Matewu 5

₁Loko Yesu a vona mintshungu, a tlhandlukela entshaveni; kuteloko a tshamile, vadyondzisiwa va yena va n'wi tshinelela. ₂Kutani a sungula ku va dyondzisa, a ku:

₁₁“Mi ta kateka loko va mi rhuketela, loko va mi xanisa ni ku mi lumbeta hi mavunwa layo tala hikwalaho ka mina. ₁₂Tsakani, mi tsakisisa, hikuva hakelo ya n'wina i yikulu ematilweni; naswona va xanisise sweswo vaprofeta lava a va ri kona, n'wina mi nga si va kona.”

₁₃“N'wina mi munyu wa misava; kambe loko munyu wu phyama, ku dzunga ka wona ku ta pfuxetiwa hi yini ke? A wa ha pfuni nchumu, loko ku nga ri ku cukumetiwa ehandle, wu kandziyeriwa hi vanhu.

₁₄“N'wina mi ku vonakala ka misava; muti lowu akiweke entshaveni a wu tumbeli. ₁₅Naswona, a va lumeki rivoni ku ri khubumeta hi xirhundzu, kambe va ri veka ehenhla, kutani ri voninga hinkwavo lava nge ndlwini. ₁₆Ku vonakala ka n'wina a ku voningele vanhu hi mukhuva wolowo, leswaku va ta vona mintirho ya n'wina leyo saseka, va dzunisa Tata wa n'wina la nge matilweni.

₁₇“Mi nga anakanyi leswaku ndzi tile ku ta herisa Nawu hambi va ri Vaprofeta; a ndzi tanga ku ta herisa, ndzi tile ku ta hetisisa. ₁₈Ndzi tiyisile ndzi ri ka n'wina: Tilo ni misava swi nga si nyamalala, xihikwana kumbe xirhatana, hambi xi ri xin'we, xi nga ka xi nga susiwi eNawini, ku kondza loko swilo hinkwaswo swi ta va swi hetisekile. ₁₉Hikwalaho loyi a nga ta tlula wun'wanyana wa milawu leyitsongo leyi, kutani a dyondzisa vanhu ku endlisa sweswo, ú ta vuriwa lontsongo eMfun'weni wa matilo. Kambe loyi a nga ta yi hlayisa ni ku yi dyondzisa, ú ta vuriwa lonkulu eMfun'weni wa matilo. ₂₀Hikuva ndza mi byela, ndzi ri: Loko ku lulama ka n'wina ku nga tluri ku lulama ka vatsari ni ka Vafarisi, a mi nga ngheni eMfun'weni wa matilo.

₂₁“Mi swi twile leswi vuriweke eka lava khale, loko va te: ‘U nga tshuki u dlaya; loyi a dlayaka, ú ta fanela ku avanyisiwa.’ ₂₂Kambe mina ndzi ri ka n'wina: Un'wana ni un'wana la hlundzukelaka makwavo, ú ta fanela ku avanyisiwa; loyi a nge ka makwavo: ‘U xiphukuphuku!’ ú fanele ku yisiwa eka muavanyisi; la nge ka yena: ‘Xihunguki ndziwena!’ ú fanele hi ndzilo wa Tihele. ₂₃Hikwalaho, loko u humesa mhamba ya wena alitarini, kutani u tsundzuka kwalaho leswaku makwenu ú ni mhaka na wena, ₂₄siya mhamba ya wena kwala alitarini, kutani u rhanga u ya rivalelana ni makwenu; hi kona u nga ta ta, u ta humesa mhamba ya wena.

₂₅“Hatlisa u pfumelelana ni loyi u tengisanaka na yena, ma ha ri endleleni, leswaku munhu loyi a ta ka a nga ku nyiketi eka muavanyisi, muavanyisi yena a ku nyiketa eka phorisa, kutani u nghenisiwa ekhotsweni, ₂₆Ndzi tiyisile ndzi ri ka wena, u nga ka u nga humi kona, loko u nga si humesa mali hinkwayo, yi ku bì!

