Pisalema ya 79

₁We Xikwembu, vamatiko va nghenile etikweni ra wena,

va nyamisile Tempele ya wena leyo hlawuleka,

muti wa Yerusalema va wu hundzule rhumbi.

₂Va tekile mintsumbu ya malandza ya wena

va yi nyika makoti ma dya;

lava va ku khongelaka,

va nyiketiwile swiharhi swa nhova swi va dya.

₃Va halatile ngati ya malandza ya wena

yi khuluka hinkwako eYerusalema kukota mati,

ku ri hava munhu wo va lahla.

₄Hi hundzukile xihlekiso eka vaakelani va hina,

hinkwavo lava va hi rhendzeleke va hi hlekula ni ku hi monya.

₅We HOSI, xana u ta hi hlundzukela ku fikela rini?

Xana vukari bya wena byi ta pfurha kukota ndzilo hilaha ku nga heriki xana?

₆Hlundzukela vamatiko lava nga ku tiviki;

hi vukari bya wena, bana matiko ya vanhu lava nga ku khongeriki,

₇hikuva hi vona lava heriseke va ka Yakobo,

va onhetela ni tiko ra vona.

₈We HOSI, u nga hi beli swidyoho swa vatata wa hina,

hatlisa u ta, u ta hi twela vusiwana

hikuva hi tsongahatiwile ngopfu.

₉We Xikwembu muponisi wa hina, hi pfune

leswaku vito ra wena ri dzunisiwa;

hi kutsule u hi rivalela swidyoho swa hina

hikwalaho ka vito ra wena.

₁₀U nga pfumeli leswaku vamatiko va hi hleka va ku:

“Xi kwihi Xikwembu xa vona xana?”

Va kombe hi ri karhi hi swi vona,

leswaku u rihiseta ngati ya malandza ya wena leyi halatiweke.

₁₁Yingisa ku konya ka lava bohiweke;

lava avanyiseriweke rifu, va ponise hi matimba ya wena lamakulu.

₁₂We N'wini wa hinkwaswo, leswi vaakelani va hina va ku hlekuleke,

va tlherisele ka-7 leswi va ku endleke swona.

₁₃Kutani hina vanhu va wena, hi ntlhambi lowu u wu risaka;

hi ta ku tlangela, hi twarisa ku dzuneka ka wena hilaha ku nga heriki.