I Tihosi 12

₁Rhobuwamu a ya eXikeme, hikuva Vaisraele hinkwavo a va hlengeletanile kona ku ya n'wi veka a va hosi. ₂Yerobuwamu n'wana Nebati a twa timhaka leti a ri le Egipta, lomu a a balekele kona hi ku chava hosi Solomoni (Yerobuwamu a a akile kwale Egipta). ₃Ku rhumiwa vanhu va ya n'wi vitana, kutani Yerobuwamu swin'we ni nhlengeletano hinkwayo ya Vaisraele, va ta ku ta vulavula na Rhobuwamu, va ku ka yena: ₄“Tata wa wena ú tikisile mpingu wa hina. Hikokwalaho, hunguta sweswi mintirho yo nonon'hwa leyi tata wa wena a nga hi boha ha yona, u vevukisa ni mpingu wo tika lowu a nga hi rhwexa wona, kutani hina hi ta ku tirhela.” ₅Rhobuwamu a va hlamula a ku: “Hangalakani, kutani mi ta tlhela mi vuya hi siku ra vunharhu.” Kavaloko vanhu va hangalaka.

₆Hosi Rhobuwamu a ya kombela ku tsundzuxiwa eka vakulukumba lava a va nghena huvo loko tata wa yena Solomoni a ha hanya. A va vutisa a ku: “Ndzi tsundzuxeni, xana vanhu lava, ndzi nga va hlamurisa ku yini ke?” ₇Kutani va n'wi tsundzuxa va ku: “Loko u lava ku pfuna vanhu lava namuntlha ni ku va tirhela, va hlamule hi marito ya tintswalo, kutani na vona va ta ku tirhela masiku hinkwawo.” ₈Kambe Rhobuwamu a bakanya leswi vakulukumba lava va n'wi tsundzuxeke swona, kutani a ya kanela mhaka ni tintangha ta yena, ma nga majaha lama nghenaka huvo ya yena. ₉Kutani a va vutisa a ku: “N'wina ke, xana xitsundzuxo xa n'wina hi xihi ke? Xana vanhu lava, hi nga va hlamurisa ku yini, leswi va kombelaka ku vevukiseriwa mpingu lowu tata wa mina a nga va rhwexa wona, ke?” ₁₀Tintangha leti ta Rhobuwamu ti n'wi hlamula ti ku: “Vanhu vala va vula leswaku tata wa wena ú tikisile mpingu wa vona, kutani va kombela leswaku wena u va vevukisela wona. Hiswona, wena u ta va hlamurisa leswi u ku: ‘Xintihwana xa mina xi bumburile ku tlula xisuti xa tatana. ₁₁Tatana ú mi rhwexile mpingu lowo tika, kambe sweswi mina ndzi ta wu engetelela; tatana ú mi xupurile hi nkhavi wunene, kambe mina ndzi ta mi ba hi nkhavi wa mitwa.’ ”

₁₂Hi siku ra vunharhu, Yerobuwamu ni tiko hinkwaro va tlhelela eka Rhobuwamu, hi ku ya hi xileriso xa hosi xa leswaku va fanele ku vuya hi siku rolero. ₁₃Hosi yi hlamula tiko hi marito ya tihanyi, yi bakanya xitsundzuxo lexi vakulukumba va yi nyikeke xona. ₁₄Kutani yi vulavula ni tiko hi ku landza xitsundzuxo xa majaha, yi ku: “Tatana ú tikisile mpingu wa n'wina, kambe mina ndzi ta wu engetelela; tatana ú mi xupurile hi nkhavi wunene, kambe mina ndzi ta mi ba hi nkhavi wa mitwa.” ₁₅Hi ndlela leyi, hosi Rhobuwamu a nga yingisanga tiko. A ku ri ku rhandza ka HOSI Xikwembu leswaku timhaka ti fambisa xileswi: A xi lava ku hetisisa marito ya xona lawa xi ma fikiseke eka Yerobuwamu n'wana Nebati, hi nomo wa Ahiya wa le Xilo.