₂₇“Mi swi twile leswi nga vuriwa loko va te: ‘U nga tshuki u oswa.’ ₂₈Kambe mina ndzi ri ka n'wina: Un'wana ni un'wana la langutaka wansati hi ku n'wi navela, ú n'wi oswile embilwini ya yena. ₂₉Hikokwalaho loko tihlo ra wena ra xinene ri ku dyohisa, ri xokole, u ri cukumeta kule na wena; hikuva swi nga antswa loko xirho xin'we xa wena xi lova, miri wa wena hinkwawo wu nga hoxiwi eTiheleni. ₃₀Loko voko ra wena ra xinene ri ku dyohisa, ri tseme, u ri cukumeta kule na wena, hikuva swi nga antswa loko xirho xin'we xa wena xi lova, miri wa wena hinkwawo wu nga yi eTiheleni.

₃₁“Ku vuriwile, va te: ‘Loyi a tshikaka nsati wa yena, a a n'wi nyike papila ra ku n'wi tshika.’ ₃₂Kambe mina ndzi ri ka n'wina: Un'wana ni un'wana la tshikaka nsati wa yena, loko ku nga ri hi mhaka ya vunghwavava, ú n'wi endla leswaku a hundzuka muoswi; kutani un'wana ni un'wana la tekaka wansati la tshikiweke hi mukhuva wolowo, wa oswa.

₃₃“Nakambe mi swi twile leswaku ku vuriwile eka lava khale, va te: ‘U nga tshuki u hundzuka eku hlambanyeni ka wena, kambe u ta endla leswi u nga hlambanya swona emahlweni ka Hosi.’ ₃₄Kambe mina ndzi ri ka n'wina: Mi nga tshuki mi hlambanya ni kutsongo, hambi ku ri hi tilo, hikuva i xiluvelo xa Xikwembu, ₃₅hambi ku ri hi misava, hikuva i vunavelo bya milenge ya xona, hambi ku ri hi Yerusalema, hikuva i muti wa Hosi leyikulu. ₃₆Hambi yi ri nhloko ya wena, u nga tshuki u hlambanya ha yona, hikuva u nga ka u nga swi koti ku hundzula ni nsisi ni wun'we, ku wu endla lowo basa kumbe lowa ntima. ₃₇Eku vulavuleni ka n'wina ‘Ina’ a a ve ‘Ina’, ‘E-e’ a va ‘E-e’; leswi engeteleriwaka eka sweswo swi huma eka Lowo biha.

₃₈“Mi swi twile leswi nga vuriwa loko va te: ‘Tihlo ri rihiwa hi tihlo, tino hi tino.’ ₃₉Kambe mina ndzi ri ka n'wina: Mi nga tshuki mi alela loyi a mi endlaka swo biha; kambe loko munhu a ku makala rhama ra xinene, n'wi kangatelele ni lerin'wana. ₄₀Ni loko munhu a lava ku ku mangalela, a ku tekela baji, n'wi tshike a teka na rona jasi. ₄₁Loko munhu a ku sindzisa ku famba mpfhuka wun'we, famba na yena mimpfhuka mimbirhi. ₄₂Nyika la kombelaka eka wena, u nga fularheli loyi a navelaka ku lomba xa nchumu eka wena.

₄₃“Mi swi twile leswi nga vuriwa, loko va te: ‘U ta rhandza warikwenu, u venga nala wa wena.’ ₄₄Kambe mina ndzi ri ka n'wina: Rhandzani valala va n'wina, mi khongelela lava va mi xanisaka, ₄₅leswaku mi hundzuka vana va Tata wa n'wina la nge matilweni, hikuva ú tsuvukisa dyambu ra yena ehenhla ka lavo biha ni lavanene, ú nisa mpfula ehenhla ka lavo lulama ni lavo homboloka. ₄₆Loko mi rhandza lava va mi rhandzaka ntsena, xana mi nga langutela hakelo muni ke? Na vona valuvisi a va endlisi sweswo xana? ₄₇Ni loko mi xewetana na vamakwenu ntsena, mi tlula van'wana ha yini ke? Na vona vamatiko a va endlisi sweswo xana? ₄₈Hikwalaho ke, na n'wina mi fanele ku hetiseka, hilaha Tata wa n'wina wa le tilweni na yena a hetisekeke.