I Tikronika 12

₁Enkarhini lowu Davhida a nga koti ku famba-famba hi ku chava Sawulo n'wana Kixi, ku vile ni tinhenha leti ti nga ya eka yena loko a ri eSikilaga, ku ya n'wi pfuna ku lwa nyimpi. ₂Vavanuna lava a va ri va ka Benjamini, maxaka ya Sawulo; a va tiva ku copa hi miseve ni ku hoxa maribye hi swipelupelu, va tirhisa voko ra xinene kumbe ra ximatsi. ₃Vanhu va kona hi lava: Murhangeri a a ri Ahiezere n'wana Xema wa le Gibeya; ku landza makwavo wa yena Yowasi; na Yeziele na Pelete vana va Azimavhete; na Beraka, na Yehu wa le Anatoto; ₄na Iximaya wa le Gibiyoni, un'wana wa varhangeri va tinhenha ta 30; na Yeremiya, na Yahaziele, na Yohanani, na Yozabada wa le Gedera; ₅na Eluzayi, na Yerimoto, na Beyaliya, na Xemariya, na Xefatiya wa le Harufi; ₆na Elikana, na Yixiya, na Azarele, na Yowezere, na Yaxobuwama, va nga vona va ka Kora; ₇na Yowela na Zebadiya vana va Yerohama wa le Gedori.

₈Loko Davhida a a ri ekhokholweni ra le mananga, van'wana va ka Gadi va tihlanganisile na yena; a va ri tinhenha leti tivaka ku lwa nyimpi, va tamerile switlhangu ni matlhari, va chavisa kukota tinghala, va ri ni rivilo ku fana ni timbavala ta le tintshaveni. _9-13Hinkwavo a va ri 11; mavito ya vona hi lawa: Ezere a a ri murhangeri, a landziwa hi Obadiya, na Eliyabu, na Miximana, na Yeremiya, na Atayi, na Eliele, na Yohanani, na Elizabada, na Yeremiya lon'wana, na Maki-Banayi. ₁₄Va ka Gadi lava a va ri vafambisi va mavuthu, van'wana va rhangela masocha ya 100, van'wana va rhangela masocha ya 1 000. ₁₅Vavanuna lava hi vona va nga pela nambu wa Yordani loko wu tele ngopfu enkarhini wa timpfula, va ya hlasela valala etimbaleni, va va hangalasela evuxeni ni le vupeladyambu.

₁₆Van'wana va ka Benjamini ni va ka Yuda, na vona va yile eka Davhida loko a ri ekhokholweni. ₁₇Kutani Davhida a va hlanganisa a ku: “Loko mi ri ni moya lowunene mi tela ku ta ndzi pfuna, hi ta twanana swinene. Kambe loko mi tile ku ta ndzi xenga, mi ndzi nyiketa eka valala va mina hambiloko ndzi nga onhanga nchumu, Xikwembu xa vatata wa hina xi ta mi vona, xi mi ba!” ₁₈Hiloko Amasayi, un'wana wa varhangeri va tinhenha ta 30, a ngheniwa hi Moya, kutani a ku:

Kutani Davhida a va amukela, a va endla varhangeri va mavuthu ya yena.

₁₉Van'wana va ka Manase va tinyiketile eka Davhida loko a ta ni Vafilista ku ta lwa na Sawulo. (Ntiyiso wa kona hileswaku Davhida a nga va pfunanga Vafilista, hikuva tihosi ta vona a ti nga n'wi tshembi, ti hatla ti n'wi hlongola, ti vula leswaku a nga va dlayisa hi ku tlhelela eka n'wini wa yena Sawulo.) ₂₀Enkarhini lowu Davhida a yeke le Sikilaga, va ka Manase lava nga tinyiketa eka yena hi lava: Adina, na Yozabada, na Yediele, na Mikaele, na Yozabada lon'wana, na Elihu, na Silitayi; un'wana ni un'wana wa vona a a ri murhangeri wa mavuthu ya ka Manase, vuthu rin'we ri ri ni masocha ya 1 000. ₂₁Leswi a va ri tinhenha letikulu ni varhangeri va mavuthu, va pfunile Davhida, kutani yena a va veka ku va tindhuna ta masocha ya yena. ₂₂Siku rin'wana ni rin'wana, a ku ri ni vavanuna lava yaka eka Davhida ku ya n'wi pfuna, ku kondza a va ni masocha layo tala ngopfu.

