Marka 2

₁Loko ku hundzile masiku ma nga ri mangani Yesu a vuyela Kapernawume, kutani ku twakala leswaku ú kona le kaya. ₂Vanhu lavo tala va hlengeletana kona, ku ko ku pfumaleka ni vutshamo emahlweni ka nyangwa, kutani Yesu a va dyondzisa Rito ra Xikwembu.

₃Kutani ku fika eka yena lava tisaka munhu la khwanyaleke swirho, a rhwariwile hi mune wa vanhu. ₄Vona hi ku tsandzeka ku n'wi fikisa eka Yesu hi ku tala ka vanhu, va hahlula lwangu ra yindlu leyi a a ri ka yona. Loko va ri hahlurile, va nembeleta masangu lawa loyi a khwanyaleke swirho a etleleke ka wona. ₅Loko Yesu a vona ku pfumela ka vona, a ku ka loyi a khwanyaleke swirho: “N'wananga, u rivaleriwile swidyoho swa wena.” ₆Kambe vatsari van'wana lava a va tshamile kwalaho, va vilela etimbilwini ta vona, va ku: ₇“Hikwalaho ka yini munhu loyi a vulavurisa leswi ke? Ú sandza Xikwembu! I mani la nga rivalelaka swidyoho, loko xi nga ri Xikwembu ntsena ke?” ₈Yesu a hatla a swi tiva emoyeni wa yena leswaku va vilerisa sweswo etimbilwini ta vona, kutani a ku ka vona: “Mi vilela hikwalaho ka yini etimbilwini ta n'wina ke? ₉Ku olova yini ke? Xana hi loko ndzi ku ka loyi a khwanyaleke swirho: ‘U rivaleriwile swidyoho swa wena’, kumbe hi loko ndzi ku ka yena: ‘Pfuka, u teka masangu ya wena, u famba’ xana? ₁₀Sweswi mi ta tiva leswaku N'wana-wa-Munhu ú ni matimba la misaveni ku rivalela vanhu swidyoho.” Kutani a ku ka loyi a khwanyaleke swirho: ₁₁“Ndzi ri ka wena, pfuka, u teka masangu ya wena, u ya kaya.” ₁₂Kutani yena a pfuka, a teka masangu ya yena, a famba emahlweni ka vanhu hinkwavo; hiloko hinkwavo va hlamala ngopfu, va dzunisa Xikwembu, va ku: “Swilo leswo tano a hi si swi vona.”

₁₃Yesu a tlhela a suka, a ya tlhelo ra lwandle; ntshungu hinkwawo wu ta ka yena, kutani a va dyondzisa. ₁₄Kakuloko a hundza, a vona Levhi, n'wana Alfiya, a tshamile endlwini ya ndzuvo; a ku ka yena: “Ndzi landze!” Kutani Levhi a suka a yima a n'wi landza.

₁₅Kutani loko Yesu a tshamile eswakudyeni ekaya ka Levhi, valuvisi lavo tala ni vadyohi va tshama na yena swin'we ni vadyondzisiwa va yena, hikuva vanhu lavo tala a va n'wi landza. ₁₆Kambe loko vatsari va ntlawa wa Vafarisi va n'wi vona a dya ni vadyohi ni valuvisi, va ku ka vadyondzisiwa va yena: “Xana ú dyela yini ni valuvisi ni vadyohi ke?” ₁₇Loko Yesu a twa sweswo, a ku ka vona: “Lava tsakeke emirini a va lavi n'anga, kambe yi laviwa hi lava vabyaka. A ndzi tanga ku ta vitana lava lulameke, kambe vona lava dyoheke.”

₁₈Loko vadyondzisiwa va Yohane ni Vafarisi va ri karhi va titsona swakudya, ku ta vanhu van'wana va ta vutisa Yesu, va ku: “Xana vadyondzisiwa va Yohane ni vadyondzisiwa va Vafarisi va titsonela yini swakudya, leswi vadyondzisiwa va wena va nga titsoniki ke?” ₁₉Yesu a ku ka vona: “Xana tinxangwana ta muteki ti nga titsona swakudya loko muteki a ha ri na tona ke? Nkarhi hinkwawo loko muteki a ha ri kona na tona, ti nga ka ti nga titsoni swakudya. ₂₀Kambe masiku ma ta ta, lawa muteki a nga ta susiwa eka tona; hi kona ti nga ta titsona swakudya, hi siku rorero. ₂₁A ku na munhu loyi a rhungelaka xiqhivi lexintshwa engubyini ya khale; hikuva loko a endlisa sweswo xiqhivi lexintshwa xi ta handzula nguvu leya khale, kutani ku handzuka ka kona ku ta ya ku engeteleka. ₂₂Naswona a ku na munhu loyi a chelaka vhinyo leyintshwa eminkwameni ya khale ya madzovo, hikuva loko a endlisa sweswo vhinyo yi ta handzula minkwama, yi halaka, na yona minkwama yi ta onhaka; kambe vhinyo leyintshwa va yi chela eminkwameni leyintshwa.”

₂₃Hi siku ra Savata loko Yesu a ri karhi a hundza exikarhi ka masimu, vadyondzisiwa va yena va sungula ku tshova min'oko, va ri karhi va famba. ₂₄Vafarisi va ku ka yena: “Vona! Xana va endlela yini leswi nga pfumeleriwiki hi siku ra Savata?” ₂₅Yesu a ku ka vona: “Xana a mi si hlaya leswi endliweke hi Davhida, siku a pfumaleke swakudya, a khomiwe hi ndlala, yena ni lava a va ri na yena ke? ₂₆U nghenile endlwini ya Xikwembu, enkarhini wa Abiyatara Muprista lonkulu, a dya swinkwa swa mhamba leswi nga fanelangiki ku dyiwa hi vanhu van'wana, loko ku nga ri hi vaprista ntsena, a tlhela a nyika ni lava a va ri na yena.” ₂₇Kutani a ku ka vona; “Savata ri endleriwe munhu, a hi munhu la nga endleriwa Savata. ₂₈Hikwalaho ke, N'wana-wa-Munhu i hosi ni ya siku ra Savata.”