Swivuriso 25

₂Xikwembu xi dzunisiwa hi mhaka ya leswi ku nga ni swilo leswi tiviwaka hi xona ntsena,

kasi tihosi ti dzunisiwa loko ti kota ku kambisisa timhaka.

₃Matilo ma le henhla swinene, ni misava yi entile ngopfu;

swi tano ni leswi hosi yi ehleketaka swona: Munhu a nge swi tivi.

₄Susa thyaka eka silivhere,

kutani muvumbi ú ta endla swilo swo saseka ha yona;

₅ni le mahlweni ka hosi, susa lavo homboloka,

kutani vuhosi bya yona byi ta tiya hikwalaho ka leswo lulama.

₆Laha ku nga ni hosi, u nga tshuki u tivambavamba,

u nga tiveki exikarhi ka lava va mavito,

₇hikuva swa antswa ku byeriwa leswaku: “Tshinela haleno!”

ku ri ni ku khomisiwa tingana emahlweni ka mufumi wa tiko.

₈Loko u vona swilo,

u nga tsutsumeli ku ya mangala,

hikuva loko muakelani wa wena a ku kaneta,

u ta endla yini xana?

₉Loko u ri ni mhaka na muakelani wa wena, yi kanele na yena;

u nga tshuki u paluxa swihundla swa yena eka van'wana,

₁₀hikuva lava u byelaka vona, va nga ku khomisa tingana,

kutani u lahlekeriwa hi ndzhuti.

₁₁Marito lama vulavuriwaka enkarhini lowu faneleke,

ma fana ni maapula ya nsuku exibyeni xa silivhere.

₁₂Swiletelo swa vutlhari, eka munhu loyi a swi yingisaka,

swi fana ni xingwavila xa nsuku, kumbe vuhlalu bya nkoka.

₁₃Munhu wo tshembeka loko a rhumiwile,

ú fana ni ku titimela ka gamboko hi nkarhi wa ntshovelo,

ú phyuphyisa moya wa n'wini wa yena.

₁₄Munhu loyi a tinyungubyisaka hi tinyiko leti a nga ti humesangiki,

ú fana ni xihuhuri ni mapapa yo kala mpfula.

₁₅U nga heli mbilu loko u khongotela hosi,

marito ya wena yo titsongahata ma ta tshova matimba ya vukari bya yona.

₁₆Vulombe, loko u byi kumile, dyana u pima,

hikuva byi nga ku hlambisa timbilu, u hlanta;

₁₇u nga tati minkondzo emutini wa muakelani,

hikuva a nga karhala hi wena, kutani a nga ha ku tsakeli.

₁₈Munhu loyi a lumbetaka muakelani hi vumbhoni byo hemba,

wa dlaya ku fana ni xigiya, kumbe fumu, kumbe nseve wo tontswa.

₁₉Ku tshemba mukanganyisi enkarhini wa khombo,

swi fana ni ku tshemba tino leri boleke, kumbe nenge lowu sulekeke.

₂₀Ku yimbelelela munhu loyi a nga nhlomulweni,

swi fana ni ku n'wi hluvula swiambalo loko ku titimela,

kumbe ku n'wi chela munyu embangeni.

₂₁Loko nala wa wena a ri ni ndlala, n'wi nyike swakudya a dya,

ni loko a ri ni torha, n'wi kele mati a nwa,

₂₂hikuva loko u endla sweswo, u ta n'wi khomisa tingana letikulu,

kutani HOSI Xikwembu xi ta ku hakela.

₂₃Moya lowu humaka elwandle wu tisa mpfula;

swi tano ni munhu la hlevaka, ú hlundzukisa van'wana.

₂₄Ku tshama elwangwini ra yindlu, swa antswa,

ku ri na ku tshama endzeni ka yona, ni nsati wo kariha.

₂₅Mahungu lamanene lama humaka etikweni ra le kule,

ma fana ni mati layo titimela lama timulaka torha.

₂₆Munhu wo lulama loyi a pfumelaka ku yengiwa hi lavo homboloka,

ú fana ni xihlovo lexi pfindlusiweke, kumbe mati lama thyakisiweke.

₂₇Ku dya vulombe ku tlula mpimo, a swi sasekanga.

Swi tano ni loko u nkhensa munhu: U nga tati ngopfu marito.

₂₈Munhu loyi a tsandzekaka ku tikhoma,

ú fana ni muti lowu rirhangu ra wona ri mbundzumuxiweke.