₂₃Leyi i mintsengo ya masocha emavuthwini ya Davhida, lama nga ya eka yena le Hebroni ma ya n'wi veka ku va hosi ematshan'wini ya Sawulo, hilaha HOSI Xikwembu a xi vulavula hakona. ₂₄Masocha ya va ka Yuda lawa a ma tamerile switlhangu ni matlhari, a ma ri 6 800. ₂₅Tinhenha ta va ka Simiyoni leti a ti toloverile ku lwa nyimpi, a ti ri 7 100. ₂₆Masocha ya va ka Levhi a ma ri 4 600. ₂₇Yoyada murhangeri wa va ka Aroni a a ri ni masocha ya 3 700. ₂₈Sadoki jaha ra nhenha a a ri ni tindhuna ta 22 ta va ka vona. ₂₉Masocha ya va ka Benjamini, wona maxaka ya Sawulo, a ma ri 3 000; lavo tala exikarhi ka vona, hi lava khale a va tirhela Sawulo. ₃₀Masocha ya va ka Efrayimi a ma ri 20 800; a ma ri tinhenha to tiveka swinene exikarhi ka va ka vona. ₃₁Masocha ya va ka Manase lava nga evupeladyambu bya Yordani, a ma ri 18 800. A ma hlawuriwile ku ta veka Davhida a va hosi. ₃₂Va ka Isakara, va nga vanhu vo xiya minkarhi ni ku tiva leswi Vaisraele va fanelaka ku endla swona, a va ri ni tindhuna ta 200, ni masocha ya ka vona lawa a ma ri hansi ka tindhuna teto. ₃₃Masocha ya va ka Zebuloni a ma ri 50 000, ma tiva ku lwa nyimpi ma ri ni moya wun'we, ma tamerile matlhari ya tinxaka-xaka, ma xaxamerile hi mavuthu. ₃₄Masocha ya va ka Neftali a ma ri 37 000, ma tamerile switlhangu ni matlhari, ma fambisiwa hi tindhuna ta 1 000. ₃₅Masocha ya va ka Dani a ma ri 28 600, hinkwawo ma hlomile matlhari ya wona. ₃₆Masocha ya va ka Asere a ma ri 40 000, ti ri tinhenha leti tivaka ku lwa nyimpi. ₃₇Masocha ya va ka Rhuveni, ni ya va ka Gadi, ni ya va ka Manase lava nga vuxeni bya Yordani, a ma ri 120 000, ma tamerile matlhari ya tinxaka-xaka.

₃₈Masocha lawa hinkwawo ma yile le Hebroni ma xaxamerile hi mavuthu, ma ri ni makungu ya ku veka Davhida a va hosi; na vona Vaisraele van'wana hinkwavo a va ri ni makungu walawo. ₃₉Va tshamile na Davhida masiku manharhu va ri karhi va dya ni ku nwa leswi varikwavo va va lulamiseleke swona. ₄₀Na vona vaakelani va vona, hambi va ri lava humaka ematikweni ya Isakara na Zebuloni na Neftali, va yisile swakudya hi timbhongolo, ni tikamela, ni timeyila, ni tihomu. Swakudya swa kona a swi tele: A ku ri ni mapa, ni swimbhundzwa swa makuwa lama omisiweke, ni swichocho swa mihandzu ya vhinya, ni vhinyo, ni mafurha, ni nyama ya swifuwo leswikulu ni leswitsongo. Hakunene, etikweni ra Israele, ntsako a wu ri lowukulu swinene.