Pisalema ya 55

₁We Xikwembu, rhiya ndleve u yingisa xikhongelo xa mina;

loko ndzi ku kombela, u nga ndzi fularheli.

₂Hundzulukela eka mina, u ndzi hlamula,

hikuva maxangu ya mina ma ndzi tshikelela.

₃Huwa ya valala va mina yi ndzi pfumata vurhongo,

ni ku tshimbeteriwa hi lavo biha, swa ndzi tika,

hikuva va ndzi vangela nhlomulo;

loko va hlundzukile, va tsakela ku lwa na mina.

₄Mbilu ya mina yi ba hi ku hatlisa,

hikuva ndzi tshukisiwa hi rifu.

₅Nchavo ni ku rhurhumela swi ndzi rhendzerile,

ndzi wele hi leswi chavisaka.

₆Kutani ndzi ri: “Mawaku loko a ndzo va ni timpapa ku fana ni tuva,

a ndzi ta haha ndzi ya wisa ekule;

₇a ndzi ta baleka,

ndzi ya tirhendzelekela kule emananga;

₈a ndzi ta hatla ndzi tilavela ntsonga

laha ndzi nga tumbelaka kona xidzedze xa vukari bya wena.”

₉We N'wini wanga, pfilunganya ku vulavula ka vona,

leswaku va nga ha twanani!

₁₀Ndzi vona tinyimpi ni madzolonga emutini,

vusiku ni nhlekanhi swi rhendzeleka hi rirhangu ra wona,

endzeni ka wona ku ni maxangu ni ku karhateka.

₁₁Emutini ku lo tala marhumbi ntsena;

ku xanisana ni vukanganyisi a swi suki etihubyeni ta kona.

₁₂Loko a ndzo hlekula hi nala wa mina,

a ndzi ta tiyisela;

ni loko a ndzo kulela hi loyi a ndzi vengaka,

a ndzi ta hambana na yena ndzi ya tumbela.

₁₃Kambe leswi, swi endla hi wena ntangha ya mina,

we munghana wa mina wa xiviri.

₁₄Khale a hi dya kun'we mabulo yo tsakisa,

hi famba-famba swin'we endlwini ya Xikwembu.

₁₅Rifu a ri va khubumete,

a va rhelele va ya exivandleni xa vafi va ri karhi va hanya,

hikuva leswo homboloka swi tele emitini ya vona ni le timbilwini ta vona.

₁₆Loko a ri mina, ndzi huwelela eka HOSI Xikwembu,

kutani xona xi ta ndzi ponisa.

₁₇Vusiku ni nhlekanhi ndzi le ku vileleni, ndza rila,

kutani xona xi ta ndzi yingisa;

₁₈xi ta ndzi lamulela enyimpini leyi ndzi yi lwaka,

hikuva lava va ndzi hlaselaka, a hi ku tala ka vona!

₁₉Xikwembu xi ta ndzi twa, xi va tsongahata,

hikuva a va hundzuki etindleleni ta vona,

naswona a va chavi Xikwembu,

xona xi tshameke exiluvelweni xa vuhosi.

₂₀Loko a ri munghana wa mina, ú tlakuse voko a ba vanakulobye,

a onha ntwanano exikarhi ka yena na vona.

₂₁Marito ya yena a ma tsokombela wonge i vulombe,

kambe a a ehleketa ntsena ku pfuxa tinyimpi;

ku vulavula ka yena a ku rhetela kukota mafurha,

kambe embilwini a a hlome matlhari.

₂₂Andlala timhaka ta wena emahlweni ka HOSI Xikwembu,

kutani xona xi ta ku seketela;

xi nga ka xi nga pfumeli

leswaku lowo lulama a tsekatsekisiwa, ni siku ni rin'we.

₂₃We Xikwembu, u ta va hoxa ekheleni ra rifu;

vanhu lava vo tsakela ku halata ngati ni ku kanganyisa,

va ta hunguteriwa malembe ya vona ya ku hanya,

kambe mina ndzi ta titshembela wena ntsena.