Matewu 19

₁Kuteloko Yesu a hetile ku vulavula timhaka leti, a suka eGaleliya, a ya etikweni ra Yudiya, entsungeni wa Yordani. ₂Mintshungu leyikulu yi n'wi landza, kutani a va hanyisela kwale ntsungeni.

₃Vafarisi va ta ka yena ku n'wi ringa, va ku: “Xana munhu wa pfumeleriwa ku tshika nsati wa yena hi mhaka yin'wana ni yin'wana ke?” ₄Yesu a va hlamula a ku: “A mi hlayanga xana marito lama nge: ‘Eku sunguleni Mutumbuluxi ú endlile munhu wa xinuna ni munhu wa xisati’ xana? ₅Naswona Mutumbuluxi ú te: ‘Hikwalaho ka swona wanuna ú ta sukela tata wa yena ni mana wa yena, a namarhela nsati wa yena; kutani lavambirhi va ta va nyama yin'we ntsena.’ ₆Swi vula leswaku a va ha ri vambirhi, kambe i nyama yin'we ntsena. Hikwalaho ke leswi Xikwembu xi swi hlanganiseke, swi nga tshuki swi hambanisiwa hi munhu.”

₇Vafarisi va ku ka yena: “Hikwalaho ka yini Muxe a lerisile vanhu leswaku wansati a nyikiwa papila leri n'wi ntshunxaka, kutani a tshikiwa ke?” ₈A ku ka vona: “Muxe ú mi pfumelerile ku tshika vasati va n'wina hikwalaho ka ku nonon'hwa ka timbilu ta n'wina; kambe eku sunguleni a swi nga ri tano. ₉Mina ndzi ri: Un'wana ni un'wana la tshikaka nsati wa yena, loko ku nga ri hi mhaka ya vunghwavava, kutani a teka un'wana, wa oswa.”

₁₀Vadyondzisiwa va Yesu va ku ka yena: “Loko timhaka ta wanuna ni nsati wa yena ti fambisa leswi, swa antswa ku tshama ntsena munhu a nga teki.” ₁₁A va hlamula a ku: “A hi hinkwavo lava va nga amukelaka mhaka leyi, kambe yi nga amukeriwa ntsena hi lava va nyikiweke swona. ₁₂Ku ni vatsheniwa lava nga velekiwa va ri tano emakhwirini ya vamana wa vona; ku ni vatsheniwa lava nga endliwa vatsheniwa hi vanhu; naswona ku ni lava nga titshena hi voxe hikwalaho ka Mfumo wa matilo. Loyi a kotaka ku amukela mhaka leyi, a a yi amukele!”

₁₃Kutani ku tisiwa vana eka Yesu leswaku a va tlhandleka mavoko, a va khongelela; kambe vadyondzisiwa va tshinya lava tisaka vana lava. ₁₄Hiloko Yesu a ku: “Tshikani vana, mi nga tshuki mi va sivela ku ta eka mina, hikuva Mfumo wa matilo i wa lava fanaka na vona.” ₁₅Kuteloko a va tlhandlekile mavoko, a suka kwalaho.

₁₆Kavaloko munhu un'wana a ta ka yena a ku: “Mudyondzisi, xana leswinene leswi ndzi fanelaka ku endla swona leswaku ndzi ta va ni vutomi lebyi nga heriki, hi swihi ke?” ₁₇Yesu a n'wi hlamula, a ku: “U ndzi vutisela yini hi ta leswinene xana? Lonene i un'we ntsena. Kambe loko u lava ku nghena evutomini, hlayisa Milawu.” ₁₈Yena a ku ka Yesu: “Hi yihi ke?” Yesu a n'wi hlamula, a ku: “Hi leyi nge: ‘U nga tshuki u dlaya, u nga tshuki u oswa, u nga tshuki u yiva, u nga tshuki u humesa vumbhoni byo hemba; ₁₉u va ni xichavo eka tata wa wena ni ka mana wa wena.’ Naswona: ‘U rhandza munhu-kuloni kukota loko u tirhandza.’ ” ₂₀Jaha leri ri ku ka yena: “Hinkwaswo leswi ndzi swi hlayisile; xana ndza ha pfumala yini ke?” ₂₁Yesu a ku ka yena: “Loko u lava ku va la hetisekeke, famba u ya xavisa leswi u nga na swona, u nyika swisiwana, hikona u nga ta va ni xuma ematilweni; kutani u ta, u ndzi landza.” ₂₂Kambe loko jaha leri ri twa marito lawa, ri famba ri hlunamile, hikuva a ri ri ni rifuwo lerikulu.

₂₃Kutani Yesu a ku ka vadyondzisiwa va yena: “Ndzi tiyisile ndzi ri ka n'wina: Swi ta nonon'hwa eka mufuwi ku nghena eMfun'weni wa matilo. ₂₄Ndzi engeta ndzi ku ka n'wina: Swi nga olovela kamela ku nghena hi ntuva wa neleta, ku ri ni leswaku mufuwi a nghena eMfun'weni wa matilo.” ₂₅Loko vadyondzisiwa va twa marito lawa, va hlamala ngopfu, va ku: “Loko swi ri tano, ku nga pona mani xana?” ₂₆Yesu a va langutisisa, a ku: “Loko va ri vanhu, leswi swa va tsandza, kambe Xikwembu xona a xi tsandzi hi nchumu.”

₂₇Kutani Petro a ku ka Yesu: “Waswivo, hina hi tshikile hinkwaswo, hi ku landza; xana hi ta vuyeriwa hi yini?” ₂₈Yesu a ku ka vona: “Ndzi tiyisile ndzi ri ka n'wina, loko swilo hinkwaswo swi ta va swi vuyeteriwile, ni loko N'wana-wa-Munhu a tshamisile exiluvelweni xa yena lexo kwetsima, n'wina lava mi ndzi landzeke, na n'wina mi ta tshama eswiluvelweni swa 12, mi avanyisa tinyimba ta Israele leta 12. ₂₉Kutani un'wana ni un'wana la tshikeke tindlu ta yena, kumbe vamakwavo va xinuna ni va xisati, kumbe tata wa yena, kumbe mana wa yena, kumbe vana, kumbe masimu, hikwalaho ka vito ra mina, ú ta nyikiwa swona ka dzana, a tlhela a dya ndzhaka ya vutomi lebyi nga heriki. ₃₀Vanyingi lava nga va le mahlweni va ta va va le ndzhaku, ni va le ndzhaku va ta va va le mahlweni.