Zakariya 5

₁Ndzi tlhela ndzi tlakusa mahlo, kutani ndzi vona buku leyi hahaka empfhukeni. ₂Kutani ntsumi yi ku ka mina: “U vona yini xana?” Ndzi hlamula ndzi ku: “Ndzi vona buku leyi hahaka empfhukeni; ku leha ka yona ku ringana 10 m, ku anama ka yona ku ringana 5 m.” ₃Kutani ntsumi yi ku ka mina: “Buku leyi i ya mindzhukano leyi kongomaka tiko hinkwaro. Endzeni ni le handle ka yona, yi vula leswaku munhu loyi a yivaka, ú ta susiwa etikweni, na yena loyi a hlambanyaka hi ku hemba, ú ta susiwa eka rona.”

₅Ntsumi leyi a yi vulavula na mina, yi ndzi tshinelela yi ku: “Tlakusa mahlo u xiyaxiya xilo lexi xi taka.” ₆Mina ndzi ku: “I xilo muni xexo ke?” Ntsumi yi ku: “Lexi taka i ngula, yi rhwele ku navela loko biha ka vanhu va tiko hinkwaro.” ₇Ngula leyi a yi ri ni xipfalo xa ntsopfu, kutani xipfalo xi tlakusiwa, hiloko ku vonaka wansati loyi a a ri endzeni ka yona. ₈Kutani ntsumi yi ku: “Leswi i vubihi!” Kutani yi dlidlimbetela wansati endzeni ka ngula yi tlhela yi pfala yona hi xipfalo xo tika xa ntsopfu.

₉Ndzi tlhela ndzi tlakusa mahlo, kutani ndzi vona vavasati vambirhi lava a va ri karhi va ta; a va ri ni timpapa to fana ni ta gumba, va hahisiwa hi moya. Kutani va fika va tlakula ngula, va ya na yona empfhukeni. ₁₀Ndzi vutisa ntsumi leyi a yi vulavula na mina, ndzi ku: “Xana ngula leyi, va yi yisa kwihi ke?” ₁₁Ntsumi yi ndzi hlamula yi ku: “Va yi yisa etikweni ra Xinara, leswaku va ya yi akela kona eyindlu. Loko yindlu yi ta va yi herile, va ta nghenisa ngula eka yona, va yi tikirheta eka yona.”