Pisalema ya 124

₁Loko HOSI a yi nga yimanga na hina, a ku ta va ku humelele yini?

N'wina Vaisraele, vulani sweswo mi ku:

₂“Loko HOSI a yi nga yimanga na hina,

enkarhini lowu vanhu a va hi pfukerile,

₃ingi va hi mitile hi ri karhi hi hanya,

eku hlundzukeni ka vona lokukulu.

₄A hi ta va hi dyiwile hi mati,

hi khukhuriwa hi milambu leyi hobomulanaka.

₅Mati layo tala

a ma ta va ma hi khubumetile.”

₆A ku nkhensiwe HOSI Xikwembu,

hikuva a xi hi tshikanga hi hluriwa hi valala va hina.

₇Hi chupukile tanihi nyanyana

leyi phonyokeke entlhan'wini wa varhiyi.

Xirimbana xa vona xi hi hupile, kutani hi ponile!

₈Ku pfuniwa ka hina ku le vitweni ra HOSI,

leyi endleke tilo ni misava.