Pisalema ya 147

₁Dzunisani HOSI!

Ku dzunisa Xikwembu xa hina hi risimu a hi ku saseka!

Swa tsakisa ku xi twarisa hilaha swi fanelaka hakona.

₂HOSI Xikwembu xi le ku pfuxeni ka muti wa Yerusalema,

xi hlengeleta Vaisraele lava hangalasiweke ematikweni.

₃Xi horisa lava vavisekaka timbilu,

xi bohelela timbanga ta vona.

₄Hi xona xi pimaka nhlayo ya tinyeleti,

hinkwato xi ti thya mavito

₅Xikwembu N'wini wa hina i xikulu, xi ni matimba ngopfu,

vutlhari bya xona a byi pimeki.

₆Xi pfuxa lava xanisiwaka,

kambe lavo homboloka xi va wisela hansi.

₇Yimbelelani mi tlangela HOSI Xikwembu xa hina,

mi xi dzunisa hi swichaya-chayani.

₈Hi xona xi pfalaka tilo hi mapapa,

xi nisa mpfula emisaveni,

xi mirisa byanyi eswitsungeni.

₉Hi xona xi phamelaka swiharhi,

xi phamela ni mavondlo ya mawukuwuku lama rilelaka swakudya.

₁₀A xi tsakisiwi hi ntamu wa tihanci,

a xi na mhaka ni tinhenha leti tiyeke,

₁₁kambe xi tsakela lava va xi chavaka,

lava tshembaka rirhandzu ra xona.

₁₂Tlangela HOSI we Yerusalema,

we Siyoni dzunisa Xikwembu xa wena.

₁₃Hi xona lexi tiyisaka rirhangu ra wena,

xi biyelela lava akeke ka wena.

₁₄Xi tisa ku rhula etikweni ra wena,

xi ku phamela leswo nandziha u dya u xurha.

₁₅HOSI Xikwembu xo lerisa kunene laha misaveni,

kutani ku hatla ku endliwa leswi xi swi vulaka.

₁₆Xi nisa gamboko ri basa ku fana ni voya bya tinyimpfu,

xi haxa gwitsi kukotisa nkuma.

₁₇Hi xona xi nisaka ni xihangu xa maribye lamakulu,

ku hava loyi a nga tiyelaka xirhami xa kona.

₁₈Xo vulavula kunene kutani swilo leswi swi n'oka;

xi hungisa moya wa xona kutani mati ma khuluka.

₁₉HOSI Xikwembu xi tivisile va ka Yakobo erito ra xona,

xi dyondzisa Vaisraele milawu ni swiboho swa xona.

₂₀Vanhu va tinxaka timbe, a xi va endlelanga swilo leswi,

a va tivi swiboho swa xona.

Dzunisani HOSI!