Luka 8

₁Endzhaku ka sweswo, Yesu a famba hi miti ni swimitana a ri karhi a vula Rito, a twarisa Evhangeli ya Mfumo wa Xikwembu; lava khume na vambirhi na vona a va ri na yena, ₂ni vavasati van'wana lava ntshunxiweke emimoyeni leyo biha ni le mavabyini, a va ri kona. A va ri va Mariya (loyi a va ku i wa Magadala), loyi mademona ya 7 ma hlongoriweke eka yena, ₃na Yohana, nkata Khuza ndhuna ya Heroda, na Suzana, ni vavasati van'wana lavo tala lava a va tirhisa swa vona ku pfuna Yesu ni vadyondzisiwa va yena.

₄Vanhu a va ta eka Yesu va huma emitini leyo tala, va ko va endla ntshungu lowukulu, kutani a vulavula na vona hi xifaniso a ku:

₅“Muhaxi ú hume ku ya haxa mbewu; loko a ri karhi a haxa, timbewu tin'wana ti wela endleleni, vanhu va ti kandziyela, kutani tinyanyana ti ta, ti ta ti dya hinkwato. ₆Tin'wana ti wela emaribyeni, kutani loko ti mila, swimila swi vuna hi ku pfumala ndzhongho. ₇Timbewu tin'wana ti wela exikarhi ka mitwa, kutani mitwa yi mila swin'we na tona, yi ti kamanyeta ti fa. ₈Kambe tin'wana ti wela emisaveni leyinene; loko ti mirile, ti chela ka dzana.” Loko a vurile sweswo, a tlakusa rito a ku: “La nga ni tindleve ku yingisa, a a yingise.”

₉Kutani vadyondzisiwa va Yesu va n'wi vutisa xifaniso lexi, ku tiva leswaku xi vula yini. ₁₀Kutani a ku: “N'wina, mi nyikiwile ku tiva swihundla swa Mfumo wa Xikwembu, kambe van'wana va nyikiwa swona hi swifaniso, leswaku:

₁₁“Loko xi ri xifaniso lexi, xi vula leswi: Timbewu i Rito ra Xikwembu. ₁₂Leti nga wela endleleni, i vanhu lava twaka Rito; kutani Diyavulosi a ta, a ri susa etimbilwini ta vona, leswaku va ta ka va nga pfumeli, va nga ponisiwi. ₁₃Timbewu leti nga wela emaribyeni, i vanhu lava amukelaka Rito hi ku tsaka siku va ri twaka, kambe va pfumala timitsu, va tiyisela nkarhinyana ntsena; kutani hi siku ra ndzingo va tlhelela ndzhaku. ₁₄Timbewu leti nga wela emitweni, i vanhu lava tweke Rito, kambe loko va ri karhi va ya emahlweni, va kamanyetiwa hi ku vilela, ni rifuwo, ni ku titsakisa hi swa vutomi lebyi, kutani va nga ha veki mihandzu leyi vupfaka. ₁₅Timbewu leti nga wela emisaveni leyinene, i vanhu lava yingisaka Rito hi timbilu leto lulama, letinene, va ri hlayisa, va veka mihandzu hi ku tiyisela.

₁₆“A ku na munhu loyi a lumekaka rivoni, kutani a ri khubumeta hi mbita, kumbe ku ri veka ehansi ka mubedo; kambe ú ri veka ehenhla, leswaku lava nghenaka ndlwini va vona ku vonakala. ₁₇A ku na xilo lexi fihliweke lexi nga ta ka xi nga paluxiwi, a ku na xilo lexi nge xihundleni lexi nga ta ka xi nga tiviwi ni ku humela erivaleni. ₁₈Hikwalaho, tivoneleni, mi hlayisa leswi mi swi twaka. La nga ni xanchumu, ú ta nyikiwa swin'wana, kasi loyi a nga riki na nchumu, ú ta tekeriwa ni lexi a ehleketaka leswaku ú na xona.”

