Mikiya 1

₂N'wina hinkwenu vanhu va matiko, yingisani,

we misava ni hinkwaswo leswi nga ka wena, rhiya ndleve.

HOSI N'wini wa hinkwaswo ú ta ta a huma eTempeleni ya yena leyo hlawuleka,

a tela ku ta avanyisa vanhu exikarhi ka n'wina.

₃Vonani hi loyi, ú huma laha a tshamaka kona,

a rhelela, a famba hi le tinhlohlorhini ta tintshava.

₄Laha a taka hi kona, tintshava ti n'oka

ku fana ni mafurha endzilweni,

rivala ri celeka

wonge ku lo na mpfula ya ximbhembhe emagangeni.

₅Hinkwaswo leswi swi vangiwa hi ku tiarisa ka va ka Yakobo,

swi tisiwa hi ku dyoha ka Vaisraele.

Xana la endlaka leswaku va ka Yakobo va tiarisa i mani?

I muti wa Samariya!

I mani la dyohisaka va le Yuda?

I muti wa Yerusalema!

₆Hikokwalaho HOSI Xikwembu xi ri:

“Ndzi ta herisa muti wa Samariya, wu sala wu ri rhumbi;

wu ta hundzuka rivala leri va nga ta byala vhinya eka rona;

maribye ya rirhangu ra wona, ndzi ta ya ma hoxa enkoveni,

masungulo ya muti ma ta sala erivaleni.

₇Swikwembu swa wona swa swifaniso swi ta fayeteriwa,

hinkwaswo leswi wu swi kumeke hi vunghwavava bya wona swi ta hisiwa,

swikwembu leswi swa hava, ndzi ta swi fayetela hinkwaswo.

Va le Samariya va swi hlengeletile hi ku endla vunghwavava,

kutani swi ta tlhela swi ya tirha swa vunghwavava!”

₈Kutani Mikiya a ku:

“Hikokwalaho ka leswi, ndzi ta rila ndzi kolola,

ndzi ta hluvula ndzi famba ntsena;

ndzi ta vovola ku fana ni hlolwa,

ndzi rila kukota yimbhu.

₉Timbanga ta Samariya a ti tshunguleki;

Yuda na yena ú ngheneriwe hi khombo ra kona,

ri fikile na le nyangweni ya tiko ra rikwerhu,

wu nga muti wa Yerusalema.

₁₀“Mi nga tshuki mi byela va le Gati etimhaka leti,

ni ku rila mi nga rili.

N'wina va le Beta-Leyafara,

puluvundzani eritshurini.

₁₁N'wina va le Xafiri, nghenani endleleni mi tsutsuma,

fambani ni tingana ta n'wina mi nga ambalanga nchumu.

N'wina va le Saanana, a mi tikarhatanga ku huma mi ya pfuna va le Beta-Esele,

hikokwalaho sweswi va le xirilweni lexikulu,

va nga ka va nga ha mi amukeli ni siku ni rin'we.

₁₂Vanhu lava tshamaka eMaroti va le ku chaveni swinene,

hikuva khombo leri HOSI Xikwembu xi ri rhumeke,

ri fikile enyangweni ya muti wa Yerusalema.

₁₃Panani tihanci n'wina va le Lakixi, mi baleka;

hi n'wina mi dyondziseke va le Yerusalema ku dyoha,

hikuva a mi ri ni swilo hinkwaswo

leswi a swi dyohisa tiko ra Israele.

₁₄N'wina va le Yuda, nyikani va le Morexeta-Gati

leswi va nga ta mi vona ha swona loko mi hambanile na vona;

tihosi ta Israele ti nga ka ti nga ha kumi ku pfuneka

emutini wa Akizibi.

₁₅N'wina vaaki va le Marexa,

HOSI Xikwembu xi ta mi tisela loyi a nga ta mi hlula,

varhangeri va Israele va ta ya tumbela

ebakweni ra le Adulama.

₁₆Byewulani misisi hinkwayo etinhlokweni ta n'wina,

mi rila vana va n'wina lava mi va rhandzaka;

vangamisani tinhloko ta n'wina,

hikuva vana va n'wina va ta yisiwa evukhumbini.”