Ta ku dyondzisa ka Yohane Mukhuvuri
1Lawa hi wona masungulo ya Evhangeli ya Yesu Kriste, [N'wana wa Xikwembu]. 2Ma ve hilaha ku tsariweke hakona ebukwini ya muprofeta Esaya, loko a te:
“Vona, ndzi rhuma ntsumi ya mina emahlweni ka wena,
leyi nga ta lunghisa ndlela ya wena.
3Rito ra munhu la huwelelaka emananga ri ri:
‘Khulelani ndlela ya Hosi, mi lulamisa magondzo ya yona.’ ”
4Yohane Mukhuvuri ú humelerise xisweswo emananga a ri karhi a huwelela, a byela vanhu ku hundzuka va khuvuriwa, leswaku Xikwembu xi va rivalela swidyoho swa vona. 5Kutani vanhu hinkwavo va tiko ra Yudiya ni vaaki hinkwavo va Yerusalema, a va ya va ya khuvuriwa hi yena enambyeni wa Yordani, va ri karhi va tivula swidyoho swa vona.
6Yohane a a ambele nguvu yo lukiwa hi voya bya kamela, a tikhamile hi vamba ra dzovo, a dya tinjiya ni vulombe bya nhova. 7A a twarisa mahungu lama nge: “Wa ta un'wana endzhaku ka mina, loyi a ndzi tlulaka hi matimba, loyi swi nga ndzi fanelangiki ku korhama ndzi ntshunxa ngoti ya tintanghu ta yena. 8Mina ndzi mi khuvurile hi mati, kambe yena ú ta mi khuvula hi Moya lowo Kwetsima.”
Ta ku khuvuriwa ka Yesu
9Hi masiku walawo, Yesu a huma eNazareta, wu nga muti wa le Galeliya, a ya khuvuriwa hi Yohane eYordani. 10Kutani loko a ri karhi a huma ematini, a vona tilo ri pfuleka, ni Moya wu xikela ehenhla ka yena wu fana ni tuva; 11kutani rito leri humaka etilweni ri ku: “U N'wananga la rhandzekaka, loyi ndzi n'wi tsakelaka.”
Ta ku ringiwa ka Yesu
12Hi nomu lo Moya wu n'wi yisa emananga; 13kutani a tshama kona masiku ya 40, a ri karhi a ringiwa hi Sathana. A a ri exikarhi ka swivandzana, tintsumi na tona a ti n'wi tirhela.
Ta Yesu loko a sungula ntirho wa yena eGaleliya
14Endzhaku ka loko Yohane a nghenisiwile ekhotsweni, Yesu a ya eGaleliya, a twarisa Evhangeli ya Xikwembu, a ku: 15“Minkarhi yi hetisekile, Mfumo wa Xikwembu wu le kusuhi; hundzukani, mi pfumela Evhangeli.”
Ta Yesu loko a vitana vadyondzisiwa va mune
16Loko a ri karhi a lulama ni lwandle ra Galeliya, a vona Simoni, na Andriya makwavo, va ri karhi va hoxa tinkoka ta vona elwandle, hikuva a va ri vaphasi va tinhlampfi. 17Yesu a ku ka vona: “Ndzi landzeni, ndzi ta mi endla vaphasi va vanhu.” 18Kutani hi nomu lo va tshika tinkoka ta vona, va n'wi landza. 19Loko a hundzanyana a ya emahlweni, a vona Yakobo na Yohane vana va Zebediya va ri ebyatsweni, va ri karhi va lukelela tinkoka ta vona. 20Kuteloko a va vitanile, va siya tata wa vona Zebediya ebyatsweni swin'we ni vatirhi, va n'wi landza.
Ta munhu la ngheniweke hi moya wa thyaka
21Va ya nghena Kapernawume; kutani hi siku ra Savata a nghena esinagogeni, a dyondzisa. 22A va hlamala dyondzo ya yena, hikuva a a va dyondzisa kukotisa la nga ni vuhosi, ku nga ri kukota vatsari.
