I Tikronika 14

₁Hiramu hosi ya le Tiri a rhumela vayimeri va yena eka Davhida, va ri ni timhandze ta murhi wa kedari; a rhuma ni vatirhi lava tivaka ku vatla maribye ni timhandze leswaku va ta akela Davhida eyindlu ha swona. ₂Kutani Davhida a swi vona leswaku HOSI Xikwembu xi tiyisile vuhosi bya yena ehenhla ka Vaisraele, ni leswaku xi kurisile mfumo wa yena hikwalaho ka vona Vaisraele vanhu va xona. ₃Loko a fikile eYerusalema, Davhida a teka vasati van'wana, kutani a veleka vana van'wana va xinuna ni va xisati. ₄Vana va Davhida lava nga velekiwa eYerusalema hi lava: Xamuwa, na Xobabu, na Natani, na Solomoni, ₅na Yibehari, na Elixuwa, na Elipalete, ₆na Noga, na Nefege, na Yafiya, ₇na Elixama, na Beliyada, na Elifalete.

₈Vafilista va twa leswaku Davhida ú cheriwile mafurha enhlokweni leswaku a va hosi ya Israele; hiloko va huma nyimpi hinkwavo, va famba va n'wi hlota. Loko Davhida a twa mhaka leyi, a huma a ya lwa na vona. ₉Vafilista a va fikile va hlasela Vaisraele enkoveni wa Refayimi. ₁₀Kutani Davhida a vutisa timhaka eka Xikwembu, a ku: “Leswi ndzi humaka ndzi ya lwa ni Vafilista, xana u ta va nyiketa emavokweni ya mina xana?” HOSI Xikwembu xi hlamula xi ku: “Yana, hikuva ndzi ta va nyiketa emavokweni ya wena.” ₁₁Hiloko Davhida a famba a ya lwa ni Vafilista eBaala-Perasini, a va hlulela kona, kutani a ku: “Xikwembu xi fayile valala emahlweni ka mina, xi va hangalasa tanihi ndhambi ya mati!” Hikokwalaho ndhawu yoleyo yi thyiwa vito ra Baala-Perasini (hileswaku “N'wini-wa-ku-faya”). ₁₂Vafilista va tsutsuma va siya swikwembu swa vona leswi vatliweke, kutani Davhida a lerisa leswaku swikwembu leswi swi hisiwa.

₁₃Vafilista va tlhela va huma nyimpi va hlasela Vaisraele enkoveni wa Refayimi. ₁₄Davhida a engeta a vutisa timhaka eka Xikwembu, kambe xona xi hlamula xi ku: “U nga va kongomi kunene, kambe keketlela u ya ta hi le ndzhaku ka vona, laha ku langutanaka ni mirhi ya ‘mabaka’. ₁₅Kutani loko u twa mpfumawulo wo fana ni swigingi swa vanhu ehenhla ka mirhi leyi ya ‘mabaka’, tilulamise, hikuva mina Xikwembu ndzi ta va ndzi ku rhangele emahlweni ku ya hlasela mavuthu ya Vafilista.” ₁₆Davhida a endla hilaha Xikwembu xi n'wi leriseke hakona, kutani Vaisraele va hlula Vafilista, ku sukela eGibiyoni ku ya fika eGezere. ₁₇Ndhuma ya Davhida yi twala hinkwako, kutani HOSI Xikwembu xi endla leswaku matiko hinkwawo ma n'wi chava.