₁₉Mana wa Yesu ni vamakwavo va ta ka yena, kambe va tsandzeka ku fika kusuhi na yena hikwalaho ka ntshungu. ₂₀Kutani van'wana va n'wi tivisa va ku: “Mana wa wena ni vamakwenu va kwala handle, va navela ku ku vona.” ₂₁Kambe yena a ku: “Manana ni vamakwerhu, hi lava twaka Rito ra Xikwembu, va vuya va hanya ha rona.”

₂₂Hi siku rin'wana Yesu a nghena ebyatsweni ni vadyondzisiwa va yena, kutani a ku ka vona: “A hi peleleni entsungeni wa tiva.” Hiloko va tluta va famba. ₂₃Va te va ha pela, Yesu a khoma hi vurhongo a etlela; kutani xidzedze xi va fikela etiveni, byatso byi lava ku tala hi mati, kutani va va ekhombyeni. ₂₄Va ya n'wi pfuxa va ku: “Hosi, Hosi, ha lova!” Hiloko a pfuka a yima, a tshinya moya ni magandlati, swi va swi miyela, ku rhula ku va kona. ₂₅Kutani a ku ka vona: “Xana ku pfumela ka n'wina ku kwihi ke?” Vona va chava, va hlamala, va vutisana va ku: “Xana i munhu muni loyi, leswi a lerisaka mheho ni lwandle, swi vuya swi n'wi yingisa ke?”

₂₆Kutani va pelela etikweni ra Vagerasi leri langutaneke na Galeliya. ₂₇Loko a fikile eribuweni, a xika, kutani a hlangana ni wanuna un'wana la humaka emutini, a ri ni mademona; a ku ri khale a nga ha ambali nchumu, ni le ndlwini a nga ha tshami, kambe a a tshama emasirheni. ₂₈Loko a vona Yesu, a huwelela, a tiwisela hansi emahlweni ka yena, a tlakusa rito a ku: “Mhaka ya mina na wena hi yihi ke, wena Yesu N'wana wa Xikwembu xa le henhla-henhla? Ndza ku khongela, u nga ndzi xanisi.” ₂₉A a vula sweswo hikuva Yesu a a lerisile moya lowo biha ku huma eka munhu yoloye; moya wa kona a wu tala ku n'wi khoma, kutani a va n'wi boha mavoko ni milenge hi tinketani va n'wi rindza, kambe yena a tsema tinsimbhi teto, a yisiwa emananga hi moya lowo biha. ₃₀Yesu a n'wi vutisa a ku: “Vito ra wena u mani?” A ku: “Hi Vandla.” Hikuva mademona yo tala a ma nghenile eka yena. ₃₁Kutani ma khongela Yesu leswaku a nga ma lerisi ku huma ma ya exivandleni xa va le hansi.

₃₂A ku ri ni ntlhambi lowukulu wa tinguluve kwalaho, leti a ti ri eku dyeni egangeni. Mademona ma kombela hi matimba eka Yesu leswaku a ma pfumelela ku ya nghena eka tona. Kutani a ma pfumelela. ₃₃Kavaloko mademona ma huma eka munhu yoloye, ma nghena etingulubyeni, kutani hinkwato ti tsutsumela eriweni, ti ya tihoxa exidziveni, ti nwela kona. ₃₄Loko varisi va tona va vona leswi humeleleke, va baleka, va ya rungulela va muti ni va le masin'wini. ₃₅Kutani vona va huma, va ya vona leswi humeleleke. Loko va fika eka Yesu, va kuma munhu loyi mademona ma nga suka eka yena a tshamile emilengeni ya Yesu, a ambele, a ri munhu; kutani va chava ngopfu. ₃₆Lava voneke timhaka leti, va va rungulela hilaha munhu loyi wa mademona a hanyisiweke hakona. ₃₇Kutani vaaki hinkwavo va tiko ra Vagerasi, va kombela Yesu leswaku a suka etikweni ra vona, hikuva a va khomiwile hi ku chava lokukulu. Hiloko Yesu a nghena ebyatsweni, a tlhela.

₃₈Kutani munhu loyi mademona ma humeke eka yena, a kombela ku famba na Yesu; kambe Yesu a n'wi tlherisa, a ku: ₃₉“Tlhelela ka rikwenu, u ya vula leswikulu leswi Xikwembu xi ku endleleke swona.” Kutani a famba a ya rungula hinkwako emutini swilo leswikulu leswi Yesu a n'wi endleleke swona.

₄₀Kuteloko Yesu a tlherile, ntshungu wu n'wi amukela hi ku tsaka, hikuva hinkwavo a va n'wi languterile. ₄₁Kutani ku ta wanuna loyi a va ku i Yayiro, loyi a a ri murhangeri wa sinagoga; a wa emilengeni ya Yesu, a n'wi khongela leswaku a nghena emutini wa yena, ₄₂hikuva a a ri ni n'wana un'we ntsena wa wanhwanyana, wa malembe yo lava ku ringana 12, loyi a a ri kusuhi ni ku fa.

Loko Yesu a suka a ya kona, a kamanyetiwa hi mintshungu. ₄₃Kutani a ku ri na wansati kwalaho loyi a a ri ni vuvabyi bya ngati lebyi nga n'wi karhata malembe ya 12; [a a hetile xuma xa yena hinkwaxo etin'angeni], ku nga ri na munhu la kotaka ku n'wi hanyisa. ₄₄A ta hi ku nyandlamela hi le ndzhaku ka Yesu, a khumba makumu ya nguvu ya yena, kutani vuvabyi bya yena bya ngati byi hola kan'we-kan'we. ₄₅Yesu a ku: “I mani la ndzi khumbeke?” Kakuloko va kaneta hinkwavo, Petro a ku: “N'wini wanga, u rhendzeriwe hi mintshungu, kutani ya ku kamanyeta!” ₄₆Kambe Yesu a ku: “Munhu un'wana ú ndzi khumbile hikuva ndzi swi twile loko ku huma matimba man'wana laha ka mina.” ₄₇Loko wansati a vonile leswaku ú kumiwile, a ta hi ku rhurhumela, a wela emilengeni ya Yesu, a hlamusela emahlweni ka vanhu hinkwavo leswi a n'wi khumbeleke swona, ni hilaha a hanyisiweke hakona hi ku hatlisa. ₄₈Kutani Yesu a ku ka yena: “N'wananga, ku pfumela ka wena ku ku hanyisile, famba hi ku rhula.”

₄₉A ku a ha vulavula, ku ta un'wana la humaka eka murhangeri wa sinagoga, a fika a tivisa Yayiro a ku: “N'wana wa wena ú file, u nga ha karhati Mudyondzisi.” ₅₀Kambe loko Yesu a swi twa, a ku ka Yayiro: “U nga chavi, pfumela ntsena, n'wana ú ta hanya.” ₅₁Loko a fikile emutini, a nga pfumelelanga munhu ni un'we ku nghena na yena endlwini, loko va nga ri va Petro, na Yohane, na Yakobo, ni vatswari va lowa nhwanyana. ₅₂Vanhu hinkwavo a va n'wi rila hi xiviti; kutani Yesu a ku: “Mi nga rili; a nga fanga, ú lo etlela.” ₅₃Kutani va n'wi hleka, hi ku tiva leswaku n'wana ú file. ₅₄Kambe Yesu a n'wi khoma hi voko, a n'wi vitana a ku: “Nhwanyana, pfuka!” ₅₅Moya wu tlhelela ka yena, a sisimuka, kutani Yesu a va lerisa ku n'wi nyika swakudya.

₅₆Vatswari va yena va hlamala ngopfu; kambe a va lerisa leswaku va nga byeli munhu leswi humeleleke.