₁₆Loko Vaisraele hinkwavo va vona leswaku hosi Rhobuwamu a nga lavi ku va yingisa, va n'wi hlamula va ku:

₁₈Hiloko hosi Rhobuwamu a rhumela Adonirama mufambisi wa mintirho ya xibalo eka Vaisraele, kambe hinkwavo va n'wi khandla hi maribye, a fa. Kavaloko hosi Rhobuwamu a hatla a khandziya kalichi ra yena, a tsutsumela eYerusalema. ₁₉Ku fikela siku ra namuntlha, Vaisraele va ha fularhele rixaka ra Davhida. ₂₀Loko Vaisraele hinkwavo va twa leswaku Yerobuwamu ú vuyile, va rhuma vanhu va ya n'wi vitana leswaku a ta enhlengeletanweni, kutani va n'wi veka hosi ya Vaisraele hinkwavo. A ku vanga na lava seketeleke rixaka ra Davhida, loko ku nga ri va nyimba ya Yuda ntsena.

₂₁Loko Rhobuwamu a fika eYerusalema, a vitana vavanuna hinkwavo va ka Yuda ni va nyimba ya Benjamini, a humesa nyimpi ya tinhenha ta 180 000. Rhobuwamu n'wana Solomoni a a lava ku ya lwa ni Vaisraele va le n'walungwini, leswaku a ta va vuyisela ehansi ka mfumo wa yena. ₂₂Kambe rito ra Xikwembu ri fika eka Xemaya munhu wa Xikwembu, ri ku: ₂₃“Byela Rhobuwamu n'wana Solomoni hosi ya Yuda, u byela ni hinkwavo va ka Yuda ni va nyimba ya Benjamini, swin'we ni Vaisraele lava saleke exikarhi ka vona, ₂₄leswaku mina HOSI ndzi ni rito eka vona leri nge: ‘Mi nga tshuki mi hloma matlhari, mi ya lwa ni va ka n'wina, va nga Vaisraele-kuloni. Tlheriselani wanuna un'wana ni un'wana ekaya ka yena, hikuva mhaka leyi yi humelele hi ku rhandza ka mina.’ ” Kutani va yingisa rito ra HOSI Xikwembu, va tlhelela emakaya, hilaha xi va leriseke hakona.

₂₅Kutani Yerobuwamu a pfuxa rirhangu ra Xikeme emagangeni ya tiko ra Efrayimi, a tshamanyana kona; kutani a rhurha kwalaho, a ya pfuxa rirhangu ra Penuwele. ₂₆Kavaloko Yerobuwamu a tiehleketa a ku: “Leswi timhaka ti nga yima hi ndlela leyi, vuhosi byi nga tshuka byi tlhelela erixakeni ra Davhida. ₂₇Loko vanhu lava va tlhandlukela eYerusalema ku ya humesa magandzelo endlwini ya HOSI Xikwembu, va nga tshuka va vuyelelana ni n'wini wa vona Rhobuwamu hosi ya Yuda; kwalaho va nga ndzi dlaya, siku va tlhelelaka eka Rhobuwamu hosi ya le Yuda.” ₂₈Loko hosi yi tianakanyile, yi vumba marhole mambirhi hi nsuku. Kutani yi ku ka vanhu va yona: “I khale mi ri karhi mi tlhandlukela eYerusalema ku ya gandzela kona. Hi leswi swikwembu swa wena we Israele, leswi swi ku humeseke etikweni ra Egipta!” ₂₉Kutani a yimisa rhole rin'wana eBetele, lerin'wana a ri veka eDani. ₃₀Mhaka leyi yi dyohisa tiko, hikuva nkarhi wun'wana a va ya gandzela rhole ra le Betele, nkarhi wun'wana va ya gandzela ra le Dani.

₃₁Tlhandlakambirhi, Yerobuwamu a aka tindlu eswitsungeni leswo hlawuleka, a hlawula vaprista exikarhi ka vanhu van'wana ni van'wana, hambi va nga ri Valevhi. ₃₂Kutani Yerobuwamu a veka siku ra vu-15 ra n'hweti ya vu-8, leswaku ri va ra nkhuvo lembe rin'wana ni rin'wana, ematshan'wini ya nkhuvo lowu a wu endliwa eYuda, wo hisa magandzelo ehenhla ka alitari. A endlisa sweswo eBetele hi ku hisa magandzelo, a hisela marhole mambirhi lawa a ma vumbeke. Naswona a veka vaprista eBetele, eswitsungeni leswo hlawuleka leswi a swi lulamiseke. ₃₃Hi siku ra vu-15 ra n'hweti ya vu-8, wu nga nkarhi lowu a nga lo tihlawulela wona hi yexe, a tlhandlukela alitarini leyi a yi akeke eBetele; a a rhambile nkhuvo wa vanhu va Israele, kutani a tlhandlukela alitarini a ya hisa magandzelo kona.