Pisalema ya 45

₁Mbilu ya mina yi tala hi marito yo saseka swinene,

kutani ndzi suma risimu ro dzunisa mufumi wa tiko;

ririmi ra mina ri rhetela ku fana ni voko ra mutsari la tivaka ntirho wa yena.

₂Exikarhi ka majaha, ku hava loyi a ku tlulaka hi ku saseka,

loko u vulavula, tintswalo to khuluka kunene;

hakunene Xikwembu xa ku katekisa minkarhi hinkwayo.

₃We nhenha, khweketa fumu ra wena enyongeni,

hikuva wa dzuneka naswona wa chaviseka.

₄Eku chavisekeni ka wena u ta humelela;

famba u ya yimela ntiyiso, u avanyisa hi musa ni ku lulama;

voko ra wena ra xinene a ri ku pfune

ku endla leswo hlamarisa.

₅We hosi, miseve ya wena yi tontswile,

yi tlhava timbilu ta valala;

vanhu va matiko va wela emilengeni ya wena.

₆We hosi, u fana ni Xikwembu, u ta fuma hilaha ku nga heriki,

nhonga ya vuhosi bya wena yi ta tisa ku lulama.

₇U rhandza ku lulama, u venga ku homboloka,

hikokwalaho Xikwembu, xona Xikwembu xa wena,

xi ku chele mafurha enhlokweni hi siku ra nkhuvo,

xi ku hlawula eka tihosi tin'wana.

₈Swiambalo swa wena hinkwaswo swi n'wan'waseriwile

mirhi ya risuna ya mirha ni mhangana.

Etindlwini leto saseka ta le ntsindza,

ku twala mpfumawulo wa swichaya-chayani leswi swi ku tsakisaka.

₉Exikarhi ka vavasati va laha ntsindza ku ni vana va tihosi,

evokweni ra wena ra xinene, ku yimile nkosikazi, a ambele vuhlalu bya nsuku lowo tenga.

₁₀Yingisa we mutekiwa, u twa leswi ndzi ku byelaka swona,

rivala varikwenu ni ndyangu wa tata wa wena.

₁₁Ku saseka ka wena a ku yive mbilu ya hosi;

titsongahate emahlweni ka yona, hikuva i n'wini wa wena.

₁₂We nhwana wa le Tiri, lava fuweke etikweni va ta ku humesela tinyiko,

va endlela leswaku u va tsakela.

₁₃Mutekiwa n'wana hosi ú sasekile ngopfu!

Ú nghena entsindza a ambarile xiambalo xo rhungeleriwa nsuku;

₁₄ú yisiwa eka hosi a hakarile minceka ya mavalavala,

a landziwa hi vanhwana-kulobye, ti nga tinxangwana ta yena, va nghena hinkwavo.

₁₅Va hlanganisiwa hi minkulungwana,

va ri karhi va nghena etindlwini ta le ntsindza.

₁₆We hosi, vana va wena va ta tshama exiluvelweni xa vatata wa wena,

u ta va veka tindhuna etikweni hinkwaro.

₁₇Vito ra wena ndzi ta ri dzunisa evanhwini minkarhi hinkwayo,

kutani vanhu va matiko hinkwawo va ta ku twarisa hilaha ku nga heriki.