Pisalema ya 105

₁Tlangelani HOSI, mi khongela yona,

byelani matiko leswi yi swi endleke.

₂Yimbelelani risimu mi dzunisa yona,

twarisani mintirho ya yona hinkwayo leyo hlamarisa.

₃Vito ra yona lero hlawuleka, ri dzuniseni;

n'wina mi tsakelaka HOSI, tsakani hi mbilu hinkwayo.

₄Lavani HOSI ni matimba ya yona,

minkarhi hinkwayo, tsakelani vukona bya yona.

₅Anakanyani mintirho ya yona leyo hlamarisa,

ni hilaha ku lerisa ka yona ku mi lamuleleke hakona.

₆Ndzi vula n'wina vatukulu va Abrahama nandza wa HOSI,

n'wina va ka Yakobo mi hlawuriweke hi yona.

₇HOSI hi yona yi nga Xikwembu xa hina,

ku fuma ka xona ku eneta misava hinkwayo.

₈Minkarhi hinkwayo xi hlayisa ntwanano wa xona,

a xi rivali marito lawa xi ma vuleke, lama nga ta tirha malembe ya madzana-dzana.

₉Xi anakanya hilaha xi tiboheke hakona eka Abrahama,

ni leswi xi swi tshembiseke Isaka.

₁₀Xi swi tiyisile swi va nawu eka va ka Yakobo,

ni ntwanano lowu nga heriki eka vona Vaisraele.

₁₁Kutani xi tibohile xi ku: “Ndzi ta mi nyika tiko ra Kanana,

ndzi mi avela rona ri va ra n'wina.”

₁₂Enkarhini lowu, Vaisraele a va ha ri vatsongo,

a va nga tivikani, naswona a va ha ri valuveri,

₁₃va ha tsendzeleka ematikweni,

va suka eka mfumo wun'wana, va ya eka wun'wana.

₁₄Kambe Xikwembu a xi pfumelelanga munhu ni un'we leswaku a va xanisa;

xi tshinyile ni tihosi hikwalaho ka vona,

₁₅xi ku: “Mi nga tshuki mi khumba vahlawuriwa va mina,

vaprofeta va mina, mi nga tshuki mi va karhata!”

₁₆Enkarhini wolowo, Xikwembu xi vangile dyandza etikweni,

vanhu va fa hi ndlala;

₁₇kutani xi rhume munhu ku va rhangela a ya le Egipta,

a nga Yosefa loyi a xavisiweke, a hundzuka hlonga.

₁₈Va manyile milenge ya yena hi tinsimbhi,

va n'wi boha nhamu hi tinketani,

₁₉ku fikela loko timhaka leti a ti vuleke ti humelela,

kutani rito ra HOSI Xikwembu ri n'wi khanisa.

₂₀Hiloko hosi Faro, murhangeri wa matiko layo tala,

a lerisa leswaku Yosefa a ntshunxiwa, a humesiwa ekhotsweni;

₂₁kutani a n'wi veka ku va mulanguteri wa muti wa yena

ni muhlayisi wa swilo swa yena hinkwaswo.

₂₂Yosefa a a nga chavi ku letela tindhuna ta Faro,

lava nga vakulu eka yena a va dyondzisa vutlhari.

₂₃Kutani Yakobo a nga yena Israele, a fika etikweni ra Egipta,

a hundzuka muluveri exikarhi ka va ka Hamu.

₂₄Kambe Xikwembu xi andzisa swinene vanhu va xona,

va kondza va tlula hi matimba lava va va xanisaka.

₂₅Kutani Xikwembu xi pfuxa rivengo etimbilwini ta Vaegipta,

va fuma malandza ya Xikwembu hi tihanyi letikulu.

₂₆Kavaloko Xikwembu xi rhuma Muxe nandza wa xona,

na Aroni loyi xi n'wi hlawuleke,

₂₇va komba Vaegipta mahlori lawa xi ma leriseke,

va endla swihlamariso etikweni ra va ka Hamu.

₂₈Xikwembu xi vanga munyama wu funengeta tiko hinkwaro,

kambe Vaegipta va ala ku yingisa swileriso swa xona.

₂₉Xi hundzula mati emilambyeni ya Vaegipta ma va ngati,

xi dlaya ni tinhlampfi ta kona,

₃₀tiko ra vona ri tala hi mintlambya,

yi nghena ni le tindlwini ta vuhosi.

₃₁Xi vulavula kunene, kutani ku humelela mabawa,

ku landza tinhwala ti tata tiko hinkwaro.

₃₂Xi va nisela xihangu ematshan'wini ya mpfula,

xi ba tiko ra vona hi rihati.

₃₃Mirhi ya vona ya vhinya ni ya minkuwa

xi yi tshovelela etikweni hinkwaro.

₃₄Xi lerisa, kutani ku humelela tinjiya ta magerere,

ku landza ta swigon'wana ti siva dyambu hi ku tala,

₃₅ti dya swimila hinkwaswo etikweni,

ti heta ni mihandzu hinkwayo.

₃₆Eku heteleleni, xi dlaya mativula hinkwawo emindyangwini hinkwayo ya Vaegipta,

va nga vana lava va va kumeke evuntshweni bya vona.

₃₇Kutani Xikwembu xi humesa Vaisraele evukhumbini va rhwele nsuku ni silivhere!

Exikarhi ka vanhu va xona, a ku ri hava na un'we loyi a a rhurhumela.

₃₈Vaegipta a va tsakile loko Vaisraele va huma etikweni,

hikuva a va va chava ngopfu.

₃₉Hiloko Xikwembu xi nembeleta papa ro sirhelela Vaisraele ninhlekanhi,

nivusiku xi va voningela hi ndzilo.

₄₀Loko va kombela nyama, xi va tisela switsatsatsa,

xi va nyika ni vuswa lebyi humaka etilweni va dya va xurha.

₄₁Xi pandza ribye, kutani mati ma hobomulana,

ma khuluka emananga ma endla nambu.

₄₂Hakunene, Xikwembu a xi rivalanga rito ra xona lero hlawuleka,

leri xi ri hlambanyeleke Abrahama nandza wa xona.

₄₃Loko Xikwembu xi kutsula vanhu va xona, a va tsakile swinene,

vahlawuriwa va xona va famba va ri karhi va ba minkulungwana.

₄₄Xi va nyikile tiko ra vanhu vambe,

va dya mihandzu ya nyuku wa van'wana.

₄₅Xikwembu a xi endlela leswaku va hlayisa swiletelo swa xona,

va landzelela milawu ya xona hinkwayo.

Dzunisani HOSI!