Pisalema ya 47

₁N'wina hinkwenu vamatiko, phokotelani!

Banani nkulungwana mi twarisa Xikwembu,

₂hikuva HOSI Xikwembu xa le henhla-henhla xa chaviseka;

xona i mufumi lonkulu ematikweni hinkwawo.

₃Xi sindzisa vamatiko ku va hansi ka hina,

xi va tsongahata leswaku hi va fuma.

₄Tiko leri nga ndzhaka ya hina,

leri hi tidzunisaka ha rona,

hi xona xi nga hi hlawulela rona,

hikuva xa hi rhandza hina va ka Yakobo.

₅HOSI Xikwembu xi tlhandlukele eSiyoni,

vanhu va ri karhi va ba huwa ya ntsako, va chaya ni tinanga.

₆Dzunisani Xikwembu hi tinsimu,

yimbelelani mi twarisa mufumi wa n'wina,

₇hikuva hi yena la fumaka misava hinkwayo;

hikokwalaho, n'wi dzuniseni hi tipisalema!

₈Xikwembu xi fuma vamatiko,

xi tshamile exiluvelweni xa xona lexo hlawuleka.

₉Tindhuna ta vamatiko ti ta endhawini yin'we,

kutani ti hundzuka vanhu va Xikwembu xa Abrahama,

hikuva vafumi va laha misaveni va le hansi ka xona.

Xikwembu i xikulu ku tlula swilo hinkwaswo.