I Tikronika 15

₁Davhida a tiakela tindlu emutini lowu thyiweke vito ra yena, a lulamisa ni ndhawu ya ku veka eka yona Areka ya Xikwembu, a yi dzimela ni ntsonga. ₂Kutani Davhida a ku: “Areka ya Xikwembu a yi nga rhwariwi hi vanhu van'wana loko va nga ri Valevhi ntsena, hikuva HOSI Xikwembu xi hlawurile vona ku rhwala Areka ya xona, va tlhela va xi tirhela hilaha ku nga heriki.” ₃Kutani Davhida a hlengeleta Vaisraele hinkwavo eYerusalema leswaku va heleketa Areka ya HOSI endhawini leyi yi nga lunghiseriwa yona. ₄Davhida a hlengeleta vaprista va ka Aroni, a vitana ni Valevhi lava: ₅Exikarhi ka va ka Kohata, ku huma Yuriele murhangeri, a ta ni varikwavo va 120. ₆Exikarhi ka va ka Merari, ku huma Asaya murhangeri, a ta ni varikwavo va 220. ₇Exikarhi ka va ka Gerixomu, ku huma Yuwele murhangeri, a ta ni varikwavo va 130. ₈Exikarhi ka va ka Elisafani, ku huma Xemaya murhangeri, a ta ni varikwavo va 200. ₉Exikarhi ka va ka Hebroni, ku huma Eliele, a ta ni varikwavo va 80. ₁₀Exikarhi ka va ka Uziele, ku huma Aminadaba murhangeri, a ta ni varikwavo va 112.

₁₁Kutani Davhida a vitana vaprista Sadoki na Abiyatara, a vitana ni Valevhi lava: Yuriele, na Asaya, na Yuwele, na Xemaya, na Eliele, na Aminadaba. ₁₂Kutani a ku ka vona: “Hi n'wina tinhloko ta miti ya va ka Levhi: Tibasiseni n'wina ni varikwenu, leswaku mi ta kota ku tisa Areka ya HOSI Xikwembu xa Israele endhawini ya yona leyi ndzi yi lungiseke. ₁₃Enkarhini lowu hundzeke a yi rhwariwanga hi n'wina, hikokwalaho HOSI Xikwembu xa hina xi hi hlundzukerile xi hi ba, hikuva a yi hlayisiwanga hi ndlela leyi xi hi leriseke ku yi hlayisa ha yona.” ₁₄Kutani vaprista ni Valevhi va tibasisa, leswaku va ta kota ku ya teka Areka ya HOSI Xikwembu xa Israele. ₁₅Kutani Valevhi va rhwala Areka ya Xikwembu hi timhandze, va ti tlhandleka emakatleni, va endla leswi HOSI Xikwembu xi va leriseke swona hi nomo wa Muxe.

₁₆Davhida a lerisa lava fambisaka Valevhi leswaku va hlawula van'wana exikarhi ka vona va va vayimbeleri, va ri karhi va chaya swichaya-chayani swo fana ni tiharipa, ni switende, ni swiphambati swa nsimbhi, va ba huwa ya ntsako. ₁₇Kutani Valevhi va hlawula Hemani n'wana Yuwele, ni warikwavo Asafa n'wana Berekiya. Exikarhi ka va ka Merari, va hlawula warikwavo Etani n'wana Kuxaya. ₁₈Va hlawula ni van'wana ku va seketela, va nga lava: Zakariya, na Yaaziele, na Xemiramoto, na Yeyiele, na Uni, na Eliyabu, na Benaya, na Maaseya, na Matitiya, na Elifale, na Mikineya, ni varindzi va tinyangwa va nga va Obede-Edomu na Yeyiele. ₁₉Hemani, na Asafa, na Etani a va yimbelela va ri karhi va bananisa swiphambati swa nsimbhi. ₂₀Zakariya, na Yaaziele, na Xemiramoto, na Yeyiele, na Uni, na Eliyabu, na Maaseya, na Benaya, a va chaya tiharipa, va yimbelelela ehenhla. ₂₁Kasi Matitiya, na Elifala, na Mikineya, na Obede-Edomu, na Yeyiele, na Azaziya, a va yimbelelela ehansi va ri karhi va chaya tiharipa ta tingoti ta 8. ₂₂Muyimbelerisi wa Valevhi a a ri Kenayiya, hikuva a a ri nsini a twisisa swa vuyimbeleri. ₂₃Berekiya na Elikana a va rindza laha Areka yi vekiweke kona. ₂₄Lava a va ba tinanga emahlweni ka Areka ya Xikwembu a va ri vaprista lava: Xebaniya, na Yoxafati, na Netanele, na Amasayi, na Zakariya, na Benaya, na Eliezere; Obede-Edomu na Yehiya vona a va rindza laha Areka yi vekiweke kona.

₂₅Kutani Davhida ni vakulukumba va Israele ni tindhuna ta mavuthu ya masocha ya 1 000, va ya ku ya rhwala Areka ya Ntwanano wa HOSI, va yi humesa endlwini ya Obede-Edomu va tsakile. ₂₆Kutani va humesa magandzelo hi tinkuzi ta 7 ni tinyimpfu ta makhuna ta 7, va kombela leswaku HOSI Xikwembu xi pfuna Valevhi eku rhwaleni ra Areka ya Ntwanano. ₂₇Davhida ni Valevhi hinkwavo lava a va rhwala Areka, ni vayimbeleri, ni muyimbelerisi Kenaniya, a va ambarile swiambalo swa ntsembyani lowo saseka, Davhida yena a tlhandlekile nceka wa ntsembyani lowu vuriwaka “efodi”. ₂₈Kutani Vaisraele hinkwavo va heleketa Areka ya Ntwanano va ri karhi va yimbelela, va ba timhalamhala ni tinanga, va bananisa swiphambati swa nsimbhi, va chaya tiharipa ni switende.

₂₉Loko Areka ya Ntwanano ya HOSI Xikwembu yi nghena emutini wa Davhida, Mikala N'wa-Sawulo a hlometela hi le fasitereni, a vona hosi Davhida ehansi a ri karhi a tlula-tlula a cina, kutani Mikala a n'wi sola hi mbilu.