Pisalema ya 78

₁N'wina vanhu va mina,

twanani leswi ndzi lavaka ku mi dyondzisa swona,

rhiyani ndleve mi yingisa leswi ndzi swi vulaka.

₂Ndzi lava ku vulavula hi swivuriso,

ndzi hlamusela swihundla swa minkarhi leyi hundzeke.

₃Timhaka leti hi ti twile ha ti tiva,

hikuva vatata wa hina va hi byele tona.

₄A hi nga ti fihleli vatukulu va vona,

vona lava va taka endzhaku ka hina,

hi ta va tivisa mintirho leyo dzuneka ya HOSI Xikwembu ni matimba ya xona,

hi va byela ni leswo hlamarisa leswi xi swi endleke.

₅Xikwembu xi vekile nawu exikarhi ka Vaisraele,

xi wu lerisa vona va ka Yakobo;

xi lerisile vatata wa hina,

leswaku va wu dyondzisa vana va vona,

₆kutani ni lava va ha taka va ta tiva timhaka leti,

va tlhela va ti dyondzisa ni vana va vona.

₇Hi mukhuva wolowo, va ta tshemba Xikwembu, va nga rivali mintirho ya xona;

va ta hlayisa swileriso swa xona.

₈Naswona xi lavile leswaku vana lava va nga fani ni vatata wa vona,

va nga vanhu lava tiariseke va ala ku yingisa,

vanhu lava kanakanaka,

lava nga tshembekangiki eka Xikwembu.

₉Va ka Efrayimi lava tivaka swinene ku copa miseve,

va balekile esikwini ra nyimpi,

₁₀hikuva a va tshovile ntwanano wa vona na Xikwembu

va ala ku landzelela Nawu wa xona.

₁₁Mintirho leyikulu yo hlamarisa leyi xi yi endleke va ri karhi va yi vona,

va yi rivarile.

₁₂Xikwembu xi kombile vatata wa vona mintirho leyo hlamarisa,

loko va ha ri erivaleni ra Sowani le Egipta.

₁₃Xi avanisile mati ya lwandle, ma endla tindhundhuma ematlhelweni mambirhi,

kutani xi va tsemakanyisa, va hundza.

₁₄Ninhlekanhi a xi va rhangela hi papa,

kasi vusiku byin'wana ni byin'wana, a xi va voningela ndlela hi ndzilo.

₁₅Emananga xi pandzile maribye,

xi va timula torha hi mati layo tala lawa onge a ma huma exidziveni.

₁₆Xi humesile swinambyana eribyeni,

mati ma khuluka tanihi nambu.

₁₇Hambiswiritano a va tshikanga ku dyohela Xikwembu;

loko va ri kwale mananga, va yile emahlweni va ala ku yingisa Xikwembu xa le henhla-henhla.

₁₈Va ringile Xikwembu havomu,

va xi kombela swakudya leswi a va swi navela.

₁₉Va lwile ni Xikwembu hi ku vulavula ka vona, va ku:

“Xana xi nga hi phamela swakudya kwala mananga ke?

₂₀Ha swi tiva leswaku xi bile ribye,

mati ma huma ma hobomulana kukota nambu.

Kambe xana xi nga ha humesa vuswa ni nyama,

xi phamela vanhu va xona xana?”

₂₁Loko HOSI Xikwembu xi twa marito lawa, xi hlundzukerile va ka Yakobo, vona Vaisraele,

xi va karihela kukota ndzilo lowu pfurhaka,

₂₂hikuva a va nga pfumeli eka xona,

naswona a va nga tshembi leswaku xi nga va ponisa.

₂₃Hambiswiritano xi vulavurile ni matilo ehenhla,

xi ma lerisa ku pfula tinyangwa ta wona,

₂₄kutani xi va phamerile swakudya leswi humaka etilweni

hi ku va nisela manna va dya.

₂₅A va ri vanhu ntsena, kambe va dyile swakudya swa swivumbiwa swa le tilweni,

va phameriwa swona hi Xikwembu va dya va xurha.

₂₆Xi tlherisele moya wa le vuxeni ematilweni,

kutani hi ntamu wa xona xi hungisa moya wa le dzongeni.

₂₇Xi va rhumele tinyanyana to ringana ni ritshuri kumbe sava ra lwandle hi ku tala,

va dya nyama ya tona;

₂₈xi ti wisele hinkwako emixaxeni ya vona,

ti kumeka kusuhi ni mintsonga ya vona,

₂₉kutani va dya va tiphina,

hikuva Xikwembu a xi va nyikile leswi a va swi navela.

₃₀Kambe loko va ha dya,

ni ku mita va nga si mita,

₃₁Xikwembu xi va hlaserile hi vukari bya xona,

xi dlaya van'wana exikarhi ka lavo chaviseka,

xi wisela hansi tinhenha ta Israele.

₃₂Hinkwaswo leswi a swi va sivelanga ku dyoha;

hambiloko Xikwembu xi va kombile leswo hlamarisa, a va xi tshembanga.

₃₃Hikokwalaho xi komisile masiku ya vona ya ku hanya,

ma hundza tanihi moyanyana ntsena,

xi herisa vutomi bya vona hi makhombo.

₃₄Loko Xikwembu xi ri karhi xi va herisa, Vaisraele va vuyele eka xona,

va hundzuka va xi khongela.

₃₅Va tsundzukile leswaku Xikwembu lexi nga henhla-henhla

i ribye ra vona ni muhlayisi wa vona.

₃₆Kambe eku vulavuleni ka vona a va nga tshembeki,

a va byela Xikwembu emavunwa.

