Tinhlayo 8

₁Kutani HOSI Xikwembu xi ku ka Muxe: ₂“Tivisa Aroni leswaku loko a tlhoma timboni leta 7, ú fanele ku ti veka hi ndlela leyi ti nga ta voninga xivandla lexi nga mahlweni ka xitlhoma-timboni.” ₃Kutani Aroni a endla hilaha HOSI Xikwembu xi leriseke Muxe hakona, a tlhoma timboni hi ndlela leyi ti nga ta kota ku voninga xivandla lexi nga mahlweni ka xitlhoma-timboni. ₄Aroni ú endlile xitlhoma-timboni hi ndlela leyi: Ú xi furile hi nsuku, ku sukela etshakweni ra xona ku ya fika eswiluveni swa xona, a tirhisa xivumbeko lexi HOSI Xikwembu xi kombeke Muxe.

₅Kutani HOSI Xikwembu xi ku ka Muxe: ₆“Humesa Valevhi exikarhi ka Vaisraele, u ya va basisa. ₇Mabasisele ya kona hi lawa: Va xuve hi mati yo susa swidyoho, u va byela va ya byewula miri wa vona hinkwawo, va hlantswa ni swiambalo swa vona, va tlhela va hlamba. ₈Kutani u va byela va ta ni xinkuzana ni mapa lamanene lama nga ta humesiwa na xona, lama pfanganyisiweke ni mafurha; na wena u ta ni xin'wana xinkuzana xa mhamba yo susa swidyoho. ₉U ta ta ni Valevhi emahlweni ka Ntsonga lowo Hlawuleka, kutani u hlengeleta ntshungu hinkwawo wa Vaisraele. ₁₀Loko u tile ni Valevhi emahlweni ka mina HOSI, Vaisraele va ta tlhandleka mavoko ehenhla ka vona. ₁₁Kutani Aroni ú ta nyiketa Valevhi eka mina, va va nyiko leyo hlawuleka leyi humaka eka Vaisraele, leswaku va va vona lava nga ta ndzi tirhela. ₁₂Valevhi va ta tlhandleka mavoko ehenhla ka tinhloko ta tinkuzi, kutani Valevhi va ta basisiwa hi ku tlhaviwa ka tinkuzi leti, yin'we yi va ya mhamba yo susa swidyoho, leyin'wana yi va ya gandzelo leri hisiwaka, ri humeseriwa mina HOSI. ₁₃Kutani u ta nyiketa Valevhi emavokweni ya Aroni ni vana va yena, va va nyiko leyo hlawuleka leyi humeseriwaka mina HOSI. ₁₄U ta humesa Valevhi exikarhi ka Vaisraele hi ndlela yoleyo, u va veka etlhelo, kutani va ta va va mina.

₁₅“Endzhaku ka loko u ta va u basisile Valevhi, ni loko u ta va u va humesile va va nyiko leyo hlawuleka, va ta ya nghena eka Ntsonga lowo Hlawuleka, va tirha mintirho ya kona, ₁₆hikuva exikarhi ka Vaisraele, ndzi nyikiwile vona. Ndzi tihlawulerile vona ematshan'wini ya swilo hinkwaswo leswi rhangeke ku velekiwa exikarhi ka Vaisraele, ₁₇hikuva mativula hinkwawo ya vanhu ni ya swifuwo exikarhi ka Vaisraele i ya mina. Hi siku leri ndzi heriseke mativula hinkwawo etikweni ra Egipta, ndzi hlawulekisile mativula ya Vaisraele ma va ya mina. ₁₈Exikarhi ka mativula lawa hinkwawo ya Vaisraele, ndzi tekile Valevhi, ₁₉Kutani ndzi va nyiketile emavokweni ya Aroni ni vana va yena, va va nyiko leyi humaka eka Vaisraele, leswaku va ta hamba va tirhela Vaisraele eka Ntsonga lowo Hlawuleka, ni ku va basisa leswaku va nga humeleriwi hi khombo, loko va tshuka va tshinerile kusuhi ni xivandla lexo hlawuleka.”

₂₀Kutani Muxe na Aroni ni Vaisraele hinkwavo va endla hinkwaswo leswi HOSI Xikwembu xi leriseke Muxe hi tlhelo ra Vaisraele. ₂₁Valevhi va tibasisa va susa swidyoho, va hlantswa swiambalo swa vona; kutani Aroni a va nyiketa emahlweni ka HOSI va va nyiko leyo hlawuleka, a tlhela a humesa mhamba ya ku basisiwa ka vona. ₂₂Kutani endzhaku ka sweswo, Valevhi va ya nghena eka Ntsonga lowo Hlawuleka, va tirha mintirho ya vona, va fambisiwa hi Aroni ni vana va yena. Vaisraele va endla hinkwaswo leswi HOSI Xikwembu xi leriseke Muxe, hi tlhelo ra Valevhi.

₂₃Kutani HOSI Xikwembu xi ku ka Muxe: ₂₄“Mhaka yin'wana hi tlhelo ra Valevhi hi leyi: Loko va ri ni malembe ya 25 ni ku tlula, va fanele ku nghena eka Ntsonga lowo Hlawuleka, va tirha mintirho ya kona. ₂₅Kambe loko va fika eka malembe ya 50, va ta fanela ku tshika ku tirha mintirho ya kona. ₂₆Hambiswiritano, loko va swi tsakela, va ha ta ya emahlweni va pfuna vamakwavo emintirhweni ya Ntsonga lowo Hlawuleka. Leswi hi swona leswi u nga ta endlisa swona, loko u avela Valevhi emintirho.”