23Esinagogeni ra vona a ku ri ni munhu la ngheniweke hi moya wa thyaka; wona wu huwelela, 24wu ku: “Mhaka ya hina na wena hi yihi, we Yesu wa Nazareta? Xana u tele ku ta hi lovisa xana? Ndza ku tiva leswaku u mani, u lowo Hlawuleka wa Xikwembu.” 25Yesu a wu tshinya, a ku: “Miyela! Huma ka munhu yoloye!” 26Kutani moya wa thyaka wu n'wi rhurhumerisa hi matimba, wu huwelela hi rito lerikulu, wu huma eka yena. 27Kutani hinkwavo va hlamala ngopfu, lero kala va vutisana va ku: “Hi leswo yini leswi? I dyondzo leyintshwa! Hikuva ú lerisa hi matimba mimoya ya thyaka, kutani na yona yi n'wi yingisa!” 28Kutani ku twakala ka yena ku hatla ku hangalaka ematlhelo hinkwawo ya Galeliya.
Ta Yesu loko a hanyisa mana wa nkata Simoni
29Loko va huma esinagogeni, va ya emutini wa Simoni na Andriya va ri na Yakobo na Yohane. 30Mana wa nkata Simoni a a etlele a vabya, miri wa yena wu hisa; kutani va n'wi vika eka Yesu. 31Hiloko a tshinela, a n'wi khoma hi voko, a n'wi pfuxa; hi nomu lo ku hisa ka miri wa yena ku suka, kutani a va tirhela.
Ta Yesu loko a hanyisa lavo tala nimadyambu
32Nimadyambu, loko ri perile, va n'wi tisela hinkwavo lava a va ri na mavabyi, ni lava a va ri na mademona. 33Vaaki hinkwavo va muti a va hlengeletanile enyangweni. 34Kutani a hanyisa vanhu lavo tala lava vabyaka hi mavabyi ya tinxaka-xaka, a hlongola ni mademona layo tala. Ntsena a a nga pfumeleri mademona lawa ku vulavula, hikuva a ma n'wi tiva.
Ta Yesu loko a huma ku ya dyondzisa
35Yesu a vindzuka swinene a huma emutini, a ya mananga a ya khongela kona. 36Kambe Simoni ni lava a va ri na yena va famba va n'wi lava. 37Kuteloko va n'wi kumile, va ku ka yena: “Hinkwavo va ku lava.” 38Yena a ku ka vona: “A hi yeni kun'wana, emitini leyi nge kusuhi, leswaku na kona ndzi ta twarisa Evhangeli, hikuva ndzi tele swona.” 39Kutani a famba, a twarisa Evhangeli emasinagogeni ya vona, etikweni hinkwaro ra Galeliya, a ri karhi a hlongola mademona.
Ta Yesu loko a basisa munhu wa nhlokonho
40Munhu un'wana wa nhlokonho a ta ka yena, a nkhinsama emahlweni ka yena, a n'wi khongela a ku: “Loko u swi rhandza, u nga ndzi basisa.” 41Yesu a n'wi twela vusiwana, a tshambuluta voko, a n'wi khumba, a ku ka yena: “Ndza swi rhandza, hlantsweka u basa!” 42Kutani hi nomu lo nhlokonho yi n'wi sukela, a hlantsweka. 43Yesu a n'wi laya hi matimba, a n'wi tlherisa hi ku hatlisa, a ku ka yena: 44“Tivonele, u nga tshuki u byela munhu swilo leswi, kambe famba, u ya tikomba eka muprista, u humesa swa ku basisiwa ka wena leswi lerisiweke hi Muxe, swi ta va vumbhoni eka vona.” 45Kambe yena loko a sukile kwalaho, a famba a twarisa ni ku hangalasa hinkwako mahungu walawo, Yesu a kondza a tiviwa emitini hinkwayo leyi a a nghena eka yona; hiloko a ya titshamela handle erivaleni; kutani vanhu va ta eka yena, va huma ematlhelweni hinkwawo.
