Marka 4

₁Yesu a sungula ku dyondzisa na kambe kusuhi ni lwandle. Kutani ntshungu lowukulu wu hlengeletana wu tela yena, ku kondza a nghena ebyatsweni, a tshamisa endzeni ka byona elwandle; loko wu ri ntshungu hinkwawo, wona a wu tshame eribuweni ra lwandle. ₂Kutani a va dyondzisa timhaka leto tala hi swifaniso; eku dyondziseni ka yena a va byela a ku:

₃“Yingisani! Muhaxi ú humile a ya eku haxeni. ₄Loko a ri karhi a haxa, timbewu tin'wana ti wela endleleni, kutani tinyanyana ti ta, ti ta dya hinkwato. ₅Tin'wana ti wela emaribyeni, laha a ku nga ri na misava leyo tala, kutani ti hatla ti mila, hikuva misava a yi nga talanga. ₆Kambe loko dyambu ri tlhava, swimila swi vuna, kutani swi oma hi ku pfumala timitsu. ₇Timbewu tin'wana ti wela exikarhi ka mitwa; loko mitwa yi kula, yi ti kamanyeta, kutani a ti vekanga nchumu. ₈Tin'wana kambe ti wela emisaveni leyinene, ti mila, ti kula, ti veka tindzhoho, yin'wana yi chela 30, yin'wana 60, yin'wana 100.” ₉Kutani a ku: “La nga ni tindleve to yingisa, a a yingise!”

₁₀Kuteloko Yesu a yile etlhelweni, lava a va ri na yena, swin'we ni lava khume na vambirhi, va n'wi vutisa hi ta swifaniso. ₁₁Kutani a ku ka vona: “N'wina mi nyikiwile ku tiva xihundla xa Mfumo wa Xikwembu, kasi eka lava va nge handle, hinkwaswo swi humelela hi swifaniso. ₁₂Swi ri leswaku,

₁₃Yesu a ku ka vona: “Xana a mi twisisi xifaniso lexi ke? Loko swi ri tano, mi ta twisisisa ku yini swifaniso hinkwaswo ke? ₁₄Muhaxi ú haxa Rito. ₁₅Timbewu leti nga wela endleleni i vanhu lava Rito ri haxiwaka eka vona; kutani loko va ri twile, Sathana a hatlisa a ta eka vona, a va tekela Rito leri haxiweke eka vona. ₁₆Timbewu leti haxiweke emaribyeni i vanhu lava, loko va twa Rito, va hatlisaka ku ri amukela hi ku tsaka; ₁₇kambe a va ri nyiki nkarhi wo veka timitsu, va tiyisela nkarhinyana ntsena; kutani loko khombo kumbe ku xaniseka swi humelela hikwalaho ka Rito, va hatlisa va khunguvanyeka. ₁₈Timbewu leti haxiweke emitweni, hi lava va twaka Rito; ₁₉kambe ku vilela hi swa misava leyi, ni ku kanganyisiwa hi rifuwo, ni ku navela swilo swin'wana ni swin'wana, swi nghena eka vona, swi kamanyeta Rito, kutani ri tsandzeka ku veka mihandzu. ₂₀Timbewu leti haxiweke emisaveni leyinene, hi lava va yingisaka Rito, va ri amukela, va veka mihandzu; mbewu yin'we yi chela 30, yin'wana 60, yin'wana 100.”

₂₁A va byela nakambe a ku: “Xana rivoni ri tisiwa leswaku ri ta khubumetiwa hi xirhundzu, kumbe ku vekiwa ehansi ka mubedo ke? Xana a ri tisiwi ku ta vekiwa ehenhla ke? ₂₂A ku na xilo lexi nga xihundleni, lexi nga ta ka xi nga paluxiwi; nakambe a ku na xilo lexi fihliweke lexi nga ta ka xi nga humeli erivaleni. ₂₃Loko munhu a ri ni tindleve ta ku yingisa, a a yingise.”

₂₄Yesu a engeta a va byela a ku: “Yingisani swinene leswi mi swi twaka. Mpimo lowu mi pimelaka van'wana ha wona, na n'wina, mi ta pimeriwa ha wona, ni ku tlula kwalaho. ₂₅La nga ni xa nchumu, ú ta nyikiwa ni swin'wana, kasi loyi a nga riki na nchumu, ú ta tekeriwa ni lexi a nga na xona.”

₂₆Yesu a engeta a ku: “Mfumo wa Xikwembu wu fana ni munhu la byaleke mbewu emisaveni; ₂₇hambi a etlele, hambi a pfukile, vusiku ni nhlekanhi mbewu yi tlhava, yi kula, yena a nga tivi leswi yi kurisaka swona. ₂₈Misava hi yoxe yi mirisa ximila, xi rhanga xi va khava, xi humesa nchocho, endzhaku ku huma tindzhoho enchochweni, ti vupfa; ₂₉kutani loko ti vupfile, va hatla va nghenisa rihwevo, hikuva ku tshovela ku fikile.”

₃₀A engeta a ku: “Mfumo wa Xikwembu hi ta wu fanisa na yini? Hi ta wu fanisa hi xifaniso xihi? ₃₁Wu fana ni ndzhoho ya murhi wa sinapi leyi nga yona leyitsongo eka timbewu hinkwato ta misava loko yi byariwa. ₃₂Kambe loko yi byariwile, yi mila, yi tlula swimila hinkwaswo hi ku kula, yi va ni marhavi lamakulu, tinyanyana ti ko ti ta, ti ta aka endzhutini wa yona.”

₃₃Hi swifaniso leswo tala swo tano, Yesu a a vula Rito eka vona, hilaha a va kota ku twisisa hakona. ₃₄A nga va byelanga nchumu, loko ku nga ri hi ku tirhisa xifaniso; kambe loko va ri etlhelweni, a hlamusela hinkwaswo eka vadyondzisiwa va yena.

₃₅Hi siku rero, hi nkarhi wa madyambu, Yesu a ku ka vona: “A hi peleleni entsungeni.” ₃₆Kuteloko va siyile ntshungu, va famba na yena hi byatso lebyi a a ri eka byona, kutani mabyatso man'wana na wona a ma ri kwalaho. ₃₇Kutani ku pfuka xidzedze lexikulu; magandlati a ma nghena ebyatsweni, byi ko byi lava ku tala hi mati. ₃₈Yena a a ri exihondzweni xa le ndzhaku, a etlele exiseketelweni. Va ya n'wi pfuxa, va ku ka yena: “Mudyondzisi, xana a hi nchumu eka wena loko hi lova ke?” ₃₉Hiloko a pfuka, a tshinya mheho, a ku ka lwandle: “Miyela, u ku ntse!” Mheho yi va yi miyela, ku va ni ku rhula lokukulu. ₄₀Kutani a ku ka vona: “Hikwalaho ka yini mi ri ni vutoya ke? A mi si va ni ku pfumela xana?” ₄₁Kutani va chava hi ku chava lokukulu, va byelana va ku: “Xana munhu loyi i munhu muni, leswi mheho ni lwandle swi n'wi yingisaka ke?”