₃₇A va nga xi namarheli hi mbilu

kambe a va tshova ntwanano wa xona.

₃₈Hambiswiritano, leswi xona xi nga ni tintswalo,

xi va rivalerile milandzu ya vona xi nga va heriseli makumu;

minkarhi yo tala xi tikhomile,

xi nga va hlundzukeli ku tlula mpimo.

₃₉Xi swi tivile leswaku i vanhu va nyama ni ngati ntsena,

ni leswaku va fana ni moyanyana lowu hungaka wu nga ha vuyi.

₄₀Loko va ri emananga, Vaisraele va tiarisile ko tala eka Xikwembu,

va xi vavisa mbilu ematikweni lawa ya ku oma.

₄₁A va tshikanga ku xi ringa, va xi vangela gome,

xona Muhlawuleki wa Israele.

₄₂Va rivarile leswi xi va endleleke swona

esikwini leri xi va kutsuleke eka valala,

₄₃ri nga siku leri xi nga tikomba ha rona,

hi ku endla mahlori lamakulu erivaleni ra Sowani le Egipta.

₄₄Mati ya milambu hinkwayo ya Vaegipta, xi ma hundzurile ngati,

va nga ha koti ku ma nwa.

₄₅Xi va rhumele mabawa, ma va lumetela,

ni mintlambya leyi yi va xaniseke.

₄₆Hinkwaswo leswi va swi byaleke emasin'wini ya vona,

xi swi nyiketile tinjiya ni swivungu swi dya.

₄₇Xikwembu xi herisile mirhi ya vona ya vhinya hi xihangu,

mirhi ya minkuwa xi yi bile hi gwitsi.

₄₈Xi herisile tihomu ta vona hi ntungu,

swifuwo swa vona leswitsongo xi swi bile hi matshumba.

₄₉Xi tile hi ku hlundzuka lokukulu,

xi va ba hi vukari bya xona lebyi pfurhaka,

xi va vangela makhombo hinkwawo lama dlayaka.

₅₀A xi rheletanga vukari bya xona,

a xi va ponisanga eku feni,

xi va bile hi makhombo xi nga va tsetseleli.

₅₁Xi dlele mativula hinkwawo etikweni ra le Egipta,

ma nga mativula ya le mitini ya va ka Hamu.

₅₂Kutani xi fambisile vanhu va xona tanihi murisi,

xi va byisile emananga ku fana ni swifuwo.

₅₃Xi va hlayisile, va famba va nga chavi nchumu,

valala va vona xi va mbombometile elwandle.

₅₄Xi fikisile Vaisraele etikweni ra xona lero hlawuleka,

etintshaveni leti xi nga tikumela tona hi matimba ya xona.

₅₅Xikwembu xi hlongorile vamatiko va suka emahlweni ka Vaisraele,

xi nyika Vaisraele tiko ra kona leswaku ri va ra vona;

kutani va titshamele emitini ya kona

hi ku ya hi tinyimba ta ka vona.

₅₆Hambiswiritano va tiarisile, va ringa Xikwembu xa le henhla-henhla,

va ala ku yingisa swileriso swa xona.

₅₇Va fularhele Xikwembu, va lwa na xona kukota vatata wa vona;

a va nga tshembeki, va fana ni vurha bya ngoti yo debya.

₅₈Va hlundzukisile Xikwembu hi switsunga swa vona swa vukhongeri bya hava;

va xi tlhave mbilu hi ku tivatlela swikwembu swa vona swa swifaniso.

₅₉Xikwembu xi vonile timhaka leti,

kutani xi hlundzukela Vaisraele, xi va tshikela makumu.

₆₀Xi herisile vutshamo bya xona bya le Xilo,

wu nga ntsonga lowu a xi tshama eka wona exikarhi ka vanhu va xona.

₆₁Xi tshike valala va famba ni areka ya xona,

yona xikombiso xa matimba ni ku dzuneka ka xona.

₆₂Xi hlundzukerile vanhu va xona,

xi va nyiketa leswaku va dlawa hi tlhari.

₆₃Majaha ma dlawe hi ndzilo,

vanhwana a va ha twanga tinsimu ta minkhuvo ya vukati.

₆₄Vaprista va ka vona va fe hi tlhari,

kambe tinoni ta vona a ti va rilanga.

₆₅Hikokwalaho N'wini wa hinkwaswo ú suke a yima kukota munhu la pfukaka evurhongweni,

ku fana ni nhenha leyi baka huwa hi mhaka ya vhinyo.

₆₆Valala va yena ú va hangalasile,

va tlhela ni tingana letikulu.

₆₇Ú tshikile va ka Yosefa,

va nyimba ya ka Efrayimi a nga va hlawulanga,

₆₈kambe ú hlawurile va nyimba ya ka Yuda,

ni ntshava ya Siyoni leyi a yi rhandzaka.

₆₉Xivandla xa yena lexo hlawuleka, ú xi akile xi tiya kukota matilo lama tlakukeke,

xi tiya ku fana ni misava leyi nga ta va kona hilaha ku nga heriki.

₇₀Xikwembu xi hlawurile Davhida nandza wa xona,

xi n'wi susa eku riseni ka swifuwo,

₇₁xi n'wi tshikisa ku risa tinyimpfu,

xi n'wi endla murisi wa va ka Yakobo,

va nga vona Vaisraele vanhu va xona.

₇₂Davhida ú rhangerile Vaisraele hi mbilu yo basa,

a va fambisa hi vutlhari.