Pisalema ya 107

₁Tlangelani HOSI, hikuva yi ni vunene,

rirhandzu ra yona hi leri nga heriki.

₂A va vule sweswo, vanhu lava HOSI Xikwembu xi va kutsuleke,

lava xi va humeseke ekhombyeni.

₃Xi va hlengeletile va huma ematikweni,

evuxeni ni le vupeladyambu,

en'walungwini ni le dzongeni.

₄Van'wana a va tsendzeleka emananga, ku ri hava tindlela

to fika emutini lowu va nga tshamaka eka wona.

₅A va twa ndlala ni torha,

va sungula ku hela mbilu.

₆Ekhombyeni ra vona, va huwelerile eka HOSI Xikwembu,

kutani xi va humesile emaxangwini ya vona;

₇xi va fambisile hi ndlela leyo lulama

ku kondza va ya fika emutini lowu va kumeke vutshamo eka wona.

₈A va nkhense rirhandzu ra HOSI Xikwembu,

ni mahlori lawa xi ma endlelaka vanhu,

₉hikuva xi timurile torha ra lava karheleke,

lava nga ni ndlala, xi va phamerile va dya va xurha.

₁₀Van'wana a va tshama ekhotsweni exinyamini xo chavisa.

A va khomiwile va bohiwa hi tinketani, va xaniseka ngopfu,

₁₁hikuva a va arile ku yingisa marito ya Xikwembu,

va sandza makungu ya Loyi a nga henhla-henhla.

₁₂A va rhwexiwile mintirho leyo tika,

va karhala va wa, va nga pfuxiwi hi munhu.

₁₃Ekhombyeni ra vona, va huwelerile eka HOSI Xikwembu,

kutani xi va ponisile emaxangwini ya vona.

₁₄Xi va humesile exinyamini xo chavisa xa le khotsweni,

xi tsemile ni tinketani ta vona.

₁₅A va nkhense rirhandzu ra HOSI Xikwembu,

ni mahlori lawa xi ma endlelaka vanhu,

₁₆hikuva xi tshovile tinsimbhi to goga ha tona,

xi fayetela ni timbanti ta koporo.

₁₇Van'wana a va hlanganisiwa tinhloko hi mikhuva ya vona leyo homboloka,

va xaniseka hikwalaho ka swidyoho swa vona.

₁₈Swakudya hinkwaswo a swi va phirha,

sirha a ri ahlamile emahlweni ka vona.

₁₉Ekhombyeni ra vona, va huwelerile eka HOSI Xikwembu,

kutani xi va humesile emaxangwini ya vona.

₂₀Xi lo vulavula kunene kutani va hola,

xi va ponisa eku feni.

₂₁A va nkhense rirhandzu ra HOSI Xikwembu,

ni mahlori lawa xi ma endlelaka vanhu.

₂₂A va xi tlangele hi ku humesa magandzelo,

va twarisa swiendlo swa xona hi minkulungwana.

₂₃Van'wana a va tsemakanya malwandle hi tingalava,

va bindzula hi ku tleketla nhundzu emalwandle.

₂₄Kutani va vonile mintirho ya HOSI Xikwembu,

ni ku hlamarisa ka yona loko va ri eswidziveni:

₂₅Xi lerisile, kutani ku ba moya wa xidzedze,

wu pfuxa magandlati lamakulu;

₂₆tingalava ti tlhekuka-tlhekuka,

vatluti va khomiwa hi ku chava lokukulu,

₂₇va rhurhumela, va dedeleka kukota swidakwa,

vutlharinyana bya vona byi nga ha pfuni nchumu.

₂₈Ekhombyeni ra vona, va huwelerile eka HOSI Xikwembu,

kutani xi va humesile emaxangwini ya vona.

₂₉Xi miyetile xidzedze, xi ku whíí,

magandlati ya lwandle ma rhula.

₃₀Sweswo swi va tsakisile ngopfu, hikuva a ku rhurile,

kutani HOSI Xikwembu xi va fikisile lomu a va kongomile kona.

₃₁A va nkhense rirhandzu ra HOSI Xikwembu,

ni mahlori lawa xi ma endlelaka vanhu,

₃₂a va xi twarise enhlengeletanweni ya vanhu va xona,

va xi dzunisa ehubyeni ya vakulukumba.

₃₃Laha ku nga ni milambu, HOSI Xikwembu xi nga ku hundzula mananga,

swihlovo swa mati swi hundzuka rivala leri omeke,

₃₄ni tiko ro nona ri hundzuka makwandzasi,

loko vaaki va kona va endla leswo biha.

₃₅Kambe naswona HOSI Xikwembu xi nga hundzula mananga ma va nhlangasi,

xi hundzula rivala leri omeke, ri tala swihlovo.

₃₆Kutani lava nga ni ndlala, xi va pfumelela ku ya tshama kona,

va aka ni miti va titshamela eka yona,

₃₇va byala mavele, va byala ni mirhi ya vhinya,

ntshovelo wa kona wu va lowu tsakisaka;

₃₈va andza swinene, hikuva Xikwembu xi va katekisile,

xi va andzisela na swifuwo.

₃₉Kambe loko nhlayo ya vona yi hungutiwa,

loko va tsongahatiwa, ni loko va kombiwa maxangu ni makhombo ni mahlomulo,

₄₀HOSI Xikwembu xi ta nyumisa varhangeri va tiko ra kona,

xi va tsendzelekisa emananga, laha ku nga riki na tindlela.

₄₁Kutani xi ta humesa swisiwana eku xanisekeni ka swona,

xi ta andzisa mindyangu ya swona ni mintlhambi ya swona.

₄₂Vanhu vo lulama va ta swi vona, va tsaka,

kambe lavo homboloka hinkwavo va ta pfumala lexi va nga xi vulaka.

₄₃Munhu wo tlhariha a a xiyaxiye timhaka leti,

kutani ú ta twisisa leswaku HOSI Xikwembu xi ni rirhandzu!