Pisalema ya 94

₁We HOSI, u Xikwembu lexi rihiselaka;

tikombe wena Xikwembu murihiseli!

₂Suka u yima wena muavanyisi wa misava,

bana lava tikurisaka, hikuva va lo tivangela.

₃We HOSI, xana lavo homboloka va ta ba nkulungwana ku ya fika rini,

va ta tshika rini ku tidzunisa xana?

₄Hinkwavo lava endlaka leswo biha,

a hi ku rhukana ka vona loko va vulavula, va tibumabuma ngopfu.

₅We HOSI, va xanisa tiko ra wena,

va yisa vanhu va wena hansi.

₆Va dlayetela tinoni ni valuveri,

va herisa ni lava pfumalaka vatswari,

₇va ri karhi va ku: “HOSI a yi swi voni,

Xikwembu xa va ka Yakobo a xi na mhaka na swona!”

₈N'wina vanhu vo pfumala tindleve, yingisani;

mintlunya ndzin'wina, xana mi ta tlhariha rini xana?

₉Loyi a hi nyikeke tindleve, xana a nge twi xana?

Loyi a hi vumbeke mahlo, xana a nge voni xana?

₁₀Xana loyi a letelaka vamatiko, a nge pfi a va ba xana?

Hi yena la dyondzisaka vanhu, ú ni vutivi!

₁₁HOSI Xikwembu xi tiva miehleketo ya vanhu,

xa swi tiva leswaku i moyanyana ntsena!

₁₂Ku katekile munhu loyi a layiwaka hi wena, we HOSI,

loyi u n'wi dyondzisaka Nawu wa wena.

₁₃Munhu wo tano, u n'wi rhulisa mbilu enkarhini wa maxangu,

ku kondza loko lavo homboloka va hoxiwa ekheleni.

₁₄HOSI Xikwembu a xi tshiki vanhu va xona,

ndzhaka ya xona a xi nga yi cukumeti.

₁₅Ku lulama ku ta tlhela ku va kona etihubyeni,

vanhu hinkwavo lavo lulama va ta ku seketela.

₁₆Xana i mani loyi a nga yimaka na mina a lwa ni lavo homboloka xana?

Loyi a nga ndzi seketelaka a lwa ni lavo biha i mani xana?

₁₇Loko HOSI Xikwembu a xi nga ndzi pfunanga,

a ndzi ta va ndzi rhelerile khale exivandleni xa vafi!

₁₈Nkarhi lowu a ndzi ehleketa leswaku ndzi ta rhetemuka,

we HOSI u ndzi khomile hi rirhandzu ra wena.

₁₉Loko ndzi ri maxangwini layo tala ndzi pfumala ku rhula,

u ndzi khongoterile, ndzi kuma ku tsaka.

₂₀Xana vafumi lavo homboloka,

u ta twanana na vona loko va hundzuluxa milawu, va endla leswo biha xana?

₂₁Va endla makungu yo herisa lavo lulama,

kutani la pfumalaka nandzu va n'wi avanyisela rifu.

₂₂Hambiswiritano HOSI Xikwembu xi hundzuke khokholo ra mina,

hi xona ribye leri ndzi tumbelaka eka rona.

₂₃Lavo homboloka xi ta va ba hikwalaho ka vubihi bya vona,

xi ta va herisa hi mhaka ya swiendlo swa vona;

hakunene HOSI Xikwembu xa hina xi ta va herisela makumu.