Pisalema ya 12

₁Hi pfune, we HOSI, hikuva vanhu va vukhongeri va herile;

lavo tshembeka exikarhi ka vanhu va nyamalarile.

₂Hinkwavo ka vona, va byelana mavunwa;

va kanganyisa hi ku vulavula swo tsakisa,

kasi i vanhu va milomo mimbirhi.

₃We HOSI, va tseme milomo vakanganyisi lava hinkwavo,

vona lava tikukumuxaka ngopfu,

₄va ku: “Hi ta hlula hi milomo ya hina,

ku vulavula, ha swi kota, i mani a nga hi fumaka xana?”

₅HOSI yi ri: “Sweswi ndzi ta suka ndzi yima,

hikuva swisiwana swi tekeriwa swilo swa swona,

ni vapfumari va le ku konyeni.

Vanhu lava nyefuriwaka,

ndzi ta va nghenisa eku hlayisekeni.”

₆Marito ya HOSI ma tengile,

ma fana ni silivhere leyi tengisiweke

hi ku swekiwa ka 7 embiteni leyi celeriweke ehansi.

₇We HOSI, hi sirhelele,

hi lwele minkarhi hinkwayo eka vanhu va manguva lawa,

₈hikuva lavo homboloka va rhendzeleka hinkwako,

vubihi byi ri karhi byi dzunisiwa hi vanhu va laha misaveni.