Matewu 13

₁Hi siku rero, Yesu a huma endlwini, a ya tshama kusuhi ni lwandle. ₂Kutani mintshungu leyikulu yi hlengeletana yi tela yena, a ko a nghena ebyatsweni, a tshama endzeni ka byona; loko wu ri ntshungu hinkwawo, wona a wu yimile eribuweni. ₃Kutani a va byela timhaka leto tala hi swifaniso, a ku:

“Yingisani! Muhaxi ú humile a ya eku haxeni. ₄Loko a ri karhi a haxa, timbewu tin'wana ti wela endleleni; kutani tinyanyana ti ta, ti ta dya hinkwato. ₅Timbewu tin'wana ti wela emaribyeni, laha a ku nga ri na misava leyo tala, kutani ti hatla ti mila, hikuva misava ya kona a yi nga talanga. ₆Kambe loko dyambu ri tlhava, swimila swi vuna kutani swi oma hi ku pfumala timitsu. ₇Timbewu tin'wana ti wela exikarhi ka mitwa; loko mitwa yi kula, yi ti kamanyeta. ₈Kasi tin'wana tona ti wela emisaveni leyinene, ti veka tindzhoho, yin'wana yi chela 100, yin'wana 60, yin'wana 30. ₉La nga ni tindleve, a a yingise!”

₁₀Vadyondzisiwa va ta eka Yesu, va ku: “Hikwalaho ka yini u vulavula na vanhu hi swifaniso ke?” ₁₁A va hlamula, a ku: “Hileswaku n'wina, mi nyikiwile ku tiva swihundla swa Mfumo wa matilo, kambe vona a va nyikiwanga. ₁₂Loyi a nga ni xa nchumu, ú ta nyikiwa ni swin'wana, kutani ú ta va ni leswo tala; kambe loyi a nga riki na nchumu, ú ta tekeriwa ni lexi a nga na xona. ₁₃Leswi endlaka leswaku ndzi vulavula na vona hi swifaniso, i mhaka ya leswaku va vona kambe a va voni, va twa kambe a va twi, ni ku twisisa a va twisisi. ₁₄Kutani ku endleka eka vona leswi nga vuriwa khale hi muprofeta Esaya, loko a te:

₁₆“Kambe ma katekile mahlo ya n'wina, hikuva ma vona, ni tindleve ta n'wina, hikuva ta twa. ₁₇Ndzi tiyisile ndzi ri ka n'wina, vaprofeta lavo tala ni lava lulameke lavo tala, va naverile ku vona leswi mi swi vonaka kambe a va swi vonanga; hambi ku ri ku twa leswi mi swi twaka a va swi twanga.

₁₈“Loko mi ri n'wina, yingisani ta xifaniso xa muhaxi mi xi twisisa: ₁₉Un'wana ni un'wana la twaka Rito ra Mfumo wa Xikwembu, kambe a nga ri twisisi, swi fana ni loko mbewu yi haxiwile endleleni. Lowo biha a ta, a n'wi tekela leswi haxiweke embilwini ya yena. ₂₀Mbewu leyi haxiweke emaribyeni, swi fana ni loko munhu a twile Rito, a hatla a ri amukela hi ku tsaka; ₂₁kambe a nga na timitsu endzeni ka yena, ú tiyisela nkarhinyana ntsena; kutani loko khombo kumbe ku xaniseka swi humelela hikwalaho ka Rito, a hatla a khunguvanyeka. ₂₂Mbewu leyi haxiweke emitweni, swi fana ni loko munhu a twa Rito; kambe ku vilela hi swa misava ni ku kanganyisiwa hi rifuwo swi kamanyeta Rito, kutani ri tsandzeka ku veka mihandzu. ₂₃Kambe mbewu leyi haxiweke emisaveni leyinene, swi fana ni loko munhu a twa Rito a ri twisisa; hi yena loyi a vekaka mihandzu hakunene, yin'wana ka 100, yin'wana ka 60, yin'wana ka 30.”

₂₄Yesu a va vekela xifaniso xin'wana, a ku: “Mfumo wa matilo wu fana ni munhu loyi a byaleke mbewu leyinene ensin'wini ya yena. ₂₅Kambe loko vanhu va etlele, ku ta nala wa yena, a ta byala mfava exikarhi ka maxalana, kutani a tifambela. ₂₆Kuteloko maxalana ma tlhavile ni ku endla khava, na wona mfava wu vonaka. ₂₇Malandza ya n'wini wa muti ma ta, ma ku ka yena: ‘Hosi, a hi ku u byarile mbewu leyinene ensin'wini ya wena; xana mfava lowu wu pfa kwihi ke?’ ₂₈A ku ka vona: ‘I ku endla ka nala.’ Malandza ma ku ka yena: ‘Xana u lava leswaku hi ya tsuvula mfava ke?’ ₂₉A ku ka vona: ‘E-e, loko mi ya tsuvula mfava, kumbe xana mi nga tshuka mi tsuvurile na wona maxalana. ₃₀Swi tshikeni swi kula swin'we, ku kondza ku fika nkarhi wa ku tshovela; hi kona ndzi nga ta ku eka vatshoveri: Rhangani hi mfava mi tsuvula, mi wu boha hi tinyandza, mi ta wu hisa; kambe maxalana mi ma hlengeleta exitlatini xa mina.’ ”

₃₁A va vekela xifaniso xin'wana, a ku: “Mfumo wa matilo wu fana ni ndzhoho ya murhi wa sinapi leyi munhu a nga yi teka, a ya yi byala ensin'wini ya yena. ₃₂Mbewu ya kona hi leyitsongo eka timbewu hinkwato, kambe loko yi mirile, yi tlula swimila hinkwaswo hi ku kula, yi hundzuka nsinya, tinyanyana ti ko ti ta, ti ta aka emarhavini ya wona.”

₃₃A engeta a va byela xifaniso xin'wana, a ku: “Mfumo wa matilo wu fana ni comela lexi wansati a nga xi teka, a xi pfuva ni mimpimo minharhu ya mapa, swi ko swi kukumuka hinkwaswo.”

₃₄Yesu ú byerile mintshungu timhaka teto hinkwato hi swifaniso; a nga va byelanga nchumu loko ku nga ri hi swifaniso, ₃₅leswaku ku ta endleka rito ra muprofeta la nga te:

₃₆Kutani Yesu a suka entshungwini, a ya nghena endlwini; vadyondzisiwa va yena va ta ka yena, va ku: “Hi hlamusele xifaniso xa mfava wa le nsin'wini.” ₃₇A va hlamula, a ku: “Loyi a byaleke mbewu leyinene i N'wana-wa-Munhu; ₃₈nsimu i misava; mbewu leyinene i vana va Mfumo; mfava i vana va Lowo biha. ₃₉Nala la byaleke mfava i Diyavulosi; ku tshovela i ku hela ka minkarhi; vatshoveri vona i tintsumi. ₄₀Kukotisa loko mfava wu tsuvuriwa, wu ya hisiwa endzilweni, swi ta va tano eku heleni ka minkarhi. ₄₁N'wana-wa-Munhu ú ta rhuma tintsumi ta yena, ti ta humesela ehandle ka Mfumo wa yena vakhunguvanyisi hinkwavo ni lava endlaka leswo biha, ₄₂ti va cukumeta ekheleni ra ndzilo, laha minkosi yi nga ta va kona, ni ku getsela ka meno. ₄₃Enkarhini wolowo, lavo lulama va ta hatima kukotisa dyambu, eMfun'weni wa Tata wa vona. La nga ni tindleve, a a yingise!

₄₄“Mfumo wa matilo wu fana ni xuma lexi celeriweke ensin'wini, kungate loko munhu a xi thumbhile, a nga tlhela a xi celela, kutani eku tsakeni ka yena, a ya xavisa swilo swa yena hinkwaswo, a tixavela nsimu yoleyo.

₄₅“Naswona, Mfumo wa matilo wu fana ni muxavi la lavaka tidayimani letinene; ₄₆kutani loko a kumile dayimani yin'wana ya nxavo lowukulu, a ya xavisa swilo swa yena hinkwaswo, a tixavela yona.

₄₇“Ku engeta kambe: Mfumo wa matilo wu fana ni nkukuto lowu petiweke elwandle, wu phasa tinhlampfi ta tinxaka-xaka; ₄₈loko wu tele, vaphasi va wu kokela eribuweni, va tshama hansi, va hlengeleta tinhlampfi letinene eswibyeni swa vona, leti nga pfuniki nchumu va ti cukumeta. ₄₉Swi ta va tano eku heleni ka minkarhi; tintsumi ti ta huma, ti ta hlawula lavo biha eka lavo lulama, ₅₀ti va cukumeta ekheleni ra ndzilo, laha minkosi yi nga ta va kona, ni ku getsela ka meno.

₅₁“Xana ma ti twisisa timhaka leti hinkwato ke?” Va ku ka yena: “Ina!” ₅₂A ku ka vona: “Hi laha ndzi nge: Mutsari un'wana ni un'wana la dyondzisiweke hi ta Mfumo wa matilo, ú fana ni n'wini wa yindlu la humesaka evukosini bya yena swilo leswintshwa ni leswa khale.”

₅₃Kuteloko Yesu a hetile ku vula swifaniso sweswo, a suka kwalaho; ₅₄loko a fikile etikweni ra rikwavo, a dyondzisa vanhu esinagogeni ra vona, va kondza va hlamala, va ku: “Xana vutlhari lebyi ni mintirho leyi ya matimba, ú swi kume kwihi ke? ₅₅Xana a hi yena n'wana wa muvatli ke? Mana wa yena, xana a hi yena loyi a vuriwaka Mariya ke? Ni vamakwavo va yena, xana a hi vona va Yakobo, na Yosefa, na Simoni, na Yuda ke? ₅₆Xana vamakwavo va xisati a hi na vona hinkwavo exikarhi ka hina ke, naswona swilo leswi hinkwaswo ú swi kuma kwihi xana?” ₅₇Kutani va vilela swinene hikwalaho ka yena. Kambe Yesu a ku ka vona: “Muprofeta a nga soriwi, loko ku nga ri etikweni ra rikwavo, ni le maxakeni ya yena.” ₅₈Hikokwalaho, a nga endlanga mahlori layo tala kona, hikuva a va nga ri na ku pfumela.