Pisalema ya 62

₁Moya wa mina wu kuma ku wisa eka Xikwembu ntsena,

ku ponisiwa ka mina ku huma eka xona.

₂Hi xona ntsena xi nga ribye ra mina,

khokholo ra mina ni muponisi wanga.

Ku hava munhu na un'we la nga ndzi susaka.

₃Hikwalaho ka yini mi khitikana mi ta ndzi hlasela,

mina loyi ndzi fanaka ni khumbi leri waka, kumbe rihlampfu leri boleke, xana?

₄Mi luka mano yo ndzi wisa exitulwini xa vuhosi.

mi tsakela ku ndzi kanganyisa.

Marito ya n'wina a hi ku tsakisa ka wona,

kasi etimbilwini mi le ku ndzi rhukaneni.

₅Moya wa mina wu kuma ku wisa eka Xikwembu ntsena,

hikuva xi ndzi nyika ku tshemba.

₆Hi xona ntsena xi nga ribye ra mina,

khokholo ra mina ni muponisi wanga.

Ku hava munhu loyi a nga ndzi susaka.

₇Eka Xikwembu ndzi kuma ku hlayiseka ni ku dzuneka,

hi xona ribye ra mina lero tiya leri ndzi tumbelaka eka rona.

₈N'wina vanhu, tshembani Xikwembu minkarhi hinkwayo,

xi tiviseni leswi nga timbilwini ta n'wina,

hikuva hi xona ribye ra vutumbelo bya hina.

₉Vanhu hinkwavo, lavakulu ni lavatsongo,

a hi nchumu, vo va moyanyana ntsena;

loko va pimiwa exikalwini,

va vevuka ku tlula ni risiva rinene.

₁₀U nga tshembi mintirho ya tihanyi,

ku kanganyisa vanhu a swi nga ku vuyiseli nchumu.

Hambiloko rifuwo ri nga ku talela,

u nga tiseketeli ha rona.

₁₁Xikwembu xi vulavurile, ndzi xi twile ko tala xi ku:

“Hi mina ndzi nga ni matimba!”

₁₂We N'wini wa hina, hina hi ri, na rona rirhandzu u na rona;

munhu un'wana ni un'wana u n'wi tlherisela leswi ringaneke mintirho ya yena.