Swivuriso 31

₂N'wananga, ndzi vula wena ndzi ku velekeke,

wena nhlamulo ya ku tiboha ka mina, xana ndzi nga ku byela yini xana?

₃U nga tshuki u tinyiketa eka vavasati,

u nga va landzeleli, hikuva va wisa ni tihosi.

₄We Lemuwele, a hi swa tihosi ku nwa vhinyo, ndzi ri, a hi swa tihosi,

hambi varhangeri, a va fanelanga ku navela byalwa,

₅hikuva loko va nwa, va ta rivala milawu,

kutani va tekela vapfumari hinkwavo etifanelo ta vona.

₆Byalwa, nyika munhu loyi a nga kusuhi ni ku fa,

ni lava khunguvanyekeke ngopfu emoyeni, va nyike vhinyo,

₇va ta nwa, va rivala vusiwana bya vona,

maxangu ya vona a va nga ha ma tsundzuki.

₈Vanhu lava nga kotiki ku vulavula hi voxe, va vulavulele,

u sirhelela vapfumari hinkwavo, lava tekeriwaka tifanelo ta vona.

₉Vulavula, u avanyisa hi nawu;

tifanelo ta swisiwana ni vapfumari, ti hlayise.

₁₀Wansati wa migingiriko, a swi olovi ku n'wi kuma,

swilo swo bomba ha swona, ú swi tlula kule.

₁₁Nuna wa yena wa n'wi tshemba swinene,

hikuva wansati loyi, ú gingirikela muti wa yena.

₁₂Masiku hinkwawo, ú endlela nuna wa yena leswinene,

a nga n'wi onheli nchumu.

₁₃Ú tilavela voya bya tinyimpfu ni ntsembyani,

a tilukela swona a tsakile.

₁₄Ú fana ni tingalava ta van'wamabindzu,

ú ya kule a ya singilela ndyangu wa yena.

₁₅Ú pfuka ka ha ri mpundzu swinene,

a lulamisela va muti wa yena eswakudya,

malandza ya yena ya xisati, a ma avela ni ntirho.

₁₆Ú xiyaxiya nsimu, kutani a yi xava;

hi mali leyi a yi bindzuleke, ú rima nsimu ya vhinya.

₁₇Ú yima hi milenge a titirhela,

a nga tshami hi mavoko.

₁₈Loko a vona leswaku mintirho ya yena ya n'wi vuyerisa,

ú tirha vusiku ni nhlekanhi, a nga etleli.

₁₉Ú tiswulela tingoti ta ntsembyani,

a tilukela ni swiambalo swa voya bya tinyimpfu.

₂₀Swisiwana, a nga swi tsoni nchumu,

ú pfuna ni vapfumari.

₂₁A nga chavi loko a vona gamboko ri wa,

hikuva vandyangu wa yena hinkwavo va ambele swo kufumela.

₂₂Ú tiendlela minkumba hi yexe,

a tirhungela swiambalo swa xivunguvungu ni swa ntsembyani wo saseka.

₂₃Nuna wa yena wa xiximiwa ehubyeni,

laha a kanelaka kona timhaka ni vakulukumba va tiko.

₂₄Wansati loyi ú rhunga minceka, a tixavisela yona,

a luka ni mavamba, a xavisela van'wamabindzu.

₂₅Xiambalo xa yena xa xiviri, i ntamu ni ndzhuti;

loko a anakanya nkarhi lowu taka, a nga chavi nchumu.

₂₆Ú vulavula swa vutlhari ntsena,

a letela van'wana hi moya wa tintswalo.

₂₇Ú lavisisa tindlela to hlayisa ndyangu,

swakudya swo kombela, a nga dyi.

₂₈Vana va yena va n'wi tlangela erivaleni,

na yena nuna wa yena wa n'wi dzunisa, a ku:

₂₉“Vavasati lava gingirikaka, va tele,

kambe na un'we, a nga fiki eka wena.”

₃₀Ku saseka ka nghohe ka kanganyisa, ni vumbhurhi bya hela,

kambe wansati loyi a chavaka HOSI Xikwembu, wa dzuneka.

₃₁Wansati loyi, a a nyikiwe mihandzu ya ntirho wa yena;

swiendlo swa yena a swi n'wi dzunise ehubyeni!