Swivuriso 7

₁N'wananga, yingisa leswi ndzi ku byelaka swona,

u hlayisa switsundzuxo swa mina.

₂Hlayisa switsundzuxo swa mina, u ta hanya,

ni milawu ya mina, yi hlayise kukota ndzololo ya tihlo ra wena;

₃swi bohe etintihweni ta wena,

u swi fihla emakorhweni ya mbilu ya wena.

₄Byela vutlhari, u ku: “Hi wena makwerhu!”

Ku twisisa kona, ku vule “munghana wa wena”.

₅Swi ta ku ponisa eka wansati wa dlakuta,

loyi a nga tshembekangiki, wa marito yo tsokombela.

₆Siku rin'wana ndzi hlometerile ehandle

hi fasitere ra yindlu ya mina,

₇ndzi languta lavantshwa lavo pfumala vutivi,

kutani exikarhi ka vona ndzi vona jaha

leri nga ehleketiki swinene,

₈ri ri karhi ri famba egondzweni, ri jika,

ri kongoma endlwini ya lowa wansati.

₉A ku ri nimadyambu, hi nkarhi wa mpimavayeni,

loko ku ri karhi ku phuma, ni xinyami xi tshinela.

₁₀Hiloko wansati a ri hlanganisa

a ambele ku fana ni nghwavava, mbilu ya yena yi tele vukanganyisi.

₁₁Wansati loyi i wo tlatlarhuka wo pfumala xichavo,

naswona a hi ricondzo ra yena!

₁₂Etindleleni, hi yena; erivaleni a nga pfumaleki,

emahandzeni ya magondzo, ú talela kona.

₁₃Kutani a khoma jaha leri a ri ntswontswa,

a vulavula na rona a nga nyumi, a ku:

₁₄“A ndzi boheka ku humesa magandzelo,

kutani namuntlha ndzi hetisile leswi ndzi tshembiseke swona.

₁₅Hikokwalaho ndzi sukeke ekaya, ndzi ta ku hlanganisa,

ndzi ku lavile ngopfu, kutani sweswi ndzi ku kumile.

₁₆Ndzi andlalerile mubedo wa mina hi minceka ya mavalavala

leyi lukiweke hi ntsembyani wa le Egipta;

₁₇ndzi wu n'wan'waserile mirhi yo nun'hwela

ya tinxaka-xaka.

₁₈Tana, hi ya tiphina swin'we ri ko ri xa,

a hi ye hi ya tikhorwisa hi rirhandzu.

₁₉Nuna wa mina a nga kona ekaya,

ú ye kule swinene;

₂₀ú fambile ni xinkwamana xa mali,

ú ta vuya n'hweti leyi taka.”

₂₁Wansati a kucetela jaha hi marito ya yena yo kanganyisa,

a ri koka hi ririmi ra yena ro tsokombela.

₂₂Kutani jaha ri hatla ri n'wi landzelela,

ku fana ni homu leyi kokiwaka hi muhalo,

kumbe mhala leyi tlulaka yi wela entlhan'wini,

₂₃ku kondza nseve wu yi tlhava wu ya fika emarumbyini.

Ri fana ni xinyanyana lexi phatsamaka evurimbeni,

xi nga swi tivi leswaku xi ta lahlekeriwa hi vutomi.

₂₄Hikokwalaho sweswi, ndzi yingiseni n'wina vana,

rhiyani ndleve, mi twa leswi ndzi mi byelaka swona.

₂₅Wansati loyi, a nga tshuki a mi yenga,

mi nga tshuki mi lahleka mi n'wi landzelela,

₂₆hikuva lavo tala, ú va petile nhloko,

masirha lawa a ma vangeke i ntsandza-vahlayi.

₂₇Yindlu ya yena i ndlela yo ya exivandleni xa vafi,

yi rhelela yi kongoma etindlwini ta rifu.