Sofoniya 2

₁Hlengeletanani endhawini yin'we,

n'wina vanhu lava pfumalaka tingana,

₂mi nga si hlongoriwa,

mi nyamalala kukota mungu,

mi nga si hisiwa

hi vukari lebyi pfurhaka bya HOSI Xikwembu,

siku ra ku kariha ka xona

ri nga si mi fikela.

₃Lavani HOSI Xikwembu, n'wina hinkwenu lava titsongahataka,

n'wina mi endlaka ku rhandza ka xona;

lavani leswo lulama, mi va ni xichavo,

kumbe xana mi ta pona

esikwini ra ku kariha ka HOSI.

₄Muti wa Gaza wu ta sala wu nga ri na munhu,

ni wa Axikeloni wu ta hundzuka rhumbi;

va le Axidodo va ta hlongoriwa, dyambu ri lo hosi!

Va le Ekroni va ta rhurhisiwa.

₅Mi ni khombo n'wina mi akeke eribuweni ra lwandle,

n'wina va rixaka ra Vakereti!

Rito ra HOSI Xikwembu ri kanetana na n'wina,

n'wina va tiko ra Vafilista;

Xikwembu xi ta mi herisa,

ku nga sali na un'we wa mhamba.

₆Tiko ra n'wina ra le ribuweni ra lwandle

ri ta hundzuka madyelo ya swifuwo,

ri va puwa ro risela kona tinyimpfu,

ni ndhawu ya swivala swa tona.

₇Tiko leri ri ta tekiwa

hi va le Yuda lava poneke;

va ta risela kona swifuwo swa vona;

namadyambu va ta ya etlela

etindlwini ta le Axikeloni,

hikuva HOSI Xikwembu xa vona xi ta va tsetselela,

xi tlhela xi va katekisa.

₈HOSI Xikwembu xi ri:

“Vamowabu, ndzi va twile loko va sandza,

ni ku rhuketela ka Vaamoni ku fikile etindleveni ta mina,

ndzi va twile loko va hlekula vanhu va mina,

va tibumabuma, va ku va ta teka tiko ra Israele.

₉Kambe mina HOSI ya matimba hinkwawo,

Xikwembu xa Israele, ndza hanya:

Va le Mowabu ni va le Amoni va ta endliwa

leswi endliweke va le Sodoma na Gomora;

tiko ra vona ri ta tala mahlwehlwe,

ni makhele ya munyu;

ri ta onhakela makumu.

Masalela ya Vaisraele, vona lava poneke,

hi vona lava nga ta hlasela Vamowabu na Vaamoni, va va tekela tiko.”

₁₀Leyi hi yona hakelo ya ku tikurisa ka vona,

hikuva va sandzile ni ku rhuketela

vanhu va HOSI ya matimba hinkwawo.

₁₁HOSI Xikwembu xi ta va ba hi ndlela yo chavisa,

swikwembu hinkwaswo leswi nga misaveni, xi ta swi tsongahata,

kutani vanhu va tinxaka hinkwato

va ta xi nkhinsamela ematikweni ya vona.

₁₂Na n'wina va le Etiyopiya,

mi ta heta hi fumu ra HOSI Xikwembu!

₁₃HOSI Xikwembu xi ta tlakusa voko, xi ba matiko ya le n'walungwini,

xi herisa ni tiko ra Vaasiriya;

muti wa Ninivha, xi ta wu hundzula rhumbi,

wu va mananga lama omeke ngopfu.

₁₄Mintlhambi ya swifuwo, ni swiharhi swa nhova hi tinxaka-xaka ta swona

swi ta vundza emutini lowu;

makoti ni swihloni swi ta tshama

exikarhi ka tiphuphu leti weleke hansi,

swinkhovha swi ta rila swi tshamile emafasitereni,

mawukuwuku ma ta rila ma ri eswihukuveni,

timhandze ta kedari leti akeke muti wa kona

ti ta sala erivaleni.

₁₅Lowu i muti lowu a wu tikurisa ngopfu,

wu titwa wu hlayisekile;

vaaki va wona a va hamba va ku:

“Hina hi hina, a ku na van'wana!”

Kambe sweswi wu hundzukile rhumbi ro chavisa,

ni kaya ra swiharhi swa nhova;

hinkwavo lava hundzaka hi ndlela,

va wu hlekula, va hlakahla tinhloko.