Pisalema ya 29

₁N'wina swivumbiwa swa le tilweni, dzunisani HOSI Xikwembu,

mi twarisa matimba ya xona;

₂dzunisani ku kwetsima ka vito ra xona,

mi xi nkhinsamela mi ambarile swiambalo leswo hlawuleka.

₃Rito ra HOSI ri twakala ehenhla ka malwandle,

Xikwembu xo dzuneka xi dzindzisa tilo.

HOSI yi fuma swidziva leswikulu.

₄Rito ra HOSI ri ni matimba swinene,

ri komba vuhosi bya yona lebyi chavisaka.

₅Rito ra HOSI ri wisa mirhi ya mikedari,

ri tshovelela misinya ya le Lebanoni,

₆ri tlula-tlurisa mirhi ya kona kukota marhole,

ri tsekatsekisa tintshava ta Lebanoni na Siriyoni,

ti tlalamba ku fana ni n'wana wa nyarhi.

₇Rito ra HOSI ri humesa malangavi ya ndzilo,

₈ri tsekatsekisa na wona mananga,

HOSI yi tsekatsekisa mananga ya le Kadexe.

₉Rito ra HOSI ri endla leswaku timhunti ti hatla ti tswala,

swimhuntana swi tswariwa nkarhi wu nga si fika.

ETempeleni ya HOSI, hinkwavo

va huwelela va ku: “Wa kwetsima, we HOSI!”

₁₀HOSI Xikwembu xi fuma swidziva swa mati,

vuhosi bya xona byi nga ka byi nga heli.

₁₁A xi tiyise vanhu va xona,

xi va nyika minkateko ni ku rhula.