Pisalema ya 135

₁Dzunisani HOSI!

Dzunisani vito ra HOSI Xikwembu,

xi dzuniseni n'wina malandza ya xona,

₂n'wina mi xi tirhelaka endlwini ya xona,

eswivaveni swa Tempele ya xona Xikwembu xa hina.

₃Dzunisani HOSI Xikwembu, hikuva xi ni vunene,

yimbelelani mi twarisa vito ra xona, hikuva xi rhandzeka ngopfu.

₄HOSI Xikwembu xi tihlawulele Vaisraele, vona va ka Yakobo,

leswaku va va vanhu va xona va xiviri.

₅Ndza swi tiva hakunene leswaku HOSI i Xikwembu lexikulu,

N'wini wa hina ú tlula swikwembu hinkwaswo hi vukulu.

₆HOSI Xikwembu xi tiendlela hinkwaswo hi ku rhandza

ematilweni ni laha misaveni,

emalwandle ni le swidziveni hinkwaswo.

₇Hi xona xi tisaka mapapa ma huma evugimamusi,

xi dzindzisa tilo, mpfula yi na,

xi hungisa bubutsa ri huma evuhlayiselweni bya xona.

₈Hi xona xi dlayeke mativula ya vanhu ni ya swifuwo

etikweni ra Egipta.

₉N'wina Vaegipta, HOSI Xikwembu xi bile hosi ya n'wina Faro ni malandza ya yena hinkwawo,

hi mahlori ni swihlamariso.

₁₀Xi bile vanhu va matiko layo tala,

xi herisa tihosi ta vona leta matimba,

₁₁va nga va Sihoni hosi ya Vaamori,

na Ogo hosi ya le Baxani,

ni vafumi hinkwavo va le Kanana;

₁₂tiko ra vona xi ri nyikile Vaisraele vanhu va xona,

leswaku ri va ra vona.

₁₃We HOSI, vito wena ri ta twakala hilaha ku nga heriki,

vanhu va ta ku tsundzuka minkarhi hinkwayo.

₁₄Hakunene HOSI Xikwembu xi lwela vanhu va xona,

malandza ya xona xi ma twela vusiwana.

₁₅Swikwembu swa vamatiko

swi lo endliwa hi vanhu, i nsuku ni silivhere ntsena.

₁₆Milomo swi na yona, kambe a swi vulavuli,

swi ni mahlo, kambe a swi voni.

₁₇Swi ni tindleve, kambe a swi twi,

hambi ku ri ku hefemula a swi hefemuli.

₁₈Lava va swi vumbeke ni hinkwavo lava va swi tshembaka,

a va fane na swona!

₁₉N'wina Vaisraele, nkhensani HOSI Xikwembu,

xi nkhenseni n'wina va ka Aroni!

₂₀N'wina va ka Levhi, nkhensani HOSI Xikwembu,

xi nkhenseni n'wina mi xi chavaka!

₂₁N'wina mi akeke eSiyoni, nkhensani HOSI Xikwembu,

xona xi tshamaka eYerusalema.

Dzunisani HOSI!