Pisalema ya 126

₁Siku HOSI Xikwembu xi tlheleke xi hi katekisa hina va le Siyoni,

a hi ku hi le ku lorheni!

₂A hi tsakile swinene hi ba minkulungwana,

vamatiko va kondza va ku:

“HOSI Xikwembu xi va endlerile leswikulu!”

₃Hakunene HOSI Xikwembu xi hi endlerile leswikulu,

kutani hi tsakile ngopfu.

₄We HOSI, tlhela u hi katekisa,

hi fana ni milambu leyi khulukaka emananga.

₅Lava byalaka va ri karhi va khavaxela mihloti,

va ta tshovela va tsakile ngopfu.

₆Loyi a fambaka a ri eku rileni a rhwele mbewu yo ya byala,

ú ta vuya a ri karhi a ba nkulungwana a rhwele ntshovelo wa yena.