Vafilipiya 2

₁Leswi mi kumeke ku khongoteleka eka Kriste, leswi mi susumetiwaka hi rirhandzu ra yena ni ku hlanganisiwa hi Moya, naswona leswi mi twelanaka vusiwana ni ku kombana tintswalo, ₂hetisisani ku tsaka ka mina hi ku va ni miehleketo yo fana, ni rirhandzu ro fana, ni moya wun'we, ni ku anakanya kun'we. ₃Mi nga endli nchumu hi moya wa ku tirhandza, kumbe hi ku tidzunisa hi swa hava, kambe un'wana ni un'wana a a titsongahate eka van'wana, a nga anakanyi leswaku wa va tlula hi vunene. ₄Un'wana ni un'wana wa n'wina a nga tshuki a tikarhatela leswi swi nga swa yena ntsena, kambe a a tikarhatele ni leswi swi nga swa van'wana. ₅Ku hanyisana ka n'wina a ku ve loku mi ku kumaka eka Kriste Yesu:

₁₂Varhandziwa va mina, tanihi leswi mi ndzi yingiseke masiku hinkwawo, nisweswi, ku nga ri ntsena loko ndzi ri na n'wina kambe ngopfu-ngopfu loko ndzi nga ri na n'wina, tirhelani ku ponisiwa ka n'wina hi ku chava ni ku rhurhumela; ₁₃hikuva i Xikwembu lexi tirhaka eka n'wina, lexi endlaka leswaku mi tsakela ni ku yingisa ku rhandza ka xona.

₁₄Endlani swilo hinkwaswo ehandle ka ku n'unun'uta ni ku phikisana, ₁₅leswaku mi ta pfumala nandzu, mi va lava tengeke, mi va vana va Xikwembu lava nga riki na xisandzu exikarhi ka rixaka lero homboloka, leri tiarisaka; mi fanele ku vangama exikarhi ka rona kukota timboni, laha misaveni, ₁₆mi ri karhi mi namarhela Rito ra vutomi, kutani esikwini ra Kriste, ndzi ta kota ku tidzunisa loko ndzi kuma leswaku ku tikarhata ka mina entirhweni wa mina a ku vanga ka mahala. ₁₇Hambiloko ndzi fanela ku tlhandlekela vutomi bya mina ehenhla ka mhamba ya n'wina ya ku pfumela, leyi mi gandzelaka Xikwembu ha yona, ndzi tsakile ni ku tlangela swin'we na n'wina hinkwenu. ₁₈Swi tano na n'wina: Tsakani, mi tlangela swin'we na mina.

₁₉Ndzi ni ku tshemba eka Hosi Yesu leswaku ku nga ri khale ndzi ta rhuma Timotiya a ta le ka n'wina, leswaku na mina ndzi tiyisiwa hi ku kuma mahungu yo huma eka n'wina. ₂₀Ndzi hava un'wana loyi a fanaka na yena, loyi a hisekelaka ku mi pfuna hi mbilu hinkwayo ya yena. ₂₁Lavan'wana hinkwavo va chivirikela ntsena leswi nga swa vona, ku nga ri swa Yesu Kriste. ₂₂Kambe ku tshembeka ka Timotiya ma ku tiva, ni hilaha a nga tirhisana na mina hakona entirhweni wa Evhangeli, a fana ni n'wana la tirhaka swin'we ni tata wa yena. ₂₃Hikokwalaho, ndza tshemba leswaku ndzi ta n'wi rhuma, kan'we-kan'we loko ndzi vona hilaha swilo swa mina swi nga ta famba hakona. ₂₄Kutani ndzi ni ku tshemba eka Hosi leswaku ku nga ri khale, na mina hi xiviri xa mina ndzi ta ta le ka n'wina.

₂₅Naswona ndzi anakanyile leswaku swa fanela ku mi tlherisela Epafrodito makwerhu, loyi a nga ndzi pfuna emintirhweni ni le ku lweni ka mina, loyi a mi n'wi rhumile ku ta ndzi pfuna eka leswi a ndzi pfumala swona. ₂₆A a navela ngopfu ku tlhela a mi vona hinkwenu, naswona a swi n'wi kanakanisa ngopfu ku tiva leswaku mi twile ta ku vabya ka yena. ₂₇Hakunene ú vabyile; a a ri kusuhi ni ku fa, kambe Xikwembu xi n'wi tsetselerile, naswona ku nga ri yena ntsena, na mina xi ndzi tsetselerile, leswaku ndzi nga twi ku vaviseka ehenhla ka ku vaviseka. ₂₈Hikokwalaho, ndzi navela ku hatla ndzi n'wi rhuma eka n'wina leswaku loko mi tlhela mi n'wi vona, mi ta tsaka, ni mbilu ya mina yi ta rhelelanyana. ₂₉Loko swi ri tano, n'wi amukeleni hi ku tsaka hinkwako kukota makwenu eHosini. Kombani xichavo eka vanhu lavo tano, ₃₀hikuva a a ri kusuhi ni ku fa, a fela ntirho wa Kriste, a ri karhi a pfumela ku nyiketa vutomi bya yena, leswaku a ta hetisa ntirho wa ku ndzi pfuna lowu a wu fanele ku tirhiwa hi n'wina.