangani ntsena. ₆₆A hlasela Odomera ni vamakwavo swin'we ni Vafarisoni emixaxeni ya vona, a va hlula. Loko vanhu lava va hluriwile va hlangana na Yonatani va famba na yena ku ya hlasela Bakidi. ₆₇Hi nkarhi lowo Simoni ni masocha ya yena va huma emutini wa Beta-Basi va hisa swifaya-makhumbi. ₆₈Va lwa na Bakidi, kutani va n'wi hlula. Bakidi a karhateka ngopfu, hikuva makungu ni ku lwa ka yena a swi wile hansi. ₆₉A hlundzukela vahomboloki lava nga n'wi tsundzuxa ku ta etikweni ra Yudiya, kutani a dlaya lavo tala va vona. Endzhaku ka sweswo, a kungela ku tlhelela etikweni ra rikwavo.

₇₀Loko Yonatani a swi twa, a hlawula varhumiwa vo ya ka Bakidi ku endla xinakulobye na yena ni ku kombela leswaku vabohiwa va ntshunxiwa. ₇₁Bakidi a pfumela, a endla hilaha a komberiweke hakona; kutani a hlambanyela Yonatani leswaku a nga ka a nga n'wi xanisi enkarhini hinkwawo wa ku hanya ya yena. ₇₂A n'wi ntshunxela vabohiwa lava a a va khomile etikweni ra Yudiya, kutani a tlhelela etikweni ra rikwavo. A nga ha vuyanga nakambe etikweni ra Vayuda. ₇₃Hi ndlela leyi, nyimpi yi hela etikweni ra Israele. Yonatani a aka eMikimaxa, a sungula ku avanyisa vanhu ni ku herisa vahomboloki etikweni ra Israele.