Swivuriso 26

₁Ku dzunisa xiphunta a swi fanelanga,

swi fana ni gamboko hi ximumu,

kumbe mpfula leyi naka hi nkarhi wa ntshovelo.

₂Nhlambha yo pfumala xivangelo, yi helela empfhukeni,

yi fana ni xindzingiri lexi nga ku tihaheleni, kumbe mbewulana leyi tirhendzelekelaka.

₃Ximoko i xa hanci, tomu rona i ra mbhongolo,

kasi nhlana wa xiphunta wu fanela hi nkhavi.

₄U nga tshuki u hlamula xiphunta, hi vuphukuphuku bya xona,

hikuva na wena u nga ta fana na xona.

₅Xi hlamule hi ndlela leyi kombaka vuphukuphuku bya xona,

hikuva xi nga ta ehleketa leswaku xi tlharihile.

₆Ku rhuma xiphunta i ku tivangela maxangu,

swi fana ni ku titsema milenge.

₇Xivuriso lexi humaka enon'weni wa xiphunta,

xi fana ni milenge ya munhu wa xigono, leyi nga n'wi pfuniki nchumu.

₈Ku nyika xiphunta swilo swa nkoka,

swi fana ni ku bohelela ribye exipelupelwini.

₉Xivuriso lexi humaka enon'weni wa xiphunta,

xi fana ni nkhavi wa mitwa, lowu khomiweke hi loyi a pyopyiweke.

₁₀Munhu loyi a tholaka xiphunta, kumbe vahundzi va ndlela,

ú fana ni munhu loyi a copaka vanhu hi miseve.

₁₁Mbyana yi tlhelela emahlanteni ya yona;

swi tano ni xiphunta, xi nga ka xi nga tshiki ku endla swa vuphukuphuku bya xona.

₁₂Xiphunta xa antswa,

ku ri na munhu loyi a tivonaka a tlharihile.

₁₃Lolo ri ri: “Ku ni nghala egondzweni!

Endleleni, ku ni dyinghala!”

₁₄Rivanti a ri fambi ku ya kule, hi mhaka ya swikinere,

lolo na rona ri tano, ro vumbuluka-vumbuluka emubedweni wa rona.

₁₅Munhu wo loloha, ú hoxa voko exinkambaneni,

kambe ku ri humesa a ri yisa enon'weni, i ntirho wo tika eka yena.

₁₆Lolo ri tivona ri tlharihile,

ku tlula vavanuna va 7 lava nga hlamulaka mhaka hi ndlela leyi twalaka.

₁₇Ku nyanyuka u nghenelela loko van'wana va holova,

swa fana ni ku khoma tindleve ta mbyana leyi tihundzelaka.

_18-19Munhu loyi a xisaka muakelani,

kutani a ku: “A ndzo ku vungunya”,

ú fana ni munhu wa rihuhe loyi a hoxetelaka van'wana

hi swilo leswi dlayaka ku fana ni swisana swa ndzilo ni miseve.

₂₀Loko ku ri hava tihunyi, ndzilo wa timeka;

madzolonga na wona ma kota ku hela, loko ku nga ri na munhu wo hleva.

₂₁Tihunyi ti pfurhisa makala, ni mavivi ma pfurhisa ndzilo;

swi tano ni munhu wa tinyimpi, ú pfuxa madzolonga.

₂₂Marito ya muhlevi, a hi ku tsokombela ka wona,

ma hatla ma nghena ma ya fika emakorhweni ya mbilu.

₂₃Munhu loyi a fihlaka ku biha ka mbilu ya yena hi marito yo tsokombela,

ú fana ni ximbitana lexi sasekisiweke ehandle hi xikope.

₂₄Mukanganyisi ú fihla rivengo leri tateke mbilu ya yena,

hi ku sasekisa marito ya yena;

₂₅hambiloko a nandzihisa mavulavulele ya yena, u nga kholwi,

hikuva embilwini ya yena, vubihi byi tele ku tlula mpimo.

₂₆A nga ringeta ku fihla rivengo hi mano ya yena,

kambe vubihi bya yena byi ta paluxiwa emahlweni ka vanhu hinkwavo.

₂₇La celaka khele, ú ta wela eka rona,

la khunguluxaka ribye, ri ta pyanya yena.

₂₈Munhu wa mavunwa ú venga lava a va hembelaka,

marito ya yena layo tsokombela, ma